അനൂപ് മേനോന്‍ ഹോട്ടല്‍ കാലിഫോര്‍ണിയയില്‍

അനൂപ് മേനോന്റെ പുതിയ ചിത്രമായ ഹോട്ടല്‍ കാലിഫോര്‍ണിയയുടെ അണിയറ പ്രവര്‍ത്തനങ്ങള്‍ ആരംഭിച്ചു. അനുപ് മേനോന്‍ ഏറെ പഴികേട്ട ട്രിവാന്‍ഡ്രം ലോഡ്ജിനു സമാനമാണ് പുതിയ സിനിമയെന്ന് സൂചനയുണ്ട്. ലോഡ്ജിനു പകരം ഇത്തവണ ഫ്‌ളൈറ്റില്‍ നിന്നാണ് ഡയലോഗ് എന്നു മാത്രം. പക്ഷേ, ഇത്തവണ ഹാസ്യത്തിന് അല്‍പ്പം പ്രാധാന്യം കൂടുമെന്നു മാത്രം.

അനൂപ് മേനോന്‍, ജയസൂര്യ, സൈജു കുറുപ്പ്, ബാബു ആന്റണി, ധ്വനി, മരിയാ റോയ് എന്നിവരാണ് താരങ്ങള്‍. ഷൂട്ടിങ് ഡിസംബര്‍ 21 ഓടുകൂടി മുംബൈയില്‍ ആരംഭിക്കും. ഫൈഌറ്റ് സീനുകള്‍ ഹൈദ്രാബാദിലെ രാമോജി ഫിലിം സിറ്റിയില്‍ നടക്കും.

ഐലവ് മി എന്ന സിനിമയുടെ ഷൂട്ടിങിനുശേഷമാണ് അനൂപ് പുതിയ പടത്തിനെത്തുന്നത്. ബി ഉണ്ണികൃഷ്ണന്‍ സംവിധാനം ചെയ്യുന്ന ഐലവ് മിയില്‍ ആസിഫ് അലി, ഉണ്ണിമുകുന്ദന്‍ എന്നിവരാണ് അനൂപിനൊപ്പം അഭിനയിക്കുന്നത്.

അനൂപ് മേനോന്‍-ജയസൂര്യ ഹിറ്റ് കൂട്ടുകെട്ട് ക്ലിക്കാകുമെന്നാണ് സംവിധായകന്‍ അജിജോണിന്റെ പ്രതീക്ഷ. നേരത്തെ ഈ ചിത്രത്തിന് പുഷ്പകവിമാനം എന്നു പേര് നല്‍കാനാണ് തീരുമാനിച്ചിരുന്നത്. ദുബൈയില്‍ നിന്നും മുംബൈ വഴി കൊച്ചിയിലേക്ക് യാത്ര ചെയ്യുന്ന അഞ്ചു പേരുടെ കഥയാണിത്.