ആസിഫ് അലിയും അജു വര്‍ഗ്ഗീസും പിന്നെയും ആ എ പടത്തില്‍, വീണ്ടും കിളിപോയി!!

മാറിയ സാഹചര്യത്തില്‍

കിളി പോയി എന്ന ചിത്രത്തിന് ശേഷം ആ പാറ്റേണില്‍ പുറത്തിറങ്ങിയ ചിത്രങ്ങള്‍ പ്രേക്ഷകര്‍ അംഗീകരിച്ചിരുന്നു. അതിന് ശേഷമാണ് കിളി പോയി എന്ന ചിത്രത്തിന്റെ മികവ് പ്രേക്ഷകര്‍ തിരിച്ചറിഞ്ഞത്. ഈ മാറിയ സാഹചര്യത്തില്‍ ചിത്രത്തിന്റെ രണ്ടാം ഭാഗം ഒരുക്കാനാണ് സംവിധായകന്റെ ഒരുക്കം.

വീണ്ടും കിളിപോയി

കിളി പോയി എന്ന ചിത്രം പരാജയമായിരുന്നില്ല. ആ ഗണത്തിലുള്ള സിനിമകള്‍ പ്രേക്ഷകരിപ്പോള്‍ അംഗീകരിച്ചുതുടങ്ങിയിരിക്കുന്നു. അതുകൊണ്ടാണ് 'വീണ്ടും കിളിപോയി' എന്ന പേരില്‍ ചിത്രത്തിന്റെ രണ്ടാം ഭാഗം ഒരുക്കുന്നത് എന്ന് സംവിധായകന്‍ വിനയ് പറയുന്നു.

കോമഡിയാണ് ലക്ഷ്യം

കിളിപോയി എന്ന പേര് കേള്‍ക്കുമ്പോള്‍ അത് അമിതമായി ലഹരി ഉപയോഗത്തെ പ്രോത്സാഹിപ്പിക്കുന്ന വാക്കാണ് എന്ന തെറ്റിദ്ധാരണയാണ് പൊതുവെ സമൂഹത്തില്‍ പരത്തിയത്. എന്നാല്‍ തീര്‍ത്തുമൊരു കോമഡി ചിത്രമായിരുന്നു കിളിപോയി. 2013 ല്‍ ഉള്ള അവസ്ഥയല്ല ഇപ്പോള്‍ കേരളത്തില്‍. സമൂഹത്തിന്റെ ചിന്താഗതി മാറിയിട്ടുണ്ട്. അതുകൂടെ ഉള്‍ക്കൊള്ളിച്ചാണ് പുതിയ ചിത്രം എന്ന് സംവിധായകന്‍ പറഞ്ഞു.

ആരൊക്കെയാണ് താരങ്ങള്‍

നിലവില്‍ തിരക്കഥ പൂര്‍ത്തിയാക്കുന്ന തിരക്കിലാണ്. ആസിഫ് അലിയും അജു വര്‍ഗ്ഗീസും മാത്രമാണ് ഇതുവരെ തീരുമാനിച്ച കഥാപാത്രങ്ങള്‍. തിരക്കഥ പൂര്‍ത്തിയായാല്‍ മറ്റ് താരങ്ങളെ തീരുമാനിക്കും. എബി തോട്ടുംപുറമാണ് ചിത്രം നിര്‍മിയ്ക്കുന്നത്- വിനയ് ഗോവിന്ദ് പറഞ്ഞു