സാഹോയുടെ ബജറ്റ് ഉണ്ടെങ്കില്‍ അമ്പതു മലയാളം പടങ്ങള്‍ ചെയ്യാം! തുറന്ന് പറഞ്ഞ് ലാല്‍

സാഹോ

ബാഹുബലിക്ക് ശേഷം ഒരു ആക്ഷന്‍ എന്റര്‍ടെയിനറുമായിട്ടാണ് ഇത്തവണ പ്രഭാസ് എത്തുന്നത്. യുവി ക്രിയേഷന്‍സ് നിര്‍മ്മിക്കുന്ന ചിത്രം തെലുങ്കിനു പുറമെ മലയാളം,തമിഴ്,ഹിന്ദി ഭാഷകളിലും മൊഴിമാറ്റിയെത്തുന്നുണ്ട്. ബാഹുബലിയില്‍ നിന്നും തീര്‍ത്തും വ്യത്യസ്തമായ ഒരു റോളിലാണ് ചിത്രത്തില്‍ പ്രഭാസ് എത്തുന്നത്. ശ്രദ്ധ കപൂര്‍ നായികാ വേഷത്തില്‍ എത്തുന്ന ചിത്രത്തില്‍ വമ്പന്‍ താരനിരയാണ് അണിനിരക്കുന്നത്. പ്രഭാസിന്റെ കിടിലന് ആക്ഷന്‍ രംഗങ്ങളും പഞ്ച് ഡയലോഗുകളുമായിരിക്കും ചിത്രത്തിന്റെ മുഖ്യ ആകര്‍ഷണമാവുക.

ചിത്രത്തെക്കുറിച്ച് ലാല്‍

സാഹോയുടെ മൊത്തം ബഡ്ജറ്റ് ഉണ്ടെങ്കില്‍ അമ്പത് മലയാള സിനിമകള്‍ നിര്‍മ്മിക്കാമെന്നായിരുന്നു അടുത്തിടെ ലാല്‍ പറഞ്ഞിരുന്നത്. ഒരുപാട് നാളായി ഷൂട്ട് ചെയ്യുന്ന ചിത്രമാണ് സാഹോയെന്നും തന്റെ കഴിഞ്ഞ രണ്ടു വെഡ്ഡിംഗ് ആനിവേഴ്‌സറി ആഘോഷിച്ചത് ചിത്രത്തിന്റെ സെറ്റില്‍ നിന്നാണെന്നും ലാല്‍ പറയുന്നു. സാഹോയുടെ സെറ്റില്‍ ആണെന്ന് പറയുമ്പോള്‍ എത്ര വലുതാണ് ഇതിന്റെ ഷൂട്ടിംഗ് ഷെഡ്യൂളെന്ന് മനസിലാക്കാമല്ലോ എന്നും ലാല്‍ ചോദിക്കുന്നു

ലാല്‍ പറഞ്ഞത്

താന്‍ അഭിനയിച്ചതും സംവിധാനം ചെയ്തിട്ടുളളതുമായ ചിത്രങ്ങളെക്കുറിച്ച് അറിയാവുന്നവര്‍ വളരയധികം ബഹുമാനത്തോടായാണ് തന്നോട് ഇടപെടാറുളളതെന്നും ലാല്‍ പറയുന്നു. സംവിധായകന്‍ സുജിത്ത് എന്ന ചെറുപ്പക്കാരനുമായി ജോലി ചെയ്യാന്‍ വളരെ ഈസിയാണെന്നും അതുപോലെ പ്രഭാസും വളരെ സിമ്പിള്‍ ആയ മനുഷ്യന്‍ ആണെന്നും ലാല്‍ പറഞ്ഞു. ശ്രദ്ധാ കപൂറാണ് സാഹോയില്‍ പ്രഭാസിന്റെ നായികാ വേഷത്തിലെത്തുന്നത്.

റിലീസ്

അടുത്ത വര്‍ഷം ചിത്രത്തിന്റെ റിലീസ് ഉണ്ടാവുമെന്നാണ് എല്ലാവരും പ്രതീക്ഷിക്കുന്നത്. ജാക്കി ഷെറോഫ്,നീല്‍ നിതിന്‍ മുകേഷ്,അരുണ്‍ വിജയ്,മന്ദിര ബേദി,ചങ്കി പാണ്ഡെ,ടിനു ആനന്ദ്, മഹേഷ് മഞ്ജരേക്കര്‍ തുടങ്ങിയവരും ചിത്രത്തില്‍ പ്രധാന വേഷങ്ങളിലെത്തുന്നുണ്ട്. നൂറ്റി അമ്പത് കോടി ബഡ്ജറ്റിലാണ് ചിത്രമൊരുങ്ങുന്നതെന്നാണ് നേരത്തെ റിപ്പോര്‍ട്ടുകള്‍ വന്നിരുന്നത്. ശങ്കര്‍ എഹ്‌സാന്‍ ലോയ് ആണ് ചിത്രത്തിനു വേണ്ടി സംഗീതമൊരുക്കുന്നത്.

വമ്പന്‍ റിലീസ്

ആര്‍ മധി ചായാഗ്രഹണം നിര്‍വ്വഹിക്കുന്ന ചിത്രത്തിന് ശ്രീകര്‍ പ്രസാദ് എഡിറ്റിംങ് നിര്‍വ്വഹിക്കുന്നു. യുവി ക്രിയേഷന്‍സും ടി സീരിസും ചേര്‍ന്നാണ് ചിത്രം നിര്‍മ്മിച്ചിരിക്കുന്നത്. ചിത്രത്തിന്റെതായി പുറത്തിറങ്ങിയ ടീസറിനും മേക്കിങ്ങ് വീഡിയോക്കുമെല്ലാം മികച്ച സ്വീകാര്യതയായിരുന്നു സമൂഹ മാധ്യമങ്ങളില്‍ ലഭിച്ചിരുന്നത്. ബാഹുബലിക്ക് ശേഷമുളള പ്രഭാസിന്റെ വമ്പന്‍ റിലീസ് ചിത്രം തന്നെയായിരിക്കും സഹോയെന്നാണ് അറിയുന്നത്