താരരാജാവിനോടൊപ്പം യുവതാരങ്ങളും മത്സരിച്ചു, ആരായിരുന്നു കഴിഞ്ഞ ഓണം തൂത്തുവാരിയത്?

ശക്തമായ പോരാട്ടമായിരുന്നു

ബോക്‌സോഫീസിലെ എക്കാലത്തെയും മികച്ച താരങ്ങളിലൊരാളായ മോഹന്‍ലാലിനോടൊപ്പമാണ് യുവതാരങ്ങള്‍ എത്തിയത്. വന്‍പ്രതീക്ഷയോടെ എത്തിയ സിനിമകള്‍ക്ക് മികച്ച സ്വീകാര്യതയായിരുന്നു ലഭിച്ചത്. ഉത്സവ സീസണുകള്‍ ലക്ഷ്യമാക്കിയായിരുന്നു പലരും സിനിമയൊരുക്കിയത്. റിലീസിന് മുന്‍പ് തന്നെ മികച്ച പിന്തുണയായിരുന്നു പല സിനിമകള്‍ക്കും ലഭിച്ചത്. അത്തരത്തില്‍ സിനിമാപ്രേമികള്‍ ഒന്നടങ്കം കാത്തിരുന്ന ചിത്രങ്ങളായിരുന്നു എത്തിയത്.

നിവിന്‍ പോളി ചിത്രം

യുവതാരങ്ങളില്‍ ഏറെ ശ്രദ്ധേയനായ നിവിന്‍ പോളിയുടെ സിനിമയും റിലീസിനുണ്ടായിരുന്നു. അല്‍ത്താഫ് സലീം സംവിധാനം ചെയ്ത ഞണ്ടുകളുടെ നാട്ടില്‍ ഒരിടവേള കഴിഞ്ഞ ഓണത്തിനായിരുന്നു റിലീസ് ചെയ്തത്. കാന്‍സറെന്ന മഹാവിപത്തിനെതിരെ ശക്തയായി പോരാടുന്ന കഥാപാത്രത്തെയായിരുന്നു ശാന്തികൃഷ്ണ അവതരിപ്പിച്ചത്. നീണ്ട ഇടവേളയ്ക്ക് ശേഷം താരം നടത്തിയ തിരിച്ചുവരവ് കൂടിയായിരുന്നു ഇത്. മികച്ച സന്ദേശവുമായെത്തിയ ചിത്രത്തിന് മികച്ച സ്വീകാര്യതയായിരുന്നു ലഭിച്ചത്. ഐശ്വര്യ ലക്ഷ്മിയായിരുന്നു ചിത്രത്തിലെ നായിക.

പൃഥ്വിരാജിന്റെ ആദം ജോണ്‍

ജിനു എബ്രഹാമും പൃഥ്വിരാജും ഒരുമിച്ചെത്തിയ ചിത്രമായിരുന്നു ആദം ജോണ്‍. ത്രില്ലര്‍ വിഭാഗത്തില്‍പ്പെടുത്താവുന്ന സിനിമയായിരുന്നു ഇത്. മലയാളികള്‍ക്ക് അത്ര സുപരിചിതമല്ലാത്ത വഴികളിലൂടെ സഞ്ചരിച്ച സിനിമയ്ക്ക് പൊതുവെ നല്ല അഭിപ്രായമായിരുന്നു ലഭിച്ചത്. സ്‌കോട്ട്‌ലന്‍ഡിലായിരുന്നു സിനിമയുടെ ചിത്രീകരണം. ശക്തമായ കഥാപാത്രത്തെയായിരുന്നു ഭാവന അവതരിപ്പിച്ചത്. ചിത്രത്തിലെ ഗാനങ്ങളും ഏറെ ശ്രദ്ധിക്കപ്പെട്ടിരുന്നു.

മോഹന്‍ലാലിന്റെ സിനിമയും ലിസ്റ്റിലുണ്ട്

ലാല്‍ജോസും മോഹന്‍ലാലും ആദ്യമായി ഒരുമിച്ചെത്തിയ ചിത്രമായിരുന്നു വെളിപാടിന്റെ പുസ്തകം. സിനിമയിലെത്തി നിരവധി വര്‍ഷമായിരുന്നുവെങ്കിലും ഇരുവരും ഒരുമിച്ചെത്താത്തതിനെക്കുറിച്ച് ആരാധകര്‍ നിരന്തരം ചോദ്യമുയര്‍ത്തിയിരുന്നു. ഈ കാത്തിരിപ്പിന് വിരമാമിട്ടാണ് വെളിപാടിന്റെ പുസ്തകമെത്തിയത്. ചിത്രത്തിലെ ജിമിക്കി കമ്മല്‍ എന്ന ഗാനവും സോഷ്യല്‍ മീഡിയയിലൂടെ തരംഗമായി മാറിയിരുന്നു.