ഇര,ഒരു പദമല്ല വേദനയാണ്! അതിന്റെ ആഴം തിരിച്ചറിയുന്നു!ഇനി അങ്ങനെ വിളിക്കരുത് ആരെയും:നടിയുടെ സഹോദരന്‍

ഇരയുടെ വേദന

ഇര എന്ന പദം മുന്‍പ് പലപ്പോഴായി പല അവസരങ്ങളില്‍ ഉപയോഗിച്ചത് ഓര്‍ക്കുന്നതിനോടൊപ്പം തന്നെ ആ പദം തങ്ങളില്‍ ഉണ്ടാക്കുന്ന വേദനയെക്കുറിച്ചുമാണ് സംവിധായകന്‍ വിവരിച്ചിട്ടുള്ളത്.മുന്‍പ് പലരും ഈ പദം പല തരത്തില്‍ ഉപയോഗിച്ചതിനെക്കുറിച്ചും ഇപ്പോള്‍ ഓര്‍ത്തു പോവുകയാണെന്ന് അദ്ദേഹം പറയുന്നു.

പണ്ടും വേദനിപ്പിക്കുമായിരുന്നു

ഇര എന്ന പദം മുന്‍പും തന്നെ വേദനിപ്പിക്കുമായിരുന്നു. ഒറ്റപ്പെടലും പരാജയവും കണ്ണീരുമെല്ലാം കൂടിക്കലര്‍ന്ന് നിസ്സഹായതയുടെ ഒരു പരിവേഷമായിരുന്നു ആ പദം അന്ന് നല്‍കിയിരുന്നത്.

ഇപ്പോള്‍ അനുഭവിക്കുന്നത്

സഹോദരിയുടെ മാനത്തിന് മുകളില്‍ കൂടുതല്‍ തീവ്രതയോടെ ആ പദം നില്‍ക്കുകയാണ്. ജീവിതത്തില്‍ മുന്‍പെങ്ങും അനുഭവിക്കാത്തൊരു വേദന കൂടിയാണ് ഇപ്പോള്‍ അനുഭവിക്കുന്നതെന്നും സഹോദരന്‍ കുറിച്ചിട്ടുണ്ട്.

യാഥാര്‍ത്ഥ്യങ്ങള്‍ക്കു മുന്നില്‍ പകച്ചുപോകുന്നു

ജീവിത യാഥാര്‍ത്ഥ്യങ്ങള്‍ക്ക് മുന്നില്‍ പകച്ചുപോകുന്ന ഒരു വ്യക്തിയേയും
കുടുംബത്തെയും ഇര എന്ന പദം എത്രത്തോളം വേദനിപ്പിക്കുമെന്നത് കൂടി ഇപ്പോള്‍ തിരിച്ചറിയുന്നുണ്ട്.

മാധ്യമലോകത്തോട് അപേക്ഷ

ഇര എന്നതിനും അപ്പുറത്ത് ആരെയും വേദനിപ്പിക്കാത്തൊരു പദം കണ്ടെത്താന്‍ മാധ്യമപ്രവര്‍ത്തകര്‍ക്ക് മുന്നില്‍ അപേക്ഷിക്കുകയാണ് അദ്ദേഹം. ഇര എന്ന പദം അത്രമേല്‍ വേദനയാണ് ആ കുടുംബത്തിനെന്നും അദ്ദേഹം കുറിച്ചിട്ടുണ്ട്.