കരയില്‍ നിന്ന് കാണുന്നതല്ല കടല്‍, വല്ലാതെ ഭയപ്പെടുത്തി,അനുഭവം വെളിപ്പെടുത്തി ഷൈന്‍ ടോം ചാക്കോ

Updated: Saturday, February 19, 2022, 18:12 [IST]

മലയാളി പ്രേക്ഷകരുടെ പ്രിയപ്പെട്ട താരമാണ് ഷൈന്‍ ടോം ചാക്കോ. സഹസംവിധായകനായി സിനിമ കരിയര്‍ തുടങ്ങിയ താരം പിന്നീട് മലയാള സിനിമയുടെ പ്രധാനഘടകമായി മാറുകയായിരുന്നു. കമലിന്റെ സംവിധാന സഹായി ആയി തുടങ്ങിയ ഷൈന്‍ ടോം ചാക്കോ ആദ്യം ക്യാമറയ്ക്ക് മുന്നില്‍ എത്തുന്നതും ഗുരുവിന്റെ ചിത്രത്തിലൂടെയാണ്. കമല്‍ സംവിധാനം ചെയ്ത നമ്മള്‍ എനെ ചിത്രത്തില്‍ തല കാണിച്ചിരുന്നുവെങ്കിലും അഭിനയ ജീവിതം തുടങ്ങുന്നത് ഗദ്ദാമ എന്ന ചിത്രത്തിലൂടെയാണ്. ഈ ചിത്രത്തിന് ശേഷം നടനായും വില്ലനായും സഹനടനായും ഷൈന്‍ തിളങ്ങുകയായിരുന്നു.

ജിജോ ആന്റണി സംവിധാനം ചെയ്യുന്ന അടിത്തട്ടാണ് ഷൈന്‍ ടോം ചാക്കോയുടെ ഇനി വരാന്‍ പോകുന്ന ചിത്രം. സിനിമയുടെ പേര് പോലെ തന്നെ കടലുമായി ചിത്രത്തിന് വളരെ അടുത്ത ബന്ധമുണ്ട്. ഇപ്പോഴിത സിനിമയുടെ ചിത്രീകരണ അനുഭവം പങ്കുവെയ്ക്കുകയാണ് ഷൈന്‍ ടോം ചാക്കോ. ഫ്‌ലാഷ് മൂവീസിന് നല്‍കിയ അഭിമുഖത്തിലാണ് നടന്‍ ഇക്കാര്യം പറഞ്ഞത്. കരയില്‍ നിന്നു കാണുന്നതല്ല കടല്‍. നടുക്കടലില്‍ ഓളം പോലും ഭയപ്പെടുത്തും എന്നാണ് താരം പറയുന്നത്. തികച്ചും വ്യത്യസ്തമായ അനുഭവമായിരുന്നെന്നും താരം പറയുന്നു.

ഷൈന്‍ ടോം ചാക്കോയുടെ വാക്കുകള്‍ ഇങ്ങനെ... '' ലോക്ഡൗണ്‍ സമയത്താണ് അടിത്തട്ടില്‍ അഭിനയിക്കുന്നത്. 20 ദിവസം കടലില്‍ ചിത്രീകരിക്കണം. പൂര്‍ണമായും നടുക്കടലില്‍ ചിത്രീകരിച്ച സിനിമ. വലിയൊരു അനുഭവം തന്നു അടിത്തട്ട്. നീണ്ടകരയിലായിരുന്നു ചിത്രീകരണം. ആദ്യത്തെ കുറച്ചു ദിവസം ബുദ്ധിമുട്ട് തോന്നി. കടലിന്റെ ഭീകരത മുന്നില്‍ കാണുമ്പോള്‍ ഭയം തോന്നും''.

കരയില്‍ നിന്നു കാണുന്നതല്ല കടല്‍ എന്നും നടന്‍ അഭിമുഖത്തില്‍ പറയുന്നു. നടുക്കടലില്‍ ഓളം പോലും ഭയപ്പെടുത്തും. ഉള്ള് കാറും. അതിലൂടെയാണ് ബോട്ടുകള്‍ ചരിഞ്ഞുപോകുന്നത്. രണ്ട് ദിവസം കഴിഞ്ഞു ഭയം മാറി പൊരുത്തപ്പെട്ടു. ചിത്രീകരണത്തിനായി കരയില്‍ നിന്ന് ബോട്ടില്‍ കടലിലേക്ക് പോകുകയായിരുന്നു. പിന്നെ കടലില്‍ത്തന്നെ. ബോട്ടില്‍ കടലില്‍ പോയി മീന്‍പിടിച്ച് ജീവിക്കുന്നവരുടെ രണ്ടു ദിവസത്തെ കഥയാണ് അടിത്തട്ട്.

സിനിമ നല്‍കുന്ന പ്രതീക്ഷയും ഷൈന്‍ ടോം ചാക്കോ പങ്കുവെയ്ക്കുന്നുണ്ട്.സണ്ണിവെയ്ന്‍, പ്രശാന്ത്, ജയപാലന്‍, മുരുകന്‍ ഉള്‍പ്പെടെ ഞങ്ങള്‍ ഏഴ് പേരായിരുന്നു. പൊന്നാനിയില്‍ താമസിച്ചപ്പോള്‍ പളളിപ്പെരുന്നാളിന് അമ്പുപ്രദക്ഷിണത്തിന് അഴിമുഖം കടന്നുപോകുമ്പോള്‍ കടല്‍ കണ്ടിട്ടുണ്ട്. എന്നാല്‍ 22 കിലോമീറ്റര്‍ കടലിനുള്ളിലേക്ക് പോകുന്നത് ആദ്യമാണ്. എന്നെ സംബന്ധിച്ച് ഏറെ പ്രതീക്ഷ നല്‍കുന്ന സിനിമയാണ് അടിത്തട്ട്. മികച്ച കഥാപാത്രമാകുമെന്നാണ് കരുതുന്നത്,' നടന്‍ പറഞ്ഞു.

ഡാര്‍വിന്റെ പരിണാമം, കൊന്തയും പൂണൂലും, പോക്കിരി സൈമണ്‍ എന്നീ ചിത്രങ്ങള്‍ക്കു ശേഷം ജിജോ ആന്റണി സംവിധാനം ചെയ്യുന്ന ചിത്രമാണ് അടിത്തട്ട്. മികച്ച സാങ്കേതിക വിദ്യയോട് കൂടിയാണ് ചിത്രമൊരുക്കിയിരിക്കുന്നത്.മിഡില്‍ മാര്‍ച്ച് സ്റ്റുഡിയോസ്, കാനായില്‍ ഫിലിംസ് എന്നീ ബാനറുകളില്‍ സൂസന്‍ ജോസഫും സിന്‍ട്രീസ്സയും ചേര്‍ന്നാണ് ചിത്രം നിര്‍മ്മിക്കുന്നത്. ഛായാഗ്രഹണം പാപ്പിനുവും എഡിറ്റിംഗ് നൗഫല്‍ അബ്ദുല്ലയും നിര്‍വഹിക്കുന്നു. സംഗീതം നെസ്സര്‍ അഹമ്മദ്.