ഇനി എഴുന്നേറ്റ് നടക്കില്ലെന്ന് ഡോക്ടര്‍മാര്‍ പറഞ്ഞയാളാണ് കെന്നി! വിക്രമിനെക്കുറിച്ച് പൃഥ്വിരാജ്!

സൈന്യത്തിന്റെ സെറ്റില്‍ പോയിട്ടുണ്ട്

പൃഥ്വിരാജിന്റേയും ഇന്ദ്രജിത്തിന്റേയും രക്തത്തില്‍ അലിഞ്ഞുചേര്‍ന്നതാണ് സിനിമ. തങ്ങള്‍ക്ക് പിന്നാലെയായി ഇവരും സിനിമയിലേക്കെത്തുമെന്നും ഇവരുടെ ഡേറ്റിനായി സംവിധായകര്‍ ക്യൂ നില്‍ക്കുന്ന അവസ്ഥയുണ്ടാവുമെന്നും സുകുമാരന്‍ അന്നേ പ്രവചിച്ചിരുന്നു. അച്ഛന്‍ നടനാണെങ്കിലും കുട്ടിക്കാലത്ത് ഒരുപാട് സിനിമാസെറ്റുകളിലൊന്നും താന്‍ പോയിട്ടില്ലെന്ന് പൃഥ്വിരാജ് പറയുന്നു. മമ്മൂക്ക നായകനായി അഭിനയിച്ച സൈന്യത്തിന്റെ സെറ്റില്‍ പോയപ്പോഴാണ് വിക്രമിനെ ആദ്യമായി കണ്ടുമുട്ടിയത്. അന്ന് മുതല്‍ അദ്ദേഹത്തെ പരിചയമുണ്ട്.

ഇനി എഴുന്നേല്‍ക്കില്ല

സിനിമയെ വെല്ലുന്ന ജീവിതകഥയാണ് വിക്രമിന്റേത്. ഒരപകടത്തില്‍ ജീവന്‍ തന്നെ നഷ്ടമാവുന്ന അവസ്ഥയിലൂടെ കടന്നുപോയതിനെക്കുറിച്ച് മുന്‍പ് അദ്ദേഹം തന്നെ തുറന്നുപറഞ്ഞിരുന്നു. ഇതേക്കുറിച്ച് പൃഥ്വിരാജും പറഞ്ഞിരുന്നു. കെന്നിക്ക് വലിയൊരപകടം സംഭവിച്ചിരുന്നു. ഇനിയൊരിക്കലും കെന്നി എഴുന്നേറ്റ് നടക്കില്ലെന്ന് ഡോക്ടര്‍മാര്‍ വിധിയെഴുതിയതാണ്. അദ്ദേഹത്തിന്റെ കാലില്‍ അന്നത്തെ മുറിപ്പാടുകള്‍ ഇപ്പോഴുമുണ്ട്. ബൈക്കില്‍ ട്രക്കിടിച്ചുള്ള അപകടത്തെ അതിജീവിച്ചതിനെക്കുറിച്ചുള്ള വിക്രമിന്‍രെ തുറന്നുപറച്ചില്‍ നേരത്തെ വൈറലായിരുന്നു.

സിക്‌സ്പാക്ക് ചെയ്യുന്നത്

കഥാപാത്രത്തിന് അനുസരിച്ച് ശാരീരികമായ മാറ്റങ്ങള്‍ വരുത്താനും തയ്യാറാണ് താനെന്ന് വിക്രം വളരെ മുന്‍പേ വ്യക്തമാക്കിയതാണ്. ശരീരഭാരം കുറയ്ക്കാനും കൂട്ടാനും മുടി വളര്‍ത്താനുമൊക്കെ താരം തയ്യാറാണ്. ജിമ്മില്‍ വെച്ച് ഒരിക്കല്‍ അദ്ദേഹം കാലിലെ മുറിപ്പാടുകള്‍ കാണിച്ച് തന്നിരുന്നു. അത് കണ്ട് ശരിക്കും അന്തംവിട്ട് പോയിരുന്നു. ഇങ്ങനെയൊരാള്‍ക്ക് കസേരയില്‍ നിന്ന് പോലും എഴുന്നേല്‍ക്കാനാവുമെന്ന് തോന്നുന്നില്ല എന്ന് ഡോക്ടര്‍മാര്‍ വരെ പറഞ്ഞതാണ്. അങ്ങനെയുള്ള ആളാണ് എളുപ്പത്തില്‍ സിക്‌സ്പാക്ക് ഉണ്ടാക്കുന്നത്.

സഹോദരനെപ്പോലെ

സൈന്യം മുതലുള്ള പരിചയത്തെക്കുറിച്ച് മാത്രമല്ല വിക്രമിനൊപ്പം അഭിനയിക്കാന്‍ അവസരം ലഭിച്ചതിനെക്കുറിച്ചും പൃഥ്വിരാജ് വാചാലനായിരുന്നു. രാവണിലൂടെയായിരുന്നു ഇരുവരും ഒരുമിച്ചെത്തിയത്. 2 വര്‍ഷത്തോളം അന്ന് താന്‍ അദ്ദേഹത്തിനൊപ്പമുണ്ടായിരുന്നു. ആ സെറ്റിലെ ഏറ്റവും പ്രായം കുറഞ്ഞയാളും താനായിരുന്നു. എന്നെ ഒരു സഹോദരനായാണ് അദ്ദേഹം കൂടെക്കൊണ്ട് നടന്നത്.

ഇന്‍സ്പിരേഷനാണ്

യുവതലമുറയ്ക്ക് പ്രചോദനമേകുന്ന തരത്തിലുള്ള ജീവിതമാണ് വിക്രമിന്റേത്. വിജയവും അംഗീകാരവും വൈകിക്കിട്ടിയ താരം കൂടിയാണ് അദ്ദേഹം. മലയാളത്തിലൂടെയായിരുന്നു വിക്രം അരങ്ങേറിയത്. നായകന് പിന്നാലെ നടക്കാനായിരുന്നു അന്നദ്ദേഹത്തിന്റെ യോഗം. നല്ല അവസരങ്ങള്‍ക്കായി ഒരുപാട് അലയേണ്ടി വന്നിട്ടുണ്ട്. പിന്നീടാണ് അദ്ദേഹത്തിന് സേതുവെന്ന ചിത്രം ലഭിക്കുന്നത്. അതോടെയാണ് അദ്ദേഹം വലിയ താരമായി മാറിയതെന്നും പൃഥ്വിരാജ് പറയുന്നു.