ആറ് ടേക്ക് എടുത്ത ആ സീന്‍ നന്നായില്ല എന്ന് പറഞ്ഞപ്പോള്‍ വല്ലാത്ത വിഷമം തോന്നി; ജീത്തു ജോസഫ്

ഏതായിരുന്നു ആ രംഗം

ഇന്റര്‍വെല്ലിന് മുന്‍പുള്ള ഒരു രംഗമായിരുന്നു അത്. ജോസൂട്ടി കല്യാണം കഴിഞ്ഞ് വിദേശത്തേക്ക് പോവുമ്പോള്‍, അച്ഛന്‍ സങ്കടം മറച്ച് വച്ച് തമാശയോടെ 'വണ്ടയില്‍ പെട്രോളൊക്കെ ഉണ്ടല്ലോ' എന്ന് ചോദിയ്ക്കുന്ന രംഗമായിരുന്നു അത്.

വന്ന വിമര്‍ശനങ്ങള്‍

എന്നാല്‍ പലരും ആ രംഗം വളരെ ആര്‍ട്ടിഫിഷലാണെന്ന് പറഞ്ഞു. ആ രംഗത്തിന്റെ തീവ്രത മനസ്സിലാക്കാന്‍ കഴിയാത്തവരാണ് അങ്ങനെ പറഞ്ഞത്. വളരെ വികാരമപരമായ രംഗമാണത്, അത് മനസ്സിലാക്കിയവരുടെ കണ്ണ് നനഞ്ഞതും ഞാന്‍ കണ്ടിട്ടുണ്ട്.

ആ രംഗത്തിന്റെ പ്രത്യേകത

അധികം സംസാരിക്കകയോ തമാശകള്‍ പറയുകയോ ചെയ്യുന്ന അച്ഛനല്ല ജോസൂട്ടിയുടേത്. വിദേശത്ത് പോകുമ്പോള്‍ അതൊന്നും സാരമില്ല എന്ന് പറയുമ്പോഴും അയാള്‍ക്ക് നല്ല വിഷമമുണ്ട്. മകന്‍ പോവാനിറങ്ങുമ്പോള്‍ അച്ഛന്റെ ചങ്ക് പൊട്ടുന്നു. പക്ഷെ അയാള്‍ക്ക് കരയാനോ പറയാനോ കഴിയില്ല. എനിക്ക് വിഷമമില്ല എന്ന് കാണിക്കാനാണ് അങ്ങനെ ഒരു തമാശ പറയാന്‍ നോക്കിയത്. തമാശ പറയാത്ത ഒരാള്‍ തമാശ പറയുമ്പോള്‍ ആര്‍ട്ടിഫിഷലാകും. ആ രംഗം ഞങ്ങള്‍ അങ്ങനെ ആര്‍ട്ടിഫിഷലായി തന്നെ ചിത്രീകരിച്ചതാണ്.

വല്ലാത്ത വിഷമം തോന്നി

ആറ് ടേക്ക് എടുത്തിട്ടാണ് ആ രംഗം ചെയ്തത്. അത് ജീവിതത്തിലെ ഒരു റിയാലിറ്റിയാണ്. ഒരുപാട് പേര്‍ വളരെ നന്നായി എന്നും, ചിലര്‍ മോശമായി എന്നും പറഞ്ഞ പ്രകടനമാണ് അത്. ലൈഫ് ഓഫ് ജോസൂട്ടിയെ സംബന്ധിച്ച് എനിക്കേറ്റവും വിഷമം തോന്നിയ ഫീഡ്ബാക്ക് അത് മാത്രമേയുള്ളൂ. ബാക്കി കുറേ പേര്‍ സിനിമ ഇഷ്ടപ്പെട്ടില്ല എന്നൊക്കെ പറഞ്ഞതൊന്നും എനിക്ക് കുഴപ്പമായിരുന്നില്ല - ജീത്തു ജോസഫ് പറഞ്ഞു.