ആദിലിന്‍റെ താടിപിടിച്ച് പേളിയുടെ തമാശ! അവരൊന്നായല്ലോ എന്നോര്‍ക്കുമ്പോള്‍ ആശ്വാസമെന്ന് അശ്വതി!

ആദിലിന്റെ വിവാഹം

ടെലിവിഷന്‍-സിനിമാലോകത്തുനിന്നുമായി നിരവധി പേരാണ് ആദിലിനും നമിതയ്ക്കും ആശംസ നേരുന്നതിനായി എത്തിയത്. പാര്‍വതി നമ്പ്യാര്‍, റോഷന്‍, ശില്‍പബാല, ജീവ, കുക്കു, അശ്വതി ശ്രീകാന്ത്, സഞ്ജു ശിവറാം, പേളി മാണി ശ്രിനിഷ് അരവിന്ദ്, ടെസ തുടങ്ങി നിരവധി പേരായിരുന്നു എത്തിയത്. ഡിഫോര്‍ ഡാന്‍സിലെ മത്സരാര്‍ത്ഥികള്‍ ചേര്‍ന്ന് ചുവടുവെച്ചപ്പോള്‍ ആദിലും നമിതയും അവര്‍ക്കൊപ്പം ചേര്‍ന്നിരുന്നു. വ്യത്യസ്തമായ അവതരണ ശൈലിയുമായെത്തിയ ആദിലിനെ വളരെ പെട്ടെന്ന് തന്നെ പ്രേക്ഷകര്‍ ഏറ്റെടുത്തിരുന്നു.

പേളി മാണിയുടെ തമാശ

ശ്രിനിഷിനൊപ്പമായാണ് പേളി മാണി ആദിലിനെ കാണാനെത്തിയത്. അതിസുന്ദരിയായെത്തിയ പേളിയുടെ ചിത്രങ്ങള്‍ ഇതിനകം തന്നെ വൈറലായി മാറിക്കഴിഞ്ഞിട്ടുണ്ട്. നവദമ്പതികളോട് കുശലം പറഞ്ഞ് ഫോട്ടോയ്ക്ക് പോസ് ചെയ്യുന്നതിനിടയിലായിരുന്നു പേളിയൊരു കുസൃതി ഒപ്പിച്ചത്. ആദിലിന്റെ താടിയില്‍ പിടിച്ച് വലിക്കുന്ന പേളിയുടെ ചിത്രങ്ങളും പുറത്തുവന്നിരുന്നു. ഇത് കണ്ട് ചിരിച്ച് നില്‍ക്കുകയായിരുന്നു ശ്രിനിഷും നമിതയും. പേളിയുടെ വിവാഹത്തില്‍ പങ്കെടുക്കാനായി ആദില്‍ എത്തിയിരുന്നു.

അശ്വതിയുടെ പോസ്റ്റ്

മിനിസ്‌ക്രീനിലെ മുന്‍നിര അവതാരകമാരിലൊരാളായ അശ്വതി ശ്രീകാന്തും ചടങ്ങില്‍ പങ്കെടുത്തിരുന്നു. മകളായ പത്മയ്‌ക്കൊപ്പമാണ് അശ്വതി എത്തിയത്. നാളുകള്‍ക്ക് ശേഷമുള്ള കൂടിച്ചേരല്‍ എല്ലാവരും ആഘോഷമാക്കി മാറ്റുകയായിരുന്നു. അങ്ങനെ അവന്റെ കാര്യത്തിലും ഒരു തീരുമാനമായല്ലോ എന്നോര്‍ക്കുമ്പോ ഒരു ആശ്വാസമുണ്ടെന്നായിരുന്നു അശ്വതി കുറിച്ചത്. നവദമ്പതികള്‍ക്കൊപ്പം നില്‍ക്കുന്ന ചിത്രവും താരം പോസ്റ്റ് ചെയ്തിരുന്നു.

അഭിനേതാവായും തിളങ്ങി

അവതാരകനായി മാത്രമല്ല അഭിനേതാവായും തിളങ്ങിയ താരമാണ് ആദില്‍. മുന്‍നിര സംവിധായകര്‍ക്കും താരങ്ങള്‍ക്കുമൊപ്പമെല്ലാം പ്രവര്‍ത്തിക്കാനുള്ള അവസരവും താരത്തിന് ലഭിച്ചിരുന്നു. ചെറുതാണെങ്കിലും പ്രധാനപ്പെട്ട കഥാപാത്രവുമായാണ് താരം എത്തിയത്. വികെ പ്രകാശ് സംവിധാനം ചെയ്ത നിര്‍ണ്ണായകത്തിലൂടെയായിരുന്നു ആദില്‍ ശ്രദ്ധ നേടിയത്.