Click it and Unblock the Notifications
സാള്ട്ട് ആന്റ് പെപ്പറിന് ശേഷം ഇടുക്കി ഗോള്ഡ്
2011ലെ വമ്പന് ഹിറ്റായി മാറിയ സാള്ട്ട് ആന്റ് പെപ്പറിന് ശേഷം ആഷിക്കിന്റെ പുതിയ ചിത്രം ഏതെന്ന ആകാംക്ഷയിലായിരുന്നു പ്രേക്ഷകര്. മമ്മൂട്ടിയെ തന്നെ നായകനാക്കി ഗ്യാങ്സ്റ്റര് എന്നൊരു ചിത്രം സംവിധായകന് ഒരുക്കുമെന്ന് നേരത്തെ റിപ്പോര്ട്ടുകള് വന്നിരുന്നു. ഇതിന്റെ തിരക്കഥ ജോലികള് ആരംഭിയ്ക്കുകയും ചെയ്തു. എന്നാല് സാള്ട്ട് ആന്റ് പെപ്പര് ട്രെന്റ് സെറ്ററായി മാറിയതോടെ വഴിമാറി നടക്കാന് തന്നെ സംവിധായകന് തീരുമാനിക്കുകയായിരുന്നു.
സന്തോഷ് എച്ചിക്കാനത്തിന്റെ ഇടുക്കി ഗോള്ഡ് എന്ന കഥയെ ആസ്പദമാക്കിയാണ് പുതിയ സിനിമയെന്നാണ് അറിയുന്നത്. മാതൃഭൂമി ആഴ്ചപ്പതിപ്പില് വന്ന കഥയില് ആകൃഷ്ടനായാണ് ആഷിക് പുതിയ ചിത്രമൊരുക്കാന് പ്ലാന് ചെയ്തതെന്ന് സൂചനകളുണ്ട്.
വ്യത്യസ്ത കഥയും ട്രീറ്റ്മെന്റുമാണ് ഇടുക്കി ഗോള്ഡിന്റെ പ്ലസ് പോയിന്റായി സംവിധായകന് കണ്ടതത്രേ. തീവ്രവാദ വിരുദ്ധ സ്ക്വാഡ് തലവനായി വിരമിച്ചതിന് ശേഷം നാട്ടില് തിരിച്ചെത്തിയ വ്യക്തിയെപ്പറ്റിയാണ് കഥ നടക്കുന്നത്. സ്കൂളിലെ പഴയസഹപാഠികളെ കാണണമെന്നാഗ്രഹിച്ച ഇയാള് പത്രത്തിലൊരു പരസ്യം നല്കുന്നു. ഏതാനും ദിവസത്തിന് ശേഷം ഈ പരസ്യം കണ്ട് ഒരാളെത്തുന്നു. ഏഴാം ക്ലാസില് പഠിച്ച ഈ കൂട്ടുകാരന് എല്ലാം തികഞ്ഞൊരു കള്ളനാണെന്നറിയുന്നതോടെ ഇടുക്കി ഗോള്ഡിന്റെ കഥ മാറിമറിയുകയാണ്.
സാള്ട്ട് ആന്റ് പെപ്പര് പോലെ ഇടുക്കി ഗോള്ഡും മലയാളിയ്ക്ക് ആസ്വാദനത്തിന്റെ പുത്തന് രുചിക്കൂട്ടുകള് സമ്മാനിയ്ക്കുമെന്ന് തന്നെ പ്രതീക്ഷിയ്ക്കാം.
Continue with Google