സാബുമോനും ഇന്ദ്രന്‍സിനും വന്‍വരവേല്‍പ്പ്! പോലീസുകാരുടെ മാസ്? ജനമൈത്രി ആദ്യ പ്രേക്ഷക പ്രതികരണമിങ്ങനെ

ജനമൈത്രി

ആന്‍ മരിയ കലിപ്പിലാണ്, അലമാര, അര്‍ജന്റീന ഫാന്‍സ് കാട്ടൂര്‍ക്കടവ് എന്നീ സിനിമകള്‍ക്ക് തിരക്കഥ ഒരുക്കിയ ജോണ്‍ മന്ത്രിക്കല്‍ സംവിധാനം ചെയ്യുന്ന ചിത്രമാണ് ജനമൈത്രി. വിജയ് ബാബു നിര്‍മ്മാതാവായ ഫ്രൈഡേ ഫിലിം ഹൗസ് അവതരിപ്പിക്കുന്ന പത്താമത്തെ പുതുമുഖ സംവിധായനാണ് ജോണ്‍ മന്ത്രിക്കല്‍. സൈജു കറുപ്പ്, സാബുമോന്‍, ഇന്ദ്രന്‍സ്, വിജയ് ബാബു എന്നിവരാണ് ജനമൈത്രിയിലെ കേന്ദ്രകഥാപാത്രങ്ങളെ അവതരിപ്പിക്കുന്നത്. ഇവരെല്ലാം പോലീസ് ഓഫീസറുടെ വേഷത്തിലെത്തുന്നു എന്നുള്ളതാണ്് ശ്രദ്ധേയമായ കാര്യം. അനീഷ് ഗോപാല്‍, ഉണ്ണി രാജന്‍ പി ദേവ്, സിദ്ധാര്‍ത ശിവ, സൂരജ് (കുമ്പളങ്ങി നെറ്റ്സ്), പ്രശാന്ത് തുടങ്ങിയവര്‍ മറ്റു കഥാപാത്രങ്ങളെ അവതരിപ്പിക്കുന്നു.

കോമഡി എന്റര്‍ടെയിനര്‍ ചിത്രം

കോടികളുടെ സെറ്റുകളോ സൂപ്പര്‍താര സാന്നിദ്ധ്യമോ ഒന്നും തന്നെ ഇല്ലെകിലും കണ്ടിരിക്കാവുന്ന രസകരമായ ഒരു കോമഡി എന്റെര്‍റ്റൈനെര്‍ ചിത്രമാണ് ജനമൈത്രി. ആദ്യ മുതല്‍ അവസാന വരെ ചെറുതും വലുതുമായ നര്‍മ്മരംഗങ്ങളില്‍ സമൃദ്ധമായിട്ടാണ് ചിത്രമൊരുക്കിയിരിക്കുന്നത്. എല്ലാ പ്രേക്ഷകര്‍ക്കും ഒരുപോലെ ഒന്നിച്ചിരുന്ന് രണ്ട് മണിക്കൂര്‍ ആസ്വദിക്കാന്‍ പറ്റുന്ന ചിത്രമാണ് ജനമൈത്രി. മലയാള സിനിമയില്‍ അധികം കണ്ടിട്ടില്ലാത്ത ഒരു കഥാപരിസരമാണ് ചിത്രത്തിന് ആസ്പദമാവുന്നത്. ജോണ്‍ മന്ത്രിക്കലും ജെയിംസ് സെബാസ്റ്റ്യനും ചേര്‍ന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.

അണിയറ പ്രവര്‍ത്തകര്‍

വിഷ്ണു നാരായണന്‍ നമ്പൂതിരിയാണ് ഛായാഗ്രാഹണം. ഷാന്‍ റഹ്മാന്റെ സംഗീതവും മനു മഞ്ജിത്തിന്റെ വരികളും പതിവു പോലെ തന്നെ മികച്ചു നിന്നു. സംസ്ഥാന അവാര്‍ഡ് ജേതാവായ ലിജോ പോളിന്റെ എഡിറ്റിങ്ങും പ്രത്യേക പരാമര്‍ശം അര്‍ഹിക്കുന്നു. സംസ്ഥാന അവാര്‍ഡ് ജേതാക്കളായ സ്റ്റെഫി സേവ്യര്‍ കോസ്റ്ററ്യൂംസും, റോണക്സ് മേക്കപ്പും നിര്‍വ്വഹിക്കുന്നു.