മുസ്ലിം പെണ്‍കുട്ടിയുമായിട്ടുള്ള വിവാഹം സംഘര്‍ഷമായിരുന്നോ? താന്‍ വ്യക്തികളെയാണ് നോക്കുന്നതെന്ന് ദേവ് മോഹന്‍

വര്‍ഷങ്ങളോളം നീണ്ട പ്രണയത്തെ കുറിച്ച്?

റെജീന എന്റെ കോളേജില്‍ ജൂനിയറായിരുന്നു. ഞങ്ങള്‍ പത്ത് വര്‍ഷം പ്രണയിച്ച് കല്യാണം കഴിച്ചവരാണ്. എല്ലാവരെയും പോലെ ഞങ്ങളുടെ പ്രണയവും സ്വീറ്റ് ആയിരുന്നു. ഭാര്യ ഇപ്പോള്‍ ബാംഗ്ലൂരില്‍ വര്‍ക്ക് ചെയ്യുകയാണ്.

ആദ്യ സിനിമയില്‍ സൂഫിയായി വന്ന് ഹിന്ദു പെണ്‍കുട്ടിയെ പ്രണയിക്കുന്നു. ജീവിതത്തില്‍ മുസ്ലിം പെണ്‍കുട്ടിയെ വിവാഹം കഴിച്ചു. പ്രണയം സംഘര്‍ഷം നിറഞ്ഞതായിരുന്നോ?

പ്രണയത്തെ റിലീജിയസ് ആയിട്ട് ഞാനങ്ങനെ നോക്കിയിരുന്നില്ല. വ്യക്തികളെ ആണല്ലോ നോക്കേണ്ടത്. ആദ്യ സിനിമയില്‍ ഞാന്‍ സൂഫിയായിരുന്നു. രണ്ടാമത് സ്റ്റീഫനും മൂന്നാമത്തെ സിനിമയില്‍ ദുഷ്യന്തനുമായി അഭിനയിച്ചു. ഇപ്പോള്‍ ഇമ്മാനുവേല്‍ എന്ന കഥാപാത്രമാണ് ചെയ്യുന്നത്. പിന്നെ എനിക്കങ്ങനെ റിലീജിനില്‍ വ്യത്യസ്തകളൊന്നും ഇല്ല. എല്ലാം വ്യക്തികളാണെന്നും ദേവ് പറയുന്നു.

നടി സാമന്തയെ ആദ്യം കണ്ടുമുട്ടിയ നിമിഷത്തെ കുറിച്ച്?

സാമന്ത സൂഫിയും സുജാതയും കണ്ടിരുന്നു. അതേ കുറിച്ച് പറഞ്ഞിട്ടുണ്ട്. ഒരു ഫോട്ടോഷൂട്ടിനിടയിലാണ് സാമന്തയെ ആദ്യം കാണുന്നത്. അത് ചെയ്യുമ്പോള്‍ തന്നെ രണ്ട് താരങ്ങള്‍ തമ്മിലുള്ള അടുപ്പം തോന്നിയിരുന്നു. പിന്നെ സിനിമയുടെ പൂജയ്ക്കാണ് കാണുന്നത്. അന്ന് സിനിമയുടെ കഥയറിയാം. എനിക്ക് സിനിമയില്‍ കുറേ ചെയ്യാനുണ്ടെന്ന് സാമന്ത ആദ്യമേ പറഞ്ഞിരുന്നു. പക്ഷേ സ്‌ക്രീപ്റ്റ് തെലുങ്കില്‍ ആയിരുന്നത് കൊണ്ട് ഞാന്‍ വായിച്ചിരുന്നില്ല.

സൂഫിയും സുജാതയ്ക്കും ശേഷം പെണ്‍കുട്ടികളില്‍ നിന്നും പ്രൊപ്പോസല്‍ ലഭിച്ചിട്ടുണ്ടോ?

ഇപ്പോള്‍ എല്ലാവര്‍ക്കും പക്വതയുണ്ട്. ഇതൊക്കെ സിനിമയാണെന്നും ഇത് നടനാണെന്നും ഒക്കെ എല്ലാവര്‍ക്കും അറിയാം. പണ്ട് ചാക്കോച്ചന് കിട്ടിയത് പോലെ ഒന്നും ഇല്ല. അതില്‍ നിന്നും പത്തിരുപത്തിയഞ്ച് വര്‍ഷം മുന്നോട്ട് പോയില്ലേ. ആളുകളൊക്കെ പക്വത വന്നതോടെ പ്രണയാഭ്യര്‍ഥനയൊന്നുമില്ല. പിന്നെ തനിക്ക് മെസേജ് അയച്ചവര്‍ ഇല്ലെന്നല്ല പറയുന്നത്. അങ്ങനെയുണ്ട്. പക്ഷേ അതൊന്നും അത്ര സീരിയസ് അല്ലെന്നാണ് ദേവിന്റെ അഭിപ്രായം. ഒപ്പം തൻ്റെ സിനിമ ആദ്യമായി തിയറ്ററിലേക്ക് എത്തുന്നതിൻ്റെ സന്തോഷത്തിലാണ് താരം.