തന്റെ കാമുകനുമായുള്ള ബന്ധം സംസാരവിഷയമാക്കാന്‍ ഉദ്ദേശിക്കുന്നില്ല; തുറന്നടിച്ച് നടി രാകുല്‍ പ്രീത് സിംഗ്

ഇപ്പോഴിതാ, ജാക്കിയുമായുള്ള പ്രണയത്തെക്കുറിച്ച് മറ്റൊരു കാര്യം കൂടി തുറന്നുപറയുകയാണ് താരം. ഒരു ദേശീയ മാധ്യമത്തിന് നല്‍കിയ അഭിമുഖത്തില്‍ തന്റെ പ്രണയം തങ്ങള്‍ക്കിടയില്‍ സംസാരവിഷയമാക്കുന്നതില്‍ താത്പര്യമില്ലെന്ന് തുറന്നുപറയുകയാണ് താരം. പകരം തന്റെ കരിയറായിരിക്കണം ഏതൊരു സംഭാഷണത്തിന്റെയും കേന്ദ്രബിന്ദുവെന്ന് പറയുകയും ചെയ്യുന്നു.

'ആരുടെയും വ്യക്തിജീവിതം അവരുടെ ജീവിതത്തിലെ മറ്റെന്തിനെയും പോലെ സാധാരണമാണ്. നമ്മള്‍ അഭിനേതാക്കളല്ലായിരുന്നുവെങ്കില്‍ അത് ഒരു സംസാരവിഷയമായിരിക്കില്ല.' രാകുല്‍ പറയുന്നു.

ഒരു ബന്ധത്തില്‍ ഏര്‍പ്പെടുന്നത് ഏതൊരു മനുഷ്യനും സ്വാഭാവികമായുണ്ടാകുന്ന വളര്‍ച്ച പോലെയാണെന്നാണ് തനിക്ക് തോന്നുന്നതെന്ന് രാകുല്‍ പ്രീത് പറയുന്നു. മാതാപിതാക്കളും സഹോദരങ്ങളും സുഹൃത്തുക്കളും ഉണ്ടായതിന് ശേഷം ഒരാളുടെ ജീവിതത്തിലെ മറ്റൊരു പ്രധാന മനുഷ്യനെ പോലെയാണ് ഒരാളുടെ പങ്കാളി.

ജാക്കിയുമായുള്ള പ്രണയം സോഷ്യല്‍ മീഡിയയില്‍ പരസ്യപ്പെടുത്താന്‍ കാരണം അത് അത്രത്തോളം മനോഹരമാണെന്ന് കരുതിയത് കൊണ്ടാണ്. അതിനെ കുറിച്ച് എല്ലാവരും അറിയണമെന്ന് താന്‍ ആഗ്രഹിച്ചിരുന്നതായി രാകുല്‍ പറയുന്നു.

അതേസമയം വിവാഹക്കാര്യം പുറത്ത് വന്നതിന് പിന്നാലെ ചില പ്രവചനങ്ങളും രാകുലിനേയും ജാക്കിയേയും കുറിച്ച് വന്നിരുന്നു. ജാക്കിയും രാകുലും വിവാഹം കഴിച്ചാലും വേര്‍പിരിയുമെന്ന മുന്നറിയിപ്പുമായിട്ടാണ് പ്രശസ്തനായൊരു ജ്യോത്സന്‍ രംഗത്തുവന്നത്. ഇരുവരുടെയും ഗ്രഹനിലകള്‍ വിവാഹത്തിന് അനുയോജ്യമല്ലെന്നും വിവാഹനിശ്ചയം നടത്താന്‍ പദ്ധതിയിട്ടാലും അത് മുടങ്ങി പോവുമെന്നും അദ്ദേഹം സൂചിപ്പിക്കുന്നു. ഇനി വിവാഹം കഴിച്ചാലും ദാമ്പത്യത്തില്‍ പ്രശ്‌നമുണ്ടാവുമെന്നാണ് മുന്നറിയിപ്പ്.

കന്നഡ ചിത്രമായ ഗില്ലിയിലൂടെ അരങ്ങേറിയ നടി പിന്നീട് തെലുങ്കിലും തമിഴിലുമാണ് സജീവമായത്. ടോളിവുഡിലെ മിക്ക സൂപ്പര്‍ താരങ്ങളുടെയും സിനിമകളില്‍ രാകുല്‍ പ്രീത് അഭിനയിച്ചിട്ടുണ്ട്. പിന്നീട് ബോളിവുഡിലും സജീവമായി നടി. യാരിയന്‍, കിക്ക് 2,ധ്രുവ, യെന്നമോ യേതോ, തീരന്‍, ദേവ്, എന്‍ജികെ, ചെക്ക്, സര്‍ദാര്‍ കാ ഗ്രാന്‍ഡ്‌സണ്‍, അറ്റാക്ക് തുടങ്ങി നിരവധി ഹിറ്റ് ചിത്രങ്ങളില്‍ അഭിനയിച്ചിട്ടുണ്ട് താരം. അഭിഷേക് ബച്ചനും അജയ് ദേവ് ഗണിനും ഒപ്പം അഭിനയിച്ച റണ്‍വേ 34 ആയിരുന്നു രാകുല്‍ പ്രീതിന്റെ ഒടുവില്‍ പുറത്തിറങ്ങിയ ചിത്രം.