ജയറാം വാര്‍ത്താ അവതാരകനായപ്പോള്‍ മമ്മൂട്ടി പറഞ്ഞത്, മെഗാസ്റ്റാറിനെ കുറിച്ച് നടന്‍

കുട്ടിക്കാലം മുതല്‍ ശബ്ദം വിറ്റ് ജീവിച്ചിട്ടുളള ഒരാളാണ് താന്‍ എന്ന് ജയറാം പറയുന്നു. ഞാന്‍ പെട്ടെന്ന് അതാണ് ഓര്‍ത്തുപോയത്. നേഴ്‌സറി സ്‌കൂളില്‍ പഠിക്കുന്ന സമയം തൊട്ട് പാട്ട് പാടിയും താരങ്ങളെ അനുകരിച്ചും സമ്മാനങ്ങള്‍ നേടിയിട്ടുണ്ട്. മിമിക്രി രംഗത്തെ അനുഭവം പില്‍ക്കാലത്ത് എന്നെ ഏറെ സഹായിച്ചിട്ടുണ്ട്. അന്ന് വാര്‍ത്ത വായിച്ചപ്പോള്‍ ഞാന്‍ എത് സ്‌റ്റൈലില്‍ പറയണമെന്നതില്‍ സംശയമുണ്ടായിരുന്നു.

കാരണം വാര്‍ത്ത വായിക്കുന്നത് നമ്മള്‍ സാധാരണ വര്‍ത്തമാനം പറയുന്നത് പോലെ പറഞ്ഞിട്ട് കാര്യമില്ല. അതിന് ഒരു ഒഴുക്ക് ഉണ്ടാവണം, പെട്ടെന്ന് ജനങ്ങളിലേക്ക് എത്തണം. അതിന് ക്ലാരിറ്റി ഉണ്ടാവണം. അതുകൊണ്ടാണ് ആ ഒരു സ്‌റ്റൈലില്‍ അന്ന് പറഞ്ഞത്, ജയറാം ഓര്‍ത്തെടുത്തു. ജീവിതത്തിലെ വലിയൊരു അനുഭവമായിരുന്നു അത് എന്നും താരം പറയുന്നു.

വാര്‍ത്ത വായിച്ചത് കണ്ട് മമ്മൂക്ക വിളിച്ച് പറഞ്ഞ കാര്യവും ജയറാം പറഞ്ഞു. ഒരിക്കലും ജീവിതത്തില് നമ്മള് ഇത്രയും പെര്‍ഫെക്ട് ആവരുതെന്ന് എന്നാണ് മമ്മൂക്ക പറഞ്ഞത്. നിനക്ക് ഒരു തെറ്റ് എങ്കിലും മനപൂര്‍വ്വം വരുത്താമായിരുന്നു. അതെന്താ അതുപോലും നീ ചെയ്യാത്തത് എന്ന് മമ്മൂക്ക ചോദിച്ചു. അതാണ് വാര്‍ത്ത വായിച്ചതിന് എനിക്ക് കിട്ടിയ എറ്റവും വലിയ സമ്മാനം.

അന്ന് വാര്‍ത്ത വായിക്കാന്‍ ഇരുന്ന സമയത്താണ് പിജെ ജോസഫ് രാജിവെച്ച ന്യൂസ് വരുന്നതെന്നും ജയറാം പറഞ്ഞു. അന്ന് കുറച്ച് ടെന്‍ഷനുണ്ടായിരുന്നു. ആ സമയത്ത് സത്യം പറഞ്ഞാല്‍ ആരായാലും ഒന്ന് ഞെട്ടിപ്പോവും. കേരള കോണ്‍ഗ്രസിന്‌റെ ചരിത്രം ഒകെ പേപ്പറില് എഴുതിതരുകയാണ്. ഭയങ്കരമായ ടെന്‍ഷന്‍ അന്നുണ്ടായിരുന്നു. എന്നാല്‍ അന്ന് വലിയ കുഴപ്പമില്ലാതെ അത് വായിച്ചു, ജയറാം പറഞ്ഞു.

അതേസമയം നിരവധി സ്‌റ്റേജ് ഷോകളിലും അവതാരകനായി ജയറാം എത്തിയിട്ടുണ്ട്. ഫിലിം അവാര്‍ഡ്‌സിലും മറ്റുമാണ് ജയറാം അവതാരകന്‌റെ റോളിലും എത്തിയത്. വര്‍ഷങ്ങളോളം മിമിക്രി രംഗത്ത് പ്രവര്‍ത്തിച്ച ശേഷമാണ് ജയറാം സിനിമയില്‍ വരുന്നത്. പദ്മരാജന്‍ സംവിധാനം ചെയ്ത അപരന്‍ എന്ന ചിത്രത്തിലൂടെയായിരുന്നു നടന്റെ തുടക്കം. പിന്നീട് മലയാളത്തിലെ സൂപ്പര്‍താരങ്ങളില്‍ ഒരാളായി ജയറാം മാറി. മലയാളത്തിന് പുറമെ മറ്റ് ഭാഷകളിലും ശ്രദ്ധേയ കഥാപാത്രങ്ങളെ അവതരിപ്പിച്ച് നടന്‍ തിളങ്ങി.