ആ സമയത്ത് കടുത്ത മാനസിക സംഘര്‍ഷത്തിലൂടെ കടന്നുപോയി, അനുഭവം പങ്കുവെച്ച് അപ്പാനി ശരത്

മാതൃഭൂമിക്ക് നല്‍കിയ അഭിമുഖത്തിലാണ് നടന്‍ മനസുതുറന്നത്. ലോക്ഡൗണില്‍ സിനിമ മൊത്തം നിശ്ചലമായപ്പോള്‍ താനും കടുത്ത മാനസിക സംഘര്‍ഷത്തിലൂടെയാണ് കടന്നുപോയതെന്ന് അപ്പാനി ശരത് പറയുന്നു. ചെയ്തിരുന്ന സിനിമകളെല്ലാം മുടങ്ങിപ്പോയി. എന്ത് ചെയ്യണമെന്ന് അറിയില്ല. വിഷാദത്തിന്‌റെ വക്കിലെത്തി എന്ന് പറയാം. അപ്പോഴെല്ലാം എനിക്ക് പൂര്‍ണ പിന്തുണയുമായി നിന്നത് ഭാര്യ രേഷ്മയാണ്.

പിന്നെ എന്നെ തേടി ഏതാനും പ്രോജക്ടുകള്‍ വന്നു. തമിഴിലും നല്ല വേഷങ്ങള്‍ ലഭിച്ചു. ഇപ്പോഴത്തെ സാഹചര്യത്തില്‍ ഷൂട്ടിംഗ് മുടങ്ങിയെങ്കിലും അതെല്ലാം കൂടുതല്‍ ഇളവുകള്‍ വരുന്നതോടെ പുനരാരംഭിക്കും. എനിക്ക് ടെന്‍ഷനടിക്കാതെ പറ്റില്ലല്ലോ. ഞാന്‍ സിനിമയില്‍ വലിയ സ്ഥാനത്ത് എത്തി എന്നൊന്നും കരുതുന്നില്ല. സിനിമയില്‍ വരുന്നതിന് മുന്‍പ് അനുഭവിച്ചതിനേക്കാള്‍ നാലിരട്ടി സ്ട്രഗിള്‍ ഇപ്പോള്‍ അനുഭവിക്കുന്നുണ്ട്, നടന്‍ പറഞ്ഞു.

ഇനിയും സിനിമകള്‍ ചെയ്യണം, നല്ല സിനിമയുടെ ഭാഗമാകണം എന്ന ആഗ്രഹവും അപ്പാനി ശരത് പങ്കുവെച്ചു. അതിന് നന്നായി ഞാന്‍ പെര്‍ഫോം ചെയ്യണം. കാരണം അഭിനയ മോഹവുമായി സിനിമയില്‍ ദിനംപ്രതി പുതിയ ആളുകള്‍ വന്നുകൊണ്ടിരിക്കുകയാണ്. ഏറെ വിഷമകരമാണ് ഇവിടെ പിടിച്ചുനില്‍ക്കുക എന്നത്. നമ്മളും ആ മല്‍സരത്തിന്‌റെ ഭാഗമാണ്.

Recommended Video

Malik ഷൂട്ടിനിടയിലെ Nimishaയുടെ Video പങ്കുവെച്ച്‌ Vinay Forrt

അതുകൊണ്ട് തന്നെ കഠിനാദ്ധ്വാനം ചെയ്യുക എന്നതല്ലാതെ മറ്റൊരു വഴിയും നമുക്ക് മുന്നിലില്ല, അഭിമുഖത്തില്‍ നടന്‍ വ്യക്തമാക്കി. അതേസമയം മോണിക എന്ന വെബ് സീരിസിലൂടെ സംവിധായകനായും തുടക്കം കുറിച്ചിരിക്കുകയാണ് അപ്പാനി ശരത്. ഭാര്യ രേഷ്മയും സീരിസില്‍ അഭിനയിക്കുന്നുണ്ട്. ഭാര്യ അഭിനയരംഗത്തേക്ക് എത്തിയത് അവിചാരിതമായിട്ടാണ് എന്നും നടന്‍ പറഞ്ഞു. മാലികിലെ റോള്‍ ചര്‍ച്ചയായത് വലിയ സന്തോഷം നല്‍കിയെന്നും വേഷത്തിന്‌റെ വലുപ്പചെറുപ്പം നോക്കാറില്ലെന്നും അപ്പാനി ശരത് പറഞ്ഞു.