മണിച്ചിത്രത്താഴിലെ അല്ലി എവിടെ പോയതായിരുന്നു? വിവാഹം കഴിഞ്ഞതോടെ സിംഗപൂരില്‍ എത്തിയെന്ന് നടി അശ്വിനി

ഇടയ്ക്ക് തമിഴ് ചാനലിലെ ഒരു സീരിയലിലെ അഭിനയിച്ചിരുന്നു. കോവിഡ് കാരണം ചെന്നൈയിലേക്ക് വരാന്‍ സാധിക്കാതെ ആ പ്രൊജക്റ്റ് ഉപേക്ഷിക്കുകയായിരുന്നു. വിവാഹ ശേഷമാണ് താന്‍ സിംഗപ്പൂരിലേക്ക് വന്നത്. ഭര്‍ത്താവ് ഇന്ത്യക്കാരന്‍ ആണെങ്കിലും സിംഗപ്പൂര്‍ പൗരത്വം എടുത്ത്, ഇവിടെ ബിസിനസ് ചെയ്യുകയാണ്. മകള്‍ പഠിക്കുന്നു. വര്‍ഷങ്ങള്‍ക്ക് ശേഷം തന്റെ വിശേഷം പങ്കുവയ്ക്കുമ്പോള്‍ ഞങ്ങളുടെ പ്രൈവസി നഷ്ടപ്പെടുത്തരുത് എന്നാണ് രണ്ടുപേരും പറഞ്ഞത്. അതുകൊണ്ട് ഭര്‍ത്താവിനെയും മകളെയും കുറിച്ച് കൂടുതല്‍ വിവരങ്ങള്‍ പറയാന്‍ നിവൃത്തിയില്ല എന്നാണ് അശ്വനി വ്യക്തമാക്കുന്നത്.

വിവാഹം കഴിഞ്ഞ് സിംഗപ്പൂരിലേക്ക് പോകുന്നതു വരെ താന്‍ സീരിയലുകളില്‍ അഭിനയിച്ചിരുന്നു. ഇവിടെയെത്തി കഴിഞ്ഞതോടെ കുടുംബത്തിന് വേണ്ടിയാണ് കൂടുതല്‍ സമയം മാറ്റി വെച്ചത്. പത്താം ക്ലാസില്‍ പഠനം നിര്‍ത്തിയെങ്കിലും പ്രൈവറ്റായി പഠിച്ച് പിജി എടുത്തു. താനിപ്പോഴും അഭിനയം നിര്‍ത്തിയിട്ടില്ല. അതുകൊണ്ട് അതില്‍ കുറ്റബോധവും തോന്നിയിട്ടില്ല. മലയാളത്തില്‍ നല്ല വേഷങ്ങള്‍ കിട്ടിയാല്‍ ഇനിയും അഭിനയിക്കുമെന്നാണ് അശ്വിനി പറയുന്നത്.

അതേസമയം മണിച്ചിത്രത്താഴിലെ അല്ലി എന്ന കഥാപാത്രത്തിലൂടെയാണ് തന്നെ ഇപ്പോഴും പലരും തിരിച്ചറിയുന്നതെന്നാണ് അശ്വിനി പറയുന്നത്. മണിച്ചിത്രത്താഴ് ഏതെങ്കിലും ചാനലില്‍ വന്നാല്‍ കൂട്ടുകാര്‍ ആരെങ്കിലും വിളിച്ച് വിവരം പറയാറുണ്ട്. സിംഗപ്പൂരില്‍ ആണെങ്കിലും മലയാളികള്‍ കണ്ടാല്‍ ആദ്യത്തെ ചോദ്യം അല്ലി അല്ലേ ഇതെന്നാണ്. അത് കേള്‍ക്കുമ്പോള്‍ തനിക്ക് അത്ഭുതമാണ് തോന്നുന്നത്. 30 വര്‍ഷം മുന്നേയുള്ള കഥാപാത്രം ഇന്നും ആളുകള്‍ ഓര്‍ത്തിരിക്കുന്നു. അതും നായികയ്‌ക്കോ നായകനോ ഒപ്പം നില്‍ക്കുന്ന കഥാപാത്രമല്ല എന്നിട്ടും അങ്ങനെയാണ്. എയര്‍പോര്‍ട്ട് വെച്ച് ഏതെങ്കിലും പ്രോഗ്രാമുകള്‍ക്ക് പോകുമ്പോഴും മലയാളികള്‍ ചോദിക്കും. ഇപ്പോള്‍ എവിടെയാണെന്നും എന്താണ് അഭിനയിക്കാത്തതെന്നും. അതൊന്നും തന്റെ കഴിവല്ല. സിനിമയുടെയും കഥാപാത്രത്തിന്റെയും മേന്മ കൊണ്ട് സംഭവിച്ചതാണെന്നാണ് അശ്വിനി വ്യക്തമാക്കുന്നത്.