വീണ്ടുമൊരു രതിചിത്രം വരുന്നു; ഇണയെ തേടി

രതിനിര്‍വേദമെന്ന പഴയ ക്ലാസിക് ചിത്രത്തിന്റെ റീമേക് ജനങ്ങള്‍ സ്വീകരിച്ചതിന്റെ ട്രന്‍ഡില്‍ മറ്റൊരു പഴയകാല രതിചിത്രം കൂടി പ്രദര്‍ശനത്തിനെത്തുന്നു. തെന്നിന്ത്യയുടെ മാദകറാണിയായിരുന്ന സില്‍ക് സ്മിത അഭിനയിച്ച ഇണയെത്തേടി എന്ന ചിത്രമാണ് പുതിയ ഭാവത്തിലെത്തുന്നത്.

അന്നത്തെകാലത്ത് ഏറെ തരംഗം സൃഷ്ടിച്ച ഒരു ചിത്രമായിരുന്നു ഇത്. ഭരത് രാജ് എന്ന നവാഗതസംവിധായകനാണ് ഇണയെ തേടി റീമേക് ചെയ്യുന്നത്. കാള്‍ട്ടണ്‍ ഫിലിംസിന്റെ ബാനറില്‍ ലിവ്‌സാണ് ചിത്രം നിര്‍മ്മിക്കുന്ന.

ചിത്രത്തിന്റെ റീമേക് പദ്ധതി നേരിടുന്ന ഏറ്റവും വലിയ വെല്ലുവിളി സ്മിത അവതരിപ്പിച്ച റോള്‍ ഏത് നടി ഏറ്റെടക്കുമെന്നതാണ്. മലയാളത്തില്‍ ഇതിന് സന്നദ്ധരായി ആരുമുണ്ടാവില്ലെന്നതിനാല്‍ തമിഴില്‍ നിന്ന് ആരെയെങ്കിലും കൊണ്ടുവരാനാണ് ശ്രമം നടക്കുന്നത്. ഓഗസ്‌റ്റോടെ ചിത്രത്തിന്റെ ഷൂട്ടിങ് ആരംഭിക്കുമെന്നാണ് റിപ്പോര്‍ട്ടുകള്‍ .

സ്മിത മലയാളത്തിലാദ്യമായി നായികവേഷത്തിലെത്തിയ ചിത്രമാണ് 1981ല്‍ ഇറങ്ങിയ ഇണയെ തേടി. ഇതിനൊപ്പം തന്നെ തിരക്കഥാകൃത്ത് ജോണ്‍ പോള്‍, സംഗീതസംവിധായകന്‍ ജോണ്‍സണ്‍, സംവിധായകന്‍ ആന്റണി ഈസ്റ്റ്മാന്‍ തുടങ്ങിയവരുടെ അരങ്ങേറവും ഈ ചിത്രത്തിലൂടെയായിരുന്നു