ഒന്നൊന്നര പണിയാണ്! മകള്‍ വന്നതിന് ശേഷം ജീവിതത്തില്‍ സംഭവിച്ച മാറ്റങ്ങളെക്കുറിച്ച് ദീപന്‍ മുരളി!

മകളുടെ വരവ്

അടുത്തിടെയായിരുന്നു ദീപന്‍ മുരളിയുടെ കുടുംബത്തിലേക്ക് കുഞ്ഞതിഥി എത്തിയത്. മകള്‍ ജനിച്ചുവെന്നും ആദ്യചിത്രം പങ്കുവെക്കുന്നുവെന്നും പറഞ്ഞായിരുന്നു താരമെത്തിയത്. ഫേസ്ബുക്ക് പോസ്റ്റിലൂടെയായിരുന്നു താരം മേധസ്വിയുടെ ചിത്രം പങ്കുവെച്ചത്. സോഷ്യല്‍ മീഡിയയില്‍ സജീവമായ ദീപന്‍ പങ്കുവെക്കുന്ന വിശേഷങ്ങളെല്ലാം ക്ഷണനേരം കൊണ്ടാണ് ശ്രദ്ധ നേടാറുള്ളത്. പൊതുവെ അറേഞ്ച് മാര്യേജ് എന്നാണ് പറയാറുള്ളതെങ്കിലും തങ്ങള്‍ക്കിടയില്‍ മുന്‍പേ പ്രണയമുണ്ടായിരുന്നുവെന്ന് താരം പറഞ്ഞിരുന്നു.

ഉറക്കം പോയി

മകള്‍ വന്നതോടെ ജീവിതത്തില്‍ ചില മാറ്റങ്ങള്‍ സംഭവിച്ചതായി ഇരുവരും പറയുന്നു. അതോടെ ഉറക്കത്തില്‍ ചില മാറ്റങ്ങളൊക്കെ വന്നിരുന്നതായി ദീപന്‍ പറയുന്നു. ഇതാദ്യമായാണ് മകളെ ഒരു വീഡിയോയില്‍ കാണിക്കുന്നതെന്നും താരം പറയുന്നു. പുലര്‍ച്ചെയാണ് പലപ്പോഴും ഉറങ്ങാറുള്ളത്. ഒന്നൊന്നര പണിയാണ് മകള്‍ തനിക്കും മായയ്ക്കും തന്നുകൊണ്ടിരിക്കുന്നത്. സിനിമകളൊക്കെ ഡൗണ്‍ലോഡ് ചെയ്തുകണ്ട് പുലര്‍ച്ചെയാണ് ഉറങ്ങുന്നത്. അമ്പലത്തില്‍ പോവുന്നതൊക്കെ വൈകുന്നേരത്തേക്ക് മാറ്റിയെന്നും താരം പറയുന്നു.

മായയെ കണ്ടുമുട്ടിയത്

ഫിലിം അക്കാദമിയില്‍ ജോലി ചെയ്തിരുന്ന കാലത്താണ് മായയെ ആദ്യമായി കണ്ടതെന്ന് ദീപന്‍ പറയുന്നു. മള്‍ട്ടിമീഡിയ കഴിഞ്ഞ് അവിടെ ജോലി അന്വേഷിച്ച് വന്നതായിരുന്നു മായ. അന്ന് മായയെ ഇന്റര്‍വ്യൂ ചെയ്തത് താനായിരുന്നു. സെല്‍ഫ് ഇന്‍ഡ്രൊടക്ഷനില്‍ മായ വിറച്ചിരുന്നു. അതിനാല്‍ത്തന്നെ ആ കുട്ടിയെ ജോലിക്കെടുത്താല്‍ ശരിയാവുമോയെന്ന ആശങ്കയുണ്ടായിരുന്നു. പിന്നീട് ഇരുടെയോ റെക്കമന്റേഷനിലാണ് മായ അവിടെ ജോലിക്കെത്തിയത്. സുരാജ് വെഞ്ഞാറമൂടിന്റെ ഭാര്യയുടെ ഫസ്റ്റ് കസിനാണ് മായയെന്നും ദീപന്‍ പറയുന്നു.

അവരോടാണ് പറഞ്ഞത്

ഒപ്പം പ്രവര്‍ത്തിക്കുന്നവരോടാണ് മായ തനിക്ക് ദീപനെ ഇഷ്ടമാണെന്ന് പറഞ്ഞത്. തന്നോട് നേരിട്ട് പറഞ്ഞിരുന്നില്ല. എന്നാല്‍ അവരെല്ലാം തന്റേയും അടുത്ത സുഹൃത്തുക്കളായിരുന്നു. പിന്നീട് മായയുടെ വീട്ടിലേക്ക് പ്രൊപ്പോസലുമായി പോവുകയായിരുന്നു. അമ്മയെ കാണാന്‍ ആശുപത്രിയിലേക്ക് മായ വന്നിരുന്നു. അമ്മയ്ക്കും മായയെ ഇഷ്ടമായിരുന്നു. തന്നെ സഹിക്കാന്‍ ഈ കുട്ടിക്കേ കഴിയുള്ളൂവെന്ന് അന്നേ തോന്നിയിരുന്നുവെന്നും ദീപന്‍ പറയുന്നു.