'രാധികയുടെ പേര് 'ബുദ്ദു' എന്നാണ് സേവ് ചെയ്തിരിക്കുന്നത്, ആറ് മാസം അവളെന്നെ വെയിറ്റ് ചെയ്യിപ്പിച്ചു'; യാഷ്

തന്റേയും രാധികയുടേയും പ്രണയകഥ ഒരിക്കൽ ബാം​ഗ്ലൂർ ടൈംസിന് നൽകിയ അഭിമുഖത്തിൽ ഒരിക്കൽ യാഷ് വെളിപ്പെടുത്തിയിരുന്നു. താൻ പ്രപ്പോസ് ചെയ്ത് ആറ് മാസങ്ങൾക്ക് ശേഷമാണ് രാധിക തന്റെ പ്രണയം സ്വീകരിച്ച് വിവാഹത്തിനുള്ള സമ്മതം അറിയിച്ചത് എന്നാണ് യാഷ് പറയുന്നത്.

'അവളോട് പ്രണയം പറയാൻ ഞാൻ പതിനെട്ട് അടവും പരീക്ഷിച്ചിരുന്നു. പക്ഷെ അവൾക്കതൊന്നും മനസിലായില്ല. അവളൊരു മണ്ടിയാണെന്ന് തോന്നുന്നു. അത്രയേറെ ക്ലൂകൊടുത്തിട്ടും എന്റെ പ്രണയം അവൾ മനസിലാക്കത്ത് കൊണ്ട് ഞാൻ ഇപ്പോഴും അവളുടെ പേര് എന്റെ ഫോണിൽ ബുദ്ദു അഥവാ മണ്ടിയെന്നാണ് സേവ് ചെയ്തിരിക്കുന്നത്.'

'അവളെ പ്രപ്പോസ് ചെയ്യണമെന്നത് എന്റെ വളരെ നാളത്തെ ആ​​ഗ്രഹമായിരുന്നു. പക്ഷെ അതിനുള്ള ആത്മവിശ്വാസം എനിക്കില്ലായിരുന്നു. എനിക്ക് ഭയമായിരുന്നു. കാരണം ഞങ്ങൾ വളരെ നല്ല സുഹൃത്തുക്കളായിരുന്നതിനാൽ അത് നഷ്ടപ്പെടുത്താൻ ഞാൻ ആഗ്രഹിച്ചില്ല.'

'അങ്ങനെയിരിക്കെ ഒരു വാലന്റൈൻസ് ദിനത്തിൽ ഇതാണ് പ്രപ്പോസ് ചെയ്യാൻ പറ്റിയ സമയമെന്ന് ഞാൻ തീരുമാനിച്ചു. അങ്ങനെ അവളുള്ള സ്ഥലം അന്വേഷിച്ച് കണ്ടെത്തി അങ്ങോട്ട് പുറപ്പെട്ടു.'

'എവിടെയാണെന്ന് ഞാൻ അവളോട് ചോദിച്ചപ്പോൾ അവൾ ഒരു സിനിമ കാണാൻ കോറമംഗല മാളിൽ പോവുകയാണെന്ന് എന്നോട് പറഞ്ഞു. അങ്ങനെ ഞാൻ മാളിലേക്ക് പോകാൻ തീരുമാനിച്ചു. അവൾക്കിഷ്ടപ്പെട്ട എല്ലാ സാധനങ്ങളും സമ്മാനമായി വാങ്ങി.'

'ചോക്ലേറ്റുകൾ, സോഫ്റ്റ് കളിപ്പാട്ടങ്ങൾ എന്നിങ്ങനെ അവൾക്ക് ഇഷ്ടമുള്ള എല്ലാ വസ്തുക്കളും ഒരുമിച്ച് ഒരു കുട്ടയിലാക്കി പാക്ക് ചെയ്ത് വാങ്ങി. പ്രപ്പോസ് ചെയ്തു. പക്ഷെ അവൾ ഉടനെ മറുപടി നൽകിയില്ല. ആറ് മാസത്തോളം എന്നെ വെയിറ്റ് ചെയ്യിപ്പിച്ച ശേഷമാണ് വിവാഹത്തിന് സമ്മതമാണെന്ന് പറഞ്ഞത്.'

'മാത്രമല്ല മിസ്റ്റർ ആൻഡ് മിസിസ് രാമാചാരിയിലെ പ്രൊപ്പോസൽ സീൻപോലും രാധികയ്ക്ക് എന്റെ ഭാഗത്ത് നിന്നുള്ള സമ്മാനമായിരുന്നു' യാഷ് വിശദീകരിച്ചു. 2007ലാണ് യാഷ് സിനിമയിലേക്ക് എത്തിയത്.

ടെലിവിഷൻ പരിപാടികളിലൂടെയാണ് യാഷ് ആദ്യം സ്ക്രീനിലേക്ക് വന്ന് തുടങ്ങിയത്. ശേഷമാണ് യാഷിന് സിനിമകൾ ലഭിച്ച് തുടങ്ങിയത്. പ്രശാന്ത് നീൽ സംവിധാനം ചെയ്ത ബ്രഹ്മാണ്ഡ ചിത്രമാണ് കെ.ജി.എഫ്.