'ഒരേ തന്തിയിൽ...'; ഒറ്റ വരിയിൽ നഷ്ടവും വേദനയും വിവരിച്ച് ബിജിബാൽ, ഭാര്യയുടെ ഓർമകളിൽ താരം!

അനില്‍ പനച്ചൂരാന്‍ എഴുതിയ തിരികെ ഞാന്‍ വരുമെന്ന.. എന്ന ഗാനത്തിന് ഈണം പകര്‍ന്ന് ഗാനഗന്ധര്‍വന്‍ യേശുദാസിനെ കൊണ്ട് പാടിപ്പിച്ചുകൊണ്ട് തന്നെ സിനിമയിൽ തുടക്കം കുറിക്കാനും ബിജിബാലിന് സാധിച്ചു.

പിന്നീട് നിരവധി ​ഗാനങ്ങൾക്ക് സം​ഗീത പകരാനും പശ്ചാത്തല സം​ഗീതം ഒരുക്കാനും ബിജിബാലിന് സാധിച്ചു. ബിജിബാലിന് അദ്ദേഹത്തിന്റെ ജീവിതത്തിലെ ഏറ്റവും വലിയ നഷ്ടം സംഭവിച്ച വർഷം 2017ആയിരുന്നു.

നല്ലപാതിയായിരുന്ന ഭാര്യ ശാന്തിയുടെ പെട്ടന്നുള്ള വേർപാട് ബിജിബാലിനെ വല്ലാതെ ബാധിച്ചിരുന്നു. നൃത്ത അധ്യാപികയും ഗായികയുമായിരുന്നു ശാന്തി. മസ്തിഷ്ക സംബന്ധമായ അസുഖത്തെ തുടർന്ന് 2017ലാണ് ശാന്തി ബിജിബാൽ അന്തരിച്ചത്.

നൃത്ത രംഗത്ത് സജീവമായിരുന്ന ശാന്തിയാണ് രാമന്റെ ഏദൻതോട്ടം എന്ന ചിത്രത്തിനായി നൃത്തം ചിട്ടപ്പെടുത്തിയത്. സ്വന്തമായി നൃത്ത വിദ്യാലയവും നടത്തിയിരുന്നു. ഇപ്പോഴിത ഭാര്യയുടെ ഓർമ ദിനത്തിൽ കണ്ണീരിൽ കുതിർന്ന കുറിപ്പുമായി എത്തിയിരിക്കുകയാണ് ബിജിബാൽ.

ഭാര്യ ശാന്തിയുടെ ചിത്രത്തിനരികെ തന്റെ ചിത്രവും ചേർത്തുവെച്ചാണ് ബിജിബാലിന്റെ പോസ്റ്റ്. ഒരേ തന്തി എന്ന് കുറിച്ചുകൊണ്ട് ബിജിബാൽ പങ്കുവെച്ച മനോഹര ചിത്രം ആരാധകരെയും വേദനിപ്പിക്കുകയാണ്.

ശാന്തി വീണയില്‍ തന്തികൾ മീട്ടുന്ന ചിത്രമാണ് ബിജിബാൽ പോസ്റ്റ് ചെയ്തത്. അതിനൊപ്പം ബിജിബാലും തന്തികളിൽ താളുമിടുന്ന ചിത്രം ചേർത്ത് വെച്ചിരിക്കുന്നതും കാണാം.

ബിജി ബാല്‍ ഒരുക്കിയ കൈയൂരുള്ളൊരു സമര സഖാവിന് എന്ന ആല്‍ബത്തില്‍ ശാന്തി പാടുകയും അഭിനയിക്കുകയും ചെയ്തിട്ടുണ്ട്. ബിജി ബാലിന്റെ സംഗീതത്തില്‍ 2017 ജനുവരിയിൽ പുറത്തിറങ്ങിയ സകല ദേവനുതേയിലെ നൃത്തം സംവിധാനം ചെയ്ത് അവതരിപ്പിച്ചതും ശാന്തി ആയിരുന്നു.

ഭാര്യയുടെ ഓർമ ദിവസം മറക്കാതെ കുറിപ്പുമായി എത്താറുണ്ട് ബിജിബാൽ. പുതിയ പോസ്റ്റ് പ്രത്യക്ഷപ്പെട്ടതോടെ ബിജിബാലിനെ ആശ്വസിപ്പിച്ചും മറ്റും നിരവധി കമന്റുകളാണ് ആരാധകർ കുറിച്ചത്. ​രണ്ട് മക്കളാണ് ഇരുവർക്കുമുള്ളത്. ഇതിനോടകം നിരവധി പുരസ്കാരങ്ങളും ബിജിബാലിനെ തേടി വന്നിട്ടുണ്ട്.

മനോജ്.കെ.ജയൻ സിനിമ കളിയച്ഛനിലെ പശ്ചാത്തല സം​ഗീതം ഒരുക്കിയതിന് ദേശീയ ചലച്ചിത്ര പുരസ്കാരവും ബി​ജിബാലിന് ലഭിച്ചിരുന്നു. സൈജു കുറുപ്പ് നായകനായ ഉപചാരപൂർവ്വം ​ഗുണ്ട ജയനാണ് ബിജിബാൽ സം​ഗീതം നൽകി അവസാനം റിലീസ് ചെയ്ത സിനിമ.

വെള്ളമെന്ന ജയസൂര്യ ചിത്രത്തിന് വേണ്ടിയും സം​ഗീതം ചെയ്തത് ബിജിബാലായിരുന്നു. ചാർളീസ് ഏഞ്ചൽ, തങ്കം, നീല വെളിച്ചം തുടങ്ങിയ സിനിമകളിലാണ് ബിജിബാൽ ഇപ്പോൾ പ്രവർത്തിച്ചുകൊണ്ടിരിക്കുന്നത്.