അവസരങ്ങള്‍ കുറഞ്ഞിട്ടില്ല, നൂറുശതമാനം ഈ സിനിമ പൃഥ്വിരാജിന്‌റേത്, കുരുതി അനുഭവം പങ്കുവെച്ച് മാമുക്കോയ

75ാമത്തെ വയസിലും ഡയലോഗ് തെറ്റിക്കാതെ ക്ഷീണമൊന്നും ഇല്ലാതെയാണ് മാമുക്കോയ സാര്‍ കഥാപാത്രത്തെ അവതരിപ്പിച്ചതെന്ന് പൃഥ്വി പറഞ്ഞു, അതേസമയം കുരുതിക്ക് ലഭിക്കുന്ന പ്രതികരണങ്ങളെ കുറിച്ച് മനോരമയ്ക്ക് നല്‍കിയ അഭിമുഖത്തില്‍ മനസുതുറന്നിരിക്കുകയാണ് മാമുക്കോയ. സിനിമ കണ്ട് ഒരുപാട് പേര്‍ വിളിക്കുന്നുണ്ടെന്ന് മാമുക്കോയ പറയുന്നു. നല്ല അഭിപ്രായം പറയുന്നുണ്ട്. അത് കേള്‍ക്കുമ്പോള്‍ സന്തോഷമുണ്ട്. വളരെ ഇഷ്ടപ്പെട്ട് ചെയ്ത കഥാപാത്രമാണ് മൂസ ഖാദറെന്നും മാമുക്കോയ പറഞ്ഞു.

തനിക്ക് കിട്ടിയതില്‍ എറ്റവും മികച്ചത് എന്ന് പറയാന്‍ പറ്റില്ല. എനിക്ക് കിട്ടിയ മികച്ച വേഷങ്ങളില്‍ ഒന്നാണ് ഇത്. പെരുമഴക്കാലത്തിലെ കഥാപാത്രം മികച്ചതായിരുന്നു. അതാണോ ഇതാണോ നല്ലത് എന്ന് പറയാന്‍ പറ്റില്ല. ഓരോന്നും ഓരോ രീതിയില്‍ മെച്ചപ്പെട്ടതാണ്‌. കുരുതി മികച്ച സിനിമയാണ്. ഇന്നത്തെ സാമൂഹിക സാഹചര്യങ്ങളോട് ചേര്‍ന്നുപോകുന്ന കഥ. കാടും മലയുമുളള ലൊക്കേഷന്‍ ആയതുകൊണ്ട് ബുദ്ധിമുട്ടൊന്നും ഉണ്ടായിട്ടില്ലെന്നും നടന്‍ പറഞ്ഞു. സിനിമ ലൊക്കേഷന്‍ അങ്ങനെ തന്നെയല്ലെ. ജോലി ചെയ്യാനാണല്ലോ പോകുന്നത്.

ബുദ്ധിമുട്ടുണ്ടെങ്കില്‍ ജോലി ചെയ്യാന്‍ കഴിയില്ലല്ലോ. സിനിമയില്‍ അവസരങ്ങള്‍ കുറഞ്ഞതായി തോന്നിയിട്ടില്ലെന്നും മാമുക്കോയ പറഞ്ഞു. കൊറോണ തുടങ്ങിയപ്പോള്‍ വന്ന ഇടവേളകളെ ഉണ്ടായിട്ടുളളൂ. ഇഷ്ടം പോലെ പടങ്ങള്‍ പെട്ടിയില്‍ കിടക്കുന്നുണ്ട്. പുതിയ തലമുറയോടൊപ്പം ഞാനുമുണ്ട്. ഇനി വരാനുളള സിനിമകളെല്ലാം പുതിയ കുട്ടികളുടെതാണ്. പൃഥ്വിരാജിനെ കുറിച്ചും അഭിമുഖത്തില്‍ മാമുക്കോയ മനസുതുറന്നു.

Recommended Video

Prithviraj’s new movie Kuruthi is a socio-political thriller | FilmiBeat Malayalam

നൂറ് ശതമാനം ഈ സിനിമ പൃഥ്വിരാജിന്‌റെത് തന്നെയാണ് എന്ന് മാമുക്കോയ പറയുന്നു. ഞങ്ങളൊക്കെ ചെന്ന് ഓരോ വേഷം ചെയ്യുന്നു എന്നല്ലാതെ വിജയത്തിന്‌റെ മുഴുവന്‍ അവകാശി അദ്ദേഹം തന്നെയാണ്. മനുഷ്യരെ അറിയുന്ന, അഭിനയം അറിയുന്ന, സിനിമ നന്നായി അറിയാവുന്ന ഒരു നല്ല വ്യക്തിയാണ് പൃഥ്വിരാജ്. ഒന്നും ചര്‍ച്ച ചെയ്യേണ്ട കാര്യം പോലും ഇല്ല, നമ്മള്‍ ഉദ്ദേശിക്കുന്നത് അദ്ദേഹത്തിന് അറിയാം. നന്നായി പഠിച്ചിട്ടാണ് ഓരോന്നും ചെയ്യുന്നത്. വെറുതെ ചാടിക്കേറി ഒന്നും ചെയ്യുന്ന ആളല്ല പൃഥ്വിരാജ്‌, അഭിമുഖത്തില്‍ മാമുക്കോയ വ്യക്തമാക്കി.

നവാഗതനായ മനു വാര്യര്‍ സംവിധാനം ചെയ്ത ചിത്രമാണ് കുരുതി. കോള്‍ഡ് കേസിന് ശേഷം മറ്റൊരു പൃഥ്വിരാജ് ചിത്രം കൂടി ആമസോണ്‍ പ്രൈമില്‍ റിലീസ് ചെയ്തു. പൃഥ്വിരാജ് പ്രൊഡക്ഷന്‍സിന്‌റെ ബാനറില്‍ സുപ്രിയ മേനോനാണ് ചിത്രം നിര്‍മ്മിച്ചത്. പൃഥ്വിരാജിനും മാമുക്കോയയ്ക്കും പുറമെ റോഷന്‍ മാത്യൂവും ചിത്രത്തില്‍ ഒരു പ്രധാന വേഷത്തില്‍ എത്തുന്നു.

ശ്രിന്ദ, മുരളി ഗോപി, ഷൈന്‍ ടോം ചാക്കോ, നസ്ലെന്‍, മണികണ്ഠന്‍, സാഗര്‍ സൂര്യ, നവാസ് വളളിക്കുന്ന് തുടങ്ങിയ താരങ്ങളാണ് സിനിമയില്‍ മറ്റ് പ്രധാന റോളുകളില്‍ എത്തുന്നത്. അഭിനന്ദന്‍ രാമാനുജം ഛായാഗഹണം നിര്‍വ്വഹിച്ച സിനിമയുടെ എഡിറ്റിംഗ് അഖിലേഷ് മോഹനാണ്. ജേക്ക്‌സ് ബിജോയ് സംഗീതവും പശ്ചാത്തല സംഗീതവും ഒരുക്കിയിരിക്കുന്നു. അനീഷ് പളള്യാലിന്‌റെ തിരക്കഥയിലാണ് ചിത്രം ഒരുങ്ങിയത്.

കൂടെ എന്ന സിനിമയ്ക്ക് ശേഷം പൃഥ്വിരാജും റോഷന്‍ മാത്യൂവും വീണ്ടും ഒന്നിച്ച ചിത്രം കൂടിയാണ് കുരുതി. മല്‍സരിച്ചുളള അഭിനയമാണ് ഇരുവരും സിനിമയില്‍ കാഴ്ചവെക്കുന്നത്. പൃഥ്വിരാജിന്‌റെ മുന്‍ചിത്രമായ കോള്‍ഡ് കേസ് സമ്മിശ്ര പ്രതികരണമാണ് നേടിയത്. എന്നാല്‍ കുരുതിക്ക് മികച്ച പ്രതികരണങ്ങള്‍ ലഭിക്കുന്നുണ്ട്. ബ്രോ ഡാഡിയാണ് പൃഥ്വിരാജിന്‌റെതായി അണിയറയില്‍ ഒരുങ്ങുന്ന എറ്റവും പുതിയ ചിത്രം.

ലൂസിഫറിന് ശേഷം നടന്‍ സംവിധാനം ചെയ്യുന്ന സിനിമയില്‍ മോഹന്‍ലാല്‍ വീണ്ടും നായക വേഷത്തില്‍ എത്തുന്നു. പൃഥ്വി, മീന, കല്യാണി പ്രിയദര്‍ശന്‍, കനിഹ, സൗബിന്‍ ഷാഹിര്‍ തുടങ്ങിയവരാണ് സിനിമയില്‍ മറ്റു പ്രധാന വേഷങ്ങളില്‍ എത്തുന്നത്. ഹാസ്യത്തിന് പ്രാധാന്യം നല്‍കിയാണ് ബ്രോ ഡാഡി പൃഥ്വിരാജ് ഒരുക്കുന്നത്. സിനിമയുടെ ഷൂട്ടിംഗ് നിലവില്‍ ഹൈദരാബാദില്‍ പുരോഗമിച്ചുകൊണ്ടിരിക്കുകയാണ്. എമ്പുരാന്‍ മാറ്റിവെച്ചാണ് പൃഥ്വി ബ്രോ ഡാഡി തുടങ്ങിയത്. വമ്പന്‍ താരനിര അണിനിരക്കുന്ന സിനിമ വലിയ പ്രതീക്ഷകളോടെയാണ് എല്ലാവരും കാത്തിരിക്കുന്നത്. ബ്രോ ഡാഡി തിയ്യേറ്ററുകളില്‍ തന്നെ റിലീസ് ചെയ്യുമെന്ന പ്രതീക്ഷയിലാണ് ആരാധകര്‍.