ആ ഒരൊറ്റ കാര്യം കൊണ്ടാണ് മഞ്ജു വാര്യരെ ഇഷ്ടപ്പെട്ടത്; ഏറെ വേദന തീര്‍ത്ത് ജോണ്‍ പോളിന്റെ വാക്കുകള്‍

മഞ്ജുവിന്റെ വാക്കുകള്‍ ഇങ്ങനെ...' യാത്ര, മിഴിനീര്‍പൂവുകള്‍, ഇനിയും കഥ തുടരും, വിടപറയും മുമ്പേ, ഞാന്‍ ഞാന്‍ മാത്രം, ഓര്‍മയ്ക്കായി...
ഈ നിമിഷത്തിന് തലവാചകമായേക്കാവുന്ന എത്രയോ സിനിമകള്‍!കുറച്ചുദിവസം മുമ്പ് ജോണ്‍പോള്‍ സാറിനെ ആശുപത്രിയില്‍ പോയി കണ്ടിരുന്നു. എന്നെ കാണണമെന്ന് അദ്ദേഹം ആഗ്രഹം പ്രകടിപ്പിച്ചതറിഞ്ഞായിരുന്നു അത്. ആരോഗ്യത്തോടെ തിരിച്ചുവരുമെന്നും ഒരുമിച്ച് ഒരു സിനിമ ചെയ്യണമെന്നുമാണ് അദ്ദേഹം പറഞ്ഞത്. അവശതകള്‍ക്കപ്പുറമുള്ള കരളുറപ്പുണ്ടായിരുന്നു ആ വാക്കുകള്‍ക്ക്. അത് സത്യമാകുമെന്നുതന്നെയാണ് അല്പം മുമ്പുവരെ ഞാനും വിശ്വസിച്ചിരുന്നത്. യാത്രാമൊഴി,'' മഞ്ജു വാര്യര്‍ കുറിച്ചു.

തൂലികയിലൂടെ മലയാള സിനിമയില്‍ ഒരുപാട് നായികമാര്‍ക്ക് ജോണ്‍ പോള്‍ ജീവിന്‍ കൊടുത്തിട്ടുണ്ട്. എന്നാല്‍ അദ്ദേഹത്തിന്റെ എക്കാലത്തേയും പ്രിയപ്പെട്ട നായികമാരില്‍ ഒരാളായിരുന്നു മഞ്ജു വാര്യര്‍. മുന്‍പ് ഒരിക്കല്‍ മാധ്യമത്തിന് നല്‍കിയ അഭിമുഖത്തില്‍ കന്മദത്തിലെ മഞ്ജുവിന്റെ പ്രകടനത്തെ കുറിച്ച് അദ്ദേഹം വാചാലനായിരുന്നു. ഒരിക്കലും മറക്കാന്‍ കഴിയില്ലെന്നായിരുന്നു അദ്ദേഹം പറഞ്ഞത്. ജോണ്‍ പോളിന്റെ വിയോഗത്തെ തുടര്‍ന്ന് ആ പഴയ അഭിമുഖ വീണ്ടും സോഷ്യല്‍ മീഡിയയില്‍ ഇടംപിടിക്കുകയാണ്.

ജോണ്‍ പോളിന്റെ വാക്കുകള്‍ ഇങ്ങനെ... 'ലോഹിതദാസ് തിരക്കഥയെഴുതി സംവിധാനം ചെയ്ത ചിത്രമായ കന്മദം തനിക്കേറെ പ്രിയപ്പെട്ട സിനിമയാണെന്നാണ് ജോണ്‍ പോള്‍ പറഞ്ഞത്. പ്രണവം പിക്ചേഴ്സിന്റെ ബാനറില്‍ മോഹന്‍ലാലായിരുന്നു ഈ ചിത്രം നിര്‍മ്മിച്ചത്. മനുഷ്യ ജന്മങ്ങളിലെ വിരുദ്ധ ചേര്‍ച്ചകളേയും അവയ്ക്കിടയിലും പാരസ്പര്യം വീണ്ടെടുക്കാന്‍ വേണ്ടിയുള്ള നിഷ്ഫലതയേയും എല്ലാം ശക്തമായ ഭാഷയിലൂടെ വരച്ചിട്ട ചിത്രമാണ് കന്മദമെന്നാണ്' ജോണ്‍ പോള്‍ പറഞ്ഞത്.

'അതില്‍ മഞ്ജു അഭിനയിച്ച കഥാപാത്രമുണ്ട് ഭാനു, മഞ്ജുവിന്റെ അഭിനയത്തിലെ മിതത്വവും എന്നാല്‍ കാര്യത്തോടടുക്കുമ്പോള്‍ അഗ്‌നി പോലെ കണ്ണുകളില്‍ നിന്നും തെറിച്ചുവരുന്ന പ്രകാശം തീഷ്ണമാണ്. ചില സമയത്ത് അലിവും, പ്രണയവും പകയുമാണ് അതില്‍ പ്രതിഫലിക്കുന്നത്. ആ കണ്ണുകളും മുഖവും ഉപയോഗിച്ച് ആ കഥാപാത്രത്തെ അനായാസേന അങ്ങേയറ്റം മനോഹരമാക്കുകയായിരുന്നു' മഞ്ജുവെന്ന് അദ്ദേഹം കൂട്ടിച്ചേര്‍ത്തു.

ലോഹിതദാസ് എഴുതിയ കഥാപാത്രത്തെ അങ്ങയറ്റം ഗംഭീരമായി അവതരിപ്പിച്ചെന്നും ജോണ്‍ പോള്‍ അന്ന് അഭിമുഖത്തില്‍ പറഞ്ഞു.
മഞ്ജുവിന്റെ നെറുകയില്‍ കലയുടെ പരദേവതയുടെ മൂന്ന് വിരലുകള്‍ നിര്‍ബാധം തഴുകി ഉണര്‍ന്നിട്ടുണ്ട്. കഥാപാത്രത്തിന്റെ നീറ്റലില്‍ സ്വയം നീറിക്കൊണ്ട് ഒരു അഗ്‌നിനാളമായി തിരശീലയില്‍ ജ്വലിച്ച് നില്‍ക്കുന്ന ആ അഭിനയാവിഷ്‌ക്കാരത്തിന്റെ പേരിലാണ് ഞാന്‍ മഞ്ജുവിനെ ഇഷ്ടപ്പെടുന്നത്. അതൊരിക്കലും മറക്കാനാവില്ലെന്ന് പറഞ്ഞ് കൊണ്ടായുരുന്നു അന്ന് നടിയെ കുറിച്ചുള്ള വാക്കുകള്‍ അവസാനിപ്പിച്ചത്.