അടിച്ച് പിരിഞ്ഞ അവസ്ഥ എത്തി, അങ്ങനെ ബ്രേക്കപ്പും പറഞ്ഞു; പ്രണയത്തിനിടയിലെ വഴക്കിനെ പറ്റി ദുര്‍ഗയും അര്‍ജുനും

വിവാഹത്തിന് ശേഷം അഭിമുഖങ്ങളില്‍ ഞങ്ങളുടെ പ്രണയകഥ പറയുമ്പോള്‍ വീട്ടുകാര്‍ ഞെട്ടുകയാണ്. ങേ നിങ്ങള്‍ അങ്ങനെയായിരുന്നോ ഇങ്ങനെയായിരുന്നോ എന്നൊക്കെയാണ് അവര്‍ ചോദിക്കുന്നത്. ഒരോ തവണയും പുതിയ പുതിയ കഥകളാണ് പുറത്ത് വരുന്നതെന്ന് ദുര്‍ഗ തമാശരൂപേണ പറയുന്നു. ഇടക്കാലത്ത് ഞങ്ങള്‍ രണ്ടാളും വഴക്ക് കൂടി ബ്രേക്കപ്പ് ആവുന്ന അവസ്ഥയിലേക്ക് വരെ എത്തി. ഏകദേശം പിരിഞ്ഞ് അങ്ങേയറ്റം വരെ എത്തിയെന്ന് കരുതിയതാണ്.

പക്ഷേ വീണ്ടും ഞങ്ങള്‍ പ്രണയത്തിലേക്ക് തന്നെ തിരിച്ച് വരികയായിരുന്നു. ആദ്യം സോറി പറഞ്ഞത് ഞാനാണെന്ന് ദുര്‍ഗ പറയുന്നു. അര്‍ജുന്‍ കാണുന്നത് പോലെയല്ല. ദേഷ്യം വന്നിട്ട് കട്ടയ്ക്ക് നില്‍ക്കുകയായിരുന്നു. കാരണം ബ്രേക്കപ്പ് എന്ന് പറഞ്ഞത് ഞാനാണ്. അന്ന് നടന്ന സംഭവത്തെ കുറിച്ച് ദുര്‍ഗ പറഞ്ഞതിങ്ങനെയാണ്..

'ഞങ്ങള്‍ക്കിടയില്‍ വലിയൊരു വഴക്ക് നടന്നു. പതിനഞ്ച് ദിവസത്തോളം മിണ്ടാതെ നടന്നു. ആ വഴക്ക് എന്താവുമെന്ന് അറിയാനായി ഞാന്‍ അങ്ങോട്ടേക്ക് നമുക്ക് ബ്രേക്കപ്പ് ആവാമെന്ന് മെസേജ് അയച്ചു. ഞാനത് വെറുതേ പറഞ്ഞതായിരുന്നു. പക്ഷേ പുള്ളി അതങ്ങ് സ്വീകരിച്ചുവെന്ന്' ദുര്‍ഗ പറയുന്നു.

സ്വതന്ത്ര്യദിനത്തിന്റെ തലേദിവസം വളരെ ലേറ്റായിട്ടാണ് ദുര്‍ഗ ബ്രേക്കപ്പിനെ കുറിച്ചുള്ള മെസേജ് അയക്കുന്നത്. പിറ്റേ ദിവസം രാവിലെയാണ് ഞാനത് കാണുന്നത്. അതിന് മറുപടിയായി ഹാപ്പി ഇന്‍ഡിപെന്‍ഡന്‍സ് ഡേ എന്നുള്ള മെസേജ് കൊടുത്തുവെന്ന്' അര്‍ജുന്‍ കൂട്ടിച്ചേര്‍ത്തു.

രാത്രിയില്‍ ഞാന്‍ അര്‍ജുന് മെസേജ് അയച്ചെങ്കിലും അതിന് മറുപടി തന്നില്ല. അതോടെ പുള്ളിക്കാരനും ബ്രേക്കപ്പ് തന്നെയാവും ആഗ്രഹിക്കുന്നതെന്ന തോന്നല്‍ എനിക്ക് വന്നു. അങ്ങനെയാണ് ബ്രേക്കപ്പ് എന്ന മെസേജ് അയക്കുന്നത്. പെട്ടെന്ന് എനിക്ക് ഭയങ്കര ഡിപ്രഷനായി. കുറച്ച് ദിവസം അതേ അവസ്ഥയിലായി. ഇതോടെ അനിയനെയും കൂട്ടി ട്രിപ്പ് എന്ന് പറഞ്ഞ് പോയി. പക്ഷേ അവിടെ പോയിട്ടും ഫുള്‍ കരച്ചിലായിരുന്നുവെന്ന് ദുര്‍ഗ പറയുന്നു.