അന്നയും റസൂലും മാത്രമാണ് താൻ തിരഞ്ഞെടുത്ത ചിത്രം, അതിന് കാരണമുണ്ട്, ഫഹദിന്റെ വാക്കുകൾ വൈറലാകുന്നു

മനോരമ ഓൺലൈന് നൽകിയ അഭിമുഖത്തിലാണ് ഇക്കാര്യം വെളിപ്പെടുത്തിയത്. കരിയറിൽ താൻ തിരഞ്ഞെടുത്തത് ഒരെയൊരു സിനിമ മാത്രമാണെന്നാണ് ഫഹദ് പറയുന്നത്. ബാക്കിയെല്ലാം തേടി എത്തിയതാണ്. 2013ൽ ഛായാഗ്രാഹകൻ രാജീവ് രവി സംവിധാനം ചെയ്ത അന്നയും റസൂലും എന്ന ചിത്രമാത്രമാണ് ഫഹദ് തിരഞ്ഞെടുത്ത ചിത്രം. നടന്റെ വാക്കുകൾ ഇങ്ങനെ...

എന്റെ കരിയറിൽ ഒരു സിനിമ മാത്രമാണ് താൻ തിരഞ്ഞെടുത്തത്. ബാക്കിയെല്ലാം തന്നെ തിരഞ്ഞെടുക്കുകയായിരുന്നു. താൻ പ്ലാൻ ചെയ്ത് ഒരു പ്രൊജക്ട് ഉണ്ടാക്കിയെടുക്കുന്ന ആളല്ല. അങ്ങനെ ചെയ്ത ഏക പ്രൊജക്ട് അന്നയും റസൂലും മാത്രമാണ്. രാജീവ് രവിയെ ഒരു സംവിധായകനായി കാണാനുള്ള ഒരു ആഗ്രഹം കൊണ്ടായിരുന്നു അത്. രാജീവ് രവിയോടൊപ്പം ഒരു സിനിമ ചെയ്യണമെന്ന് തോന്നിയിരുന്നു. അതിൽ നിന്നാണ് അന്നയും റസൂലും ഉണ്ടായത്. മറ്റ് ചിത്രങ്ങൾ സംഭവിക്കുകയായിരുന്നെന്നും ഫഹദ് പറയുന്നു.

ഒരു രീതിയിലുളള ഡ്രാമയും ഉപയോഗിക്കാതെയാണ് രജീവ് രവി സിനിമ ചെയ്യുന്നത്. അഭിനേതാക്കളെ മാത്രമാണ് അദ്ദേഹം ഫോളോ ചെയ്യുന്നത്. നേരത്തെ ക്യാമറയ്ക്ക് വേണ്ട രീതിയിലായിരുന്നു താരങ്ങൾ അഭിനയിച്ചിരുന്നത്. എന്നാൽ രാജീവ് രവിയുടെ ചിത്രങ്ങളിൽ ക്യാമറ അഭിനേതാക്കളെ ഫോളോ ചെയ്യും. അഭിനേതാക്കാൾ ക്യാമറയെ കുറിച്ച ചിന്തിക്കേണ്ടതില്ല. അന്നയും റസൂലും ചെയ്യുമ്പോൾ ക്യാമറ എവിടെയാണെന്ന് പോലും നമുക്ക് അറിയില്ല. താരങ്ങളുടെ ഇമോഷനെ ഫോളോ ചെയ്ത് കൊണ്ടാണ് രജീവ് രവി സിനിമ ചെയ്യുന്നത്. അത് തന്നെ വളരെയധികം ആകർഷിച്ചുവെന്നും ഫഹദ് ഫാസിൽ പറഞ്ഞു.

എഞ്ചിനിയറിംഗ് വിട്ട് സിനിമയിൽ വീണ്ടും എത്തിയതിനെ കുറിച്ചും ഫഹദ് പറയുന്നു. താൻ ഒരു ആക്ടിങ് സ്കൂളിലും പോയി അഭിനയം പഠിച്ചിട്ടില്ല. സിനിമ ജീവിതത്തിൽ സംഭവിക്കുകയായിരുന്നു. എഞ്ചിനിയറിംഗ് പഠിക്കാൻ വേണ്ടിയായിരുന്നു വിദേശത്ത് പോയത്. ഒന്നര വർഷം ആത്മാർഥമായി അതിന് വേണ്ടി ശ്രമിച്ചു. എന്നാൽ അത് നടന്നില്ല. ആരെങ്കിലും കണ്ടുപിടിച്ച തീയറികൾ ഫോളോ ചെയ്യാനാണ് പറയുന്നത്. അത് തനിക്ക് കഴിയുമായിരുന്നില്ല. പിന്നെ ഫിലോസഫിയാണ് ചെയ്തത്. അത് കഴിഞ്ഞ് നാട്ടിലെത്തിയപ്പേൾ സിനിമകൾ നേടിയെത്തുകയായിരുന്നു. പിന്നീട് എല്ലാം സംഭവിക്കുകയായിരുന്നുവെന്നാണ് ഫഹദ് പറയുന്നത്.