എന്ത് പ്രശ്‌നമുണ്ടായാലും ഞാന്‍ പിന്മാറില്ല, അങ്ങനെ നിങ്ങള്‍ സുഖിക്കേണ്ട, ശോഭന പറഞ്ഞത് വെളിപ്പെടുത്തി സിദ്ധിഖ്‌

ആദ്യ സിനിമ തൊട്ട് നായികാ വേഷങ്ങളിലേക്ക് ആദ്യം പരിഗണിക്കാറുളളത് ശോഭനയെ ആയിരുന്നു എന്ന് സിദ്ധിഖ് പറയുന്നു. എന്നാല്‍ പല കാരണങ്ങള്‍ കൊണ്ട് നടിക്ക് ആ റോളുകളൊന്നും ഏറ്റെടുക്കാന്‍ കഴിഞ്ഞില്ല. റാംജിറാവു സ്പീക്കിംഗ് സിനിമയില്‍ നടി ഓകെ പറഞ്ഞെങ്കിലും പിന്നീട് ഡേറ്റ് പ്രശ്‌നമായി മാറി. തുടര്‍ന്ന് മറ്റൊരു നായികയെ വെച്ച് ചെയ്യേണ്ടി വന്നു. സിദ്ധിഖ് പറയുന്നു.

എന്നാല്‍ ഹിറ്റ്ലര്‍ സിനിമയ്ക്കായി ശോഭനയെ വിളിച്ചപ്പോള്‍ എന്ത് പ്രശ്‌നമുണ്ടായാലും ഈ റോള്‍ ചെയ്യുമെന്ന് അവര്‍ പറയുകയായിരുന്നു. ഹിറ്റ്‌ലറിന്‌റെ കഥ റെഡിയായപ്പോള്‍ ഞങ്ങള്‍ പതിവുപോലെ ശോഭനയുടെ അടുത്ത് ചെന്നുവെന്ന് സംവിധായകന്‍ പറയുന്നു. സാധാരണ അവസാന നിമിഷം തിരക്കുകള്‍ കാരണം അവര്‍ പിന്മാറുകയും പടം സൂപ്പര്‍ഹിറ്റാവുകയും ആണ് പതിവ്.

അതുകൊണ്ട് ഹിറ്റ്‌ലറില്‍ അഭിനയിക്കാന്‍ വന്നാലും വന്നില്ലെങ്കിലും സന്തോഷം എന്ന് ഞാന്‍ പറഞ്ഞു. ഇല്ലില്ല ഈ പടത്തില്‍ ഞാന്‍ വരും എന്ത് പ്രശ്‌നമുണ്ടായാലും ഞാന്‍ പിന്മാറില്ല. അങ്ങനെ നിങ്ങള്‍ സുഖിക്കേണ്ട എന്നായിരുന്നു ശോഭനയുടെ മറുപടിയെന്ന് അഭിമുഖത്തില്‍ സിദ്ധിഖ് വെളിപ്പെടുത്തി. അതേസമയം 1996ലായിരുന്നു ഹിറ്റ്‌ലര്‍ പുറത്തിറങ്ങിയത്. ഹാസ്യത്തിന് പ്രാധാന്യം നല്‍കി സംവിധായകന്‍ ഒരുക്കിയ ചിത്രം ആറ് പെണ്‍കുട്ടികളുടെ സഹോദരനായ മാധവന്‍കുട്ടിയുടെ കഥയാണ് പറഞ്ഞത്.

Recommended Video

മണിച്ചിത്രത്താഴിലെ മുണ്ട് സീൻ ഉണ്ടായത് ഇങ്ങനെ

സിദ്ധിഖിന്‌റെ തന്നെ തിരക്കഥയില്‍ ഒരുങ്ങിയ സിനിമ ലാലും ഔസേപ്പച്ചന്‍ വാളക്കുഴിയും ചേര്‍ന്നായിരുന്നു നിര്‍മ്മിച്ചത്. റിലീസ് ചെയ്ത് വര്‍ഷങ്ങള്‍ കഴിഞ്ഞെങ്കിലും ഇന്നും ടെലിവിഷന്‍ ചാനലുകളില്‍ വന്നാല്‍ മികച്ച പ്രേക്ഷക സ്വീകാര്യത ലഭിക്കാറുളള ചിത്രമാണ് ഹിറ്റ്‌ലര്‍. ഗിരീഷ് പുത്തഞ്ചേരിയുടെ വരികള്‍ക്ക് എസ്പി വെങ്കിടേഷ് സംഗീതം നല്‍കിയ സിനിമയിലെ പാട്ടുകളും ഏറെ ശ്രദ്ധിക്കപ്പെട്ടിരുന്നു. മമ്മൂട്ടി ചിത്രം പിന്നീട് തെലുങ്ക്, ഹിന്ദി, തമിഴ്, കന്നഡ, ബംഗാളി ഭാഷകളിലേക്ക് റീമേക്ക് ചെയ്യപ്പെടുകയും ചെയ്തു.