വീണ്ടും വിവാഹം കഴിച്ച് പ്രകാശ് രാജ്, മകന്‌റെ ആഗ്രഹം സഫലമാക്കിയ സന്തോഷം പങ്കുവെച്ച് നടന്‍

നടന്‍ വീണ്ടും വിവാഹിതനായെന്ന റിപ്പോര്‍ട്ടുകളാണ് സോഷ്യല്‍ മീഡിയയില്‍ പുറത്തുവന്നത്. എന്നാല്‍ ഈ വിവാഹത്തിന് ഒരു പ്രത്യേകതയുണ്ട്. ഭാര്യയെ തന്നെ വീണ്ടും വിവാഹം കഴിക്കുകയായിരുന്നു താരം. മകന്‌റെ ആഗ്രഹമായിരുന്നു ഇത്. പതിനൊന്നാം വിവാഹ വാര്‍ഷികത്തിലാണ് ഭാര്യ പൊനി വെര്‍മ്മയെ നടന്‍ വീണ്ടും വിവാഹം കഴിച്ചത്. മകന്‌റെ മുന്നില്‍ വെച്ചാണ് ഇരുവരും വീണ്ടും വിവാഹിതരായത്.

ഞാനും ഭാര്യയും വീണ്ടും വിവാഹിതരായി എന്ന് പറഞ്ഞുകൊണ്ടാണ് പ്രകാശ് രാജിന്റെ ട്വീറ്റ് ആരംഭിക്കുന്നത്. മകന്‌റെ നിര്‍ബന്ധമായിരുന്നു അച്ഛനും അമ്മയും വിവാഹം കഴിക്കുന്നത് കാണണം എന്നത്, നടന്‍ കുറിച്ചു. വിവാഹ വാര്‍ഷിക ദിനത്തില്‍ എടുത്ത മനോഹര ചിത്രങ്ങളും പ്രകാശ് രാജ് സോഷ്യല്‍ മീഡിയയില്‍ പോസ്റ്റ് ചെയ്തിട്ടുണ്ട്. ആദ്യ വിവാഹത്തിലെ മക്കളായ മേഘ്‌ന, പുജ തുടങ്ങിയവരും അച്ഛന്‌റെ വിവാഹ വാര്‍ഷിക ആഘോഷത്തില്‍ പങ്കെടുക്കാനായി എത്തി.

ബോളിവുഡ് ഡാന്‍സ് കൊറിയോഗ്രാഫറായ പൊനി വെര്‍മ്മയെ 2010ലാണ് പ്രകാശ് രാജ് ജീവിത സഖിയാക്കിയത്. ആദ്യ ഭാര്യ ലളിത കുമാരിയുമായി വേര്‍പിരിഞ്ഞ ശേഷമായിരുന്നു നടന്‍ രണ്ടാം വിവാഹം കഴിച്ചത്. 2015ലാണ് പ്രകാശ് രാജിനും പൊനി വെര്‍മ്മയ്ക്കും മകന്‍ വേദാന്ത് ജനിച്ചത്. കുടുംബത്തിനൊപ്പമുളള വിശേഷങ്ങള്‍ വളരെ അപൂര്‍വ്വമായിട്ടാണ് നടന്‍ പങ്കുവെച്ചിട്ടുളളത്.

കുടുംബത്തിനൊപ്പമുളള വിശേഷങ്ങള്‍ വളരെ അപൂര്‍വ്വമായിട്ടാണ് നടന്‍ പങ്കുവെച്ചിട്ടുളളത്. നിലവില്‍ കൈനിറയെ ചിത്രങ്ങളാണ് നടന്‌റെതായി അണിയറയില്‍ ഒരുങ്ങുന്നത്. മലയാളത്തില്‍ ഒരിടവേളയ്ക്ക് ശേഷം പട എന്ന ചിത്രത്തിലൂടെ പ്രകാശ് രാജ് എത്തുന്നു. കുഞ്ചാക്കോ ബോബന്‍, ജോജു ജോര്‍ജ്ജ്, വിനായകന്‍ തുടങ്ങിയവര്‍ മുഖ്യ വേഷങ്ങളില്‍ എത്തുന്ന ചിത്രത്തില്‍ ഒരു പ്രധാന കഥാപാത്രമായാണ് പ്രകാശ് രാജ് എത്തുന്നത്.

Recommended Video

Interview with Vijay Babu and Rojin Thomas | Home Movie | Indrans | FilmiBeat Malayalam

പടയ്ക്ക് പുറമെ കെജിഎഫ് 2ഉം പ്രകാശ് രാജിന്‌റെ പുതിയ ചിത്രമാണ്. കൂടാതെ അല്ലു അര്‍ജുന്‌റെ പുഷ്പ, രജനീകാന്തിന്‌റെ അണ്ണാത്തെ, എനിമി തുടങ്ങിയ സിനിമകളിലും നടന്‍ എത്തും. ദേശീയ, സംസ്ഥാന പുരസ്‌കാരങ്ങള്‍ ഉള്‍പ്പെടെ നിരവധി പുരസ്‌കാരങ്ങള്‍ പ്രകാശ് രാജ് തന്‌റെ കരിയറില്‍ നേടിയിട്ടുണ്ട്. പ്രിയദര്‍ശന്‍ സംവിധാനം ചെയ്ത കാഞ്ചീവരം എന്ന ചിത്രത്തിലൂടെയാണ് മികച്ച നടനുളള ദേശീയ ചലച്ചിത്ര പുരസ്‌കാരം പ്രകാശ് രാജ് നേടിയത്. കൂടാതെ ഇരുവര്‍, അന്തപുരം, ദയ, പുട്ടക്കന ഹൈവേ തുടങ്ങിയ സിനിമകളിലെ പ്രകടനത്തിനും പ്രകാശ് രാജിന് ദേശീയ പുരസ്‌കാരം ലഭിച്ചു.