അബ്‌സറിനെ വിവാഹം കഴിക്കാനുള്ള തീരുമാനം എടുത്ത് ചാടിയതല്ല; ആറ് വര്‍ഷത്തോളം കാത്തിരുന്നെന്ന് നടി ഇന്ദ്രജ

ബാലതാരമായി വെള്ളിത്തിരയില്‍ അരങ്ങേറ്റം കുറിച്ച ഇന്ദ്രജ തുടക്കത്തില്‍ രാജാത്തി എന്ന പേരിലാണ് അറിയപ്പെട്ടത്. നായികയായി മാറിയതോടെയാണ് ഇന്ദ്രജ എന്ന പേരിലേക്ക് മാറിയത്. മലയാളത്തില്‍ അഭിനയിക്കാന്‍ വേണ്ടി മാത്രം മലയാളം പഠിച്ചാണ് ഇന്ദ്രജ കരിയറില്‍ വിജയിച്ചത്. ഏറെ കാലത്തിന് ശേഷം മലയാളത്തിലേക്ക് തിരിച്ച് വരവ് നടത്തിയപ്പോള്‍ കുടുംബത്തെ കുറിച്ചും മറ്റ് വിശേഷങ്ങളൊക്കെ നടി പറഞ്ഞിരുന്നു. അങ്ങനെ സ്റ്റാര്‍ ആന്‍ഡ് സ്റ്റൈലിന് നല്‍കിയ അഭിമുഖത്തിലെ ചില കാര്യങ്ങള്‍ വീണ്ടും വൈറലാവുകയാണ്. വിശദമായി വായിക്കാം..

തുളു ബ്രഹ്മാണ കുടുംബത്തില്‍ ജനിച്ച ഇന്ദ്രജയുടെ വിവാഹം മിശ്ര വിവാഹമായിരുന്നു. മുസ്ലിം വിശ്വാസിയായ അബ്സര്‍ എന്ന ബിസിനസുകാരനെ ആയിരുന്നു ഇന്ദ്രജ വിവാഹം കഴിച്ചത്. വലിയ എതിര്‍പ്പുകള്‍ക്കിടയില്‍ നിന്നും നടന്ന വിവാഹത്തെ കുറിച്ച് ഇന്ദ്രജ പലപ്പോഴും തുറന്ന് പറഞ്ഞിരുന്നു. അതൊരു എടുത്ത് ചാടിയുള്ള തീരുമാനം ആയിരുന്നില്ലെന്നും ആറ് വര്‍ഷത്തോളം കാത്തിരുന്നതിന് ശേഷമാണ് വിവാഹം കഴിച്ചതെന്നുമാണ് നടി പറഞ്ഞത്. പരിചയപ്പെട്ട് നാളുകള്‍ക്ക് ശേഷമാണ് അബ്‌സറുമായി പ്രണയത്തിലാവുന്നത്. എനിക്ക് പറ്റിയ ആളാണെന്ന് വ്യക്തമായതോടെയാണ് വിവാഹം കഴിക്കാമെന്ന് തീരുമാനിച്ചത്.

വിവാഹം കഴിഞ്ഞിട്ട് വര്‍ഷങ്ങളായി. ഇപ്പോഴും താന്‍ പക്കാ വെജിറ്റേറിയനായി തന്നെയാണ് കഴിയുന്നത്. വീട്ടില്‍ നോണ്‍വെജ് പാകം ചെയ്യാറില്ല. കഴിക്കേണ്ടവര്‍ പുറത്ത് നിന്നും കഴിക്കും. പരസ്പരം മനസിലാക്കിയും ബഹുമാനിച്ചുമാണ് ജീവിതം മുന്നോട്ട് കൊണ്ട് പോകുന്നത്. ഏറെ കാലങ്ങള്‍ക്ക് ശേഷം വീണ്ടും അഭിനയിക്കാന്‍ എത്തുമ്പോള്‍ മകളെ കുറിച്ചുള്ള ആശങ്കകളായിരുന്നു തനിക്കുള്ളത്. എന്നാല്‍ ആറാം ക്ലാസുകാരിയായ മകളാണ് തന്നെ പ്രോത്സാഹിപ്പിക്കാന്‍ മുന്‍പില്‍ തന്നെ ഉണ്ടായിരുന്നത്.

Recommended Video

Mammootty did not appear for indraja as Advocate

ഇന്ദ്രജ സിനിമയില്‍ നിന്നും വലിയ ഇടവേള എടുത്തതായി എല്ലാവര്‍ക്കും തോന്നിയിരുന്നു. എന്നാല്‍ അങ്ങനെയല്ല കാര്യങ്ങള്‍. മലയാളത്തില്‍ മാത്രമേ അഭിനയിക്കാതെ ഇരുന്നുള്ളു. ഈ കാലയളവില്‍ തെലുങ്കിലും തമിഴിലും അഭിനയിച്ചിട്ടുണ്ട്. മലയാള സിനിമയില്‍ അഭിനയിക്കാന്‍ സാധിച്ചില്ല. നല്ലൊരു അവസരം കിട്ടിയപ്പോള്‍ അത് സ്വീകരിച്ച് കൊണ്ടാണ് ട്വല്‍ത്ത് സി എന്ന ചിത്രത്തിലൂടെ ഇന്ദ്രജ മലയാള സിനിമയിലേക്ക് മടങ്ങി എത്തിയത്.