മായാനദിയിലെ അപര്‍ണയിൽ കണ്ടത് എന്റെ ജീവിതം, സിനിമ മോഹത്തെ കുറിച്ച് വെളിപ്പെടുത്തി നടി

മായാനദിയിലെ പല രംഗങ്ങളിലും തന്റെ ജീവിതം കണ്ടിട്ടുണ്ടെന്ന് താരം പറഞ്ഞു. ചിത്രത്തിൽ ഒരു സംവിധായകൻ ഐശ്വര്യയെ വിളിച്ച് ഒരു റോളുണ്ടെന്ന് പറയുന്ന രംഗമുണ്ട്. അത് ചെയ്യുന്നോ എന്ന്?. അതുപോലെയൊക്കെ ജീവിതത്തിൽ അനുഭവിച്ച ആളാണ് താൻ. സിനിമയിലുള്ള ആരുമായും ബന്ധമില്ലാതെ സിനിമയിൽ എത്തുന്നവരുടെ അവസ്ഥ ഇതു തന്നെയാണ്. ശ്വേത പറഞ്ഞു. സിനിമയുമായി ഒരു ബന്ധവുമില്ലാത്ത കുടുംബമാണ് തന്റേത്. അങ്ങനെയുളള ഒരാളിന് സിനിമയിൽ എത്തണമെങ്കിൽ ഒരുപാട് പ്രയത്നിക്കേണ്ടി വരും. അങ്ങനെയൊരു പോരാട്ടത്തിൽ തന്നെയായിരുന്നു താനും.

മായാനദിയിൽ താനും

മായാനദിയിൽ ശ്വേതയും മുഖം കാണിച്ചിട്ടുണ്ട്. ഐശ്വര്യയുടെ ഇൻട്രോ സീനിലെ ഒരു ഓഡിഷനിൽ. അതിൽ ഏതാനും സെക്കന്റുകൾ നേരത്തേയ്ക്ക് താനും സ്ക്രീനിൽ വന്നു പോകുന്നുണ്ട്. ആദ്യം കാണിക്കുന്ന ഇൻട്രോ വീഡിയോയിൽ താനുമുണ്ട്. അതിന് പകുതി ദിവസത്തെ ഷൂട്ടിങ്ങ് മാത്രമേ വേണ്ടി വന്നുള്ളൂ. കൂടാതെ കുമ്പളങ്ങിയുടെ ഓഡീഷനിൽ താനും പങ്കെടുത്തിരുന്നു. രണ്ട് മൂന്ന് റൗഡുകൾ കഴിഞ്ഞതായിരുന്നു.

രൺവീർസിങ്ങിനോടൊപ്പമുളള സെൽഫി സമൂഹ മാധ്യമങ്ങളിൽ വൈറലായതോടെയാണ് 83 ലെ ശ്വേതയുടെ റോളിനെ കുറിച്ച് പുറം ലോകം അറിഞ്ഞത്. ദീപിക നായികയായി എത്തുന്ന ചിത്രത്തിൽ ക്യാരക്ടർ റോളിലാണ് നടി എത്തുന്നത്. സൗത്തിന്റെ ലേഡിയുടെ കഥാപാത്രമാണ്. പരമ്പരാഗതരീതിയിലുള്ള തമിഴ് പെൺകുട്ടിയെയാണ് 83 ൽ ശ്വേത അവതരിപ്പിക്കുന്നത്.

ദീപക് എന്ന കാസ്റ്റ് ഡയറക്ടർ വഴിയാണ് ബോളിവുഡ് കാസ്റ്റ്ഡയറക്ടറായ മുകേഷ് എന്നെ കോൺടാക്റ്റ് ചെയ്യുന്നത്. ദീപക് ഒരു വീഡിയോ അയക്കാൻ ആവശ്യപ്പെട്ടു. തുടർന്ന് അയക്കുകയും ചെയ്തിരുന്നു അപ്പോൾ ചിത്രത്തിൽ സെലക്ടായി എന്ന് അറിയിച്ചു കൊണ്ടുളള വിളി വന്നു. എന്നാൽ ആദ്യം ഇത് വിശ്വസിക്കാൻ തയ്യാറായില്ല. ഇത് പോലെ അവസാന നിമിഷം പല അവസരങ്ങളും നഷ്ടപ്പെട്ടിട്ടുണ്ട്. ചിത്രത്തിന്റെ പ്രൊഡക്ഷൻ ടീം എന്നെ വിളിച്ചപ്പോഴാണ് തനിയ്ക്ക് വിശ്വാസം വന്നത്. എന്നിട്ടും ഈ ചിത്രത്തിന്റെ കാര്യം ആരോടും ഞാൻ പറഞ്ഞിരുന്നില്ല. 83 ശരിയ്ക്കും ഒരു വലിയൊരു അനുഭവമായിരുന്നെന്ന് ശ്വേത അഭിമുഖത്തിൽ പറയുന്നു.