ക്രൈം ത്രില്ലര്‍ സിനിമയായി വാരിക്കുഴിയിലെ കൊലപാതകം തിയ്യേറ്ററുകളില്‍! പ്രേക്ഷക പ്രതികരണമിങ്ങനെ

വാരിക്കുഴിയിലെ കൊലപാതകം

ജയസൂര്യയെ നായകനാക്കി ലാല്‍ ബഹദൂര്‍ ശാസ്ത്രി എന്ന ചിത്രമൊരുക്കിയ സംവിധായകനാണ് രജീഷ് മിഥില. ജയസൂര്യ ചിത്രത്തിനു ശേഷമാണ് വാരിക്കുഴിയിലെ കൊലപാതകവുമായി സംവിധായകന്‍ എത്തിയിരിക്കുന്നത്. സംവിധാനത്തിനു പുറമെ സിനിമയുടെ തിരക്കഥ ഒരുക്കിയിരിക്കുന്നതും രാജേഷ് മിഥില തന്നെയാണ്.ഒരു സസ്‌പെന്‍സ് ത്രില്ലര്‍ ചിത്രമായിരിക്കും വാരിക്കുഴിയിലെ കൊലപാതകമെന്ന് നേരത്തെ തന്നെ റിപ്പോര്‍ട്ടുകള്‍ വന്നിരുന്നു. വലിയ അവകാശവാദങ്ങളൊന്നുമില്ലാതെയാണ് സിനിമ തിയ്യേറ്ററുകളിലേക്ക് എത്തിയിരിക്കുന്നത്.

നായകനായി അമിത്

ചെറിയ വേഷങ്ങളിലൂടെ മലയാളത്തില്‍ ശ്രദ്ധേയനായ അമിത് ചക്കാലയ്ക്കല്‍ ആണ് സിനിമയില്‍ നായകനായി എത്തുന്നത്. ജീന്‍ പോള്‍ ലാല്‍ സംവിധാനം ചെയ്ത ഹണീബി എന്ന ചിത്രത്തിലൂടെയാണ് അമിത് ശ്രദ്ധിക്കപ്പെടുന്നത്. തുടര്‍ന്ന് നിരവധി സിനിമകളില്‍ ചെറിയ റോളുകളില്‍ താരം അഭിനയിച്ചിരുന്നു. വാരിക്കുഴിയിലെ കൊലപാതകത്തില്‍ മുഖ്യ വേഷത്തില്‍ എത്തുന്നത് അമിതാണ്. അമിതിനൊപ്പം ദിലീഷ് പോത്തനും ലാലും പ്രാധാന്യമുളള റോളുകളില്‍ എത്തുന്നു.

ചിത്രത്തിന്റെ പ്രമേയം

ഒറ്റപ്പെട്ട ഒരു ദ്വീപില്‍ നടക്കുന്ന കൊലപാതകവും തുടര്‍ന്നു നടക്കുന്ന അന്വേഷണവും ആണ് ചിത്രത്തിന്റെ പ്രമേയം. വലിയ പ്രതീക്ഷകളോടെയാണ് അണിയറപ്രവര്‍ത്തകര്‍ ഈ ചിത്രം ഒരുക്കിയിരിക്കുന്നത്. പതിവ് ക്രൈം ത്രില്ലറുകളില്‍നിന്നും വ്യത്യസ്തമായിരിക്കും വാരിക്കുഴിയിലെ കൊലപാതകം എന്ന് സംവിധായകന്‍ നേരത്തെ അറിയിച്ചിരുന്നു. ഒരു തുരുത്തിലെ കൊലപാതകവും അതിനെ തുടര്‍ന്നുളള പ്രശ്‌നങ്ങളുമാണ് ചിത്രത്തിന്റെ ഇതിവൃത്തം.

മറ്റു താരങ്ങള്‍

സംഗീതസംവിധായകന്‍ മെജോ ജോസഫിന്റെ സംഗീതത്തില്‍ ഒരുങ്ങുന്ന ചിത്രത്തിലെ ഗാനങ്ങള്‍ ആലപിച്ചിരിക്കുന്നത് ബാഹുബലിയുടെ സംഗീത സംവിധായകന്‍ എം എം കീരവാണി,ശ്രേയാ ഘോഷാല്‍, റിയാലിറ്റി ഷോകളിലൂടെ ശ്രേദ്ധേയനായ വൈഷണവ് എന്നിവരാണ്. നെടുമുടി വേണു,ലെന,അഞ്ജലി നായര്‍,ഷമ്മി തിലകന്‍,നന്ദു തുടങ്ങിയവരാണ് സിനിമയിലെ മറ്റു പ്രധാന താരങ്ങള്‍.

പ്രേക്ഷക പ്രതികരണം

ഒരു ഗ്രാമം അവിടത്തെ കുറെ ഗ്രാമീണർ പോലീസായ ശേഷം പള്ളിയിലച്ഛനായി മാറിയ പുരോഹിതൻ. ഇങ്ങനെ വ്യത്യസ്തമായ ഒരു പ്രതീക്ഷ ആദ്യം ഉയർത്തിയെങ്കിലും അത് നിലനിർത്താൻ സാധിക്കാതെ പോയ സിനിമയായിട്ടാണ് വാരിക്കുഴിയിലെ കൊലപാതകം എന്ന ചലച്ചിത്രത്തിന്റെ ആദ്യ പകുതി പ്രേക്ഷകനോട് പറയുന്നത്. കഥയുടെ പ്രധാന പോയിന്ററിലേക്ക് എത്തുവാൻ എടുത്ത ഒരു മണിക്കൂർ പത്ത് മിനിറ്റ് പ്രേക്ഷകരെ ശരിക്കും വലയ്ക്കും ഈ വാരിക്കുഴി.

ആദ്യ പകുതിക്ക് ശേഷമാണ്

ദിലീഷിന്റെ ആദ്യ പകുതിക്ക് മുന്നേയുള്ള വില്ലൻ ടച്ചുള്ള കഥാപാത്രത്തിന്റെ തുടക്കം നന്നായി. നല്ല ക്യാമറാ വർക്ക്. തെറ്റില്ലാത്ത പശ്ചാത്തല സംഗീതമെല്ലാമുണ്ടെങ്കിലും ആദ്യ പകുതിയിൽ വലിഞ്ഞു നീങ്ങുന്നതായാണ് അനുഭവം.ആദ്യ പകുതിക്ക് ശേഷമാണ് വാരിക്കുഴി ശരിക്കും ട്രാക്കിലെത്തുന്നത്. ദിലീഷിന്റെ നെഗറ്റീവ് ടച്ചുള്ള കഥാപാത്രം നന്നായി വന്നിട്ടുണ്ട്.