അങ്ങനെയൊന്നും ആകാന്‍ ദിലീപിന് ഒരിക്കലും കഴിയില്ല; കൊച്ചിന്‍ ഹനീഫയുടെ വിധവ പറയുന്നു

ദിലീപ് സഹോദരതുല്യന്‍

സ്വന്തം സഹോദരനെ പോലെയാണ് എനിക്ക് ദിലീപ്. ദിലീപിനോട് എന്ത് സങ്കടവും പറയാം. നമുക്കാരൊക്കെയോ ഉണ്ട് എന്ന് തോന്നള്‍ ദിലീപുള്ളപ്പോള്‍ ഉണ്ടാകും. ഏത് തിരക്കുകള്‍ക്കിടയിലും, എന്ത് പ്രശ്‌നം പറഞ്ഞാലും അദ്ദേഹം പരിഹരിച്ചു തരും. അദ്ദേഹം ഞങ്ങളോട് കാണിയ്ക്കുന്ന കരുതലും ശ്രദ്ധയും വാക്കുകള്‍ കൊണ്ട് പറഞ്ഞു തീര്‍ക്കാന്‍ കഴിയില്ല.

ഇക്ക പോയതിന് ശേഷമുള്ള സഹായം

ഇക്ക പോയതിന് ശേഷം ഏറെ വിഷമങ്ങളിലൂടെയാണ് ഞങ്ങള്‍ കടന്നുപോയത്. സിനിമാ രംഗത്ത് നിന്ന് ആദ്യം ഞങ്ങളെ സഹായിച്ചത് ദിലീപാണ്. വ്യക്തിപരമായും ദിലീപ് സഹായിക്കും. താരസംഘടനയായ അമ്മയില്‍ നിന്നുള്ള സഹായം എത്തുന്നതിന് മുന്‍പേ ദിലീപിന്റെ കരുതല്‍ എത്തിയിരുന്നു. സ്വന്തം കുടുംബാഗത്തെ പോലെ ഞങ്ങളുടെ എല്ലാ കാര്യങ്ങളും അദ്ദേഹം ശ്രദ്ധിച്ചു.

കൂടുതല്‍ പറയാത്തതിന് കാരണം

സാമ്പത്തികമായും അല്ലാതെയും ദിലീപ് ചെയ്ത സഹായങ്ങള്‍ ഏറെയാണ്. താന്‍ ചെയ്ത ഉപകാരങ്ങള്‍ പുറത്ത് പറയരുതെന്ന് ദിലീപിന് നിര്‍ബന്ധം ഉള്ളതുകൊണ്ട് കൂതുതലായി ഞാന്‍ ഒന്നും പറയുന്നില്ല. ഒന്ന് മാത്രം പറയാം, ഒരു വിളിപ്പാടകലെ വിളികേള്‍ക്കാന്‍ അദ്ദേഹമുണ്ട്. തിരക്കുകള്‍ക്കിടയില്‍ ഫോണ്‍ എടുക്കാന്‍ കഴിഞ്ഞില്ലെങ്കില്‍ കുറച്ച് കഴിഞ്ഞാല്‍ വിളിച്ചിട്ട് 'സോറി ഇത്താ' എന്നാണ് ആദ്യം പറയുന്നത്.

ദിലീപിന് വേണ്ടി പ്രാര്‍ത്ഥനയോടെ

ഈ ദിവസങ്ങളില്‍ ദിലീപിന് വേണ്ടി പ്രാര്‍ത്ഥനയോടെയും കണ്ണീരോടെയും കഴിച്ചു കൂട്ടുകയാണ് ഞങ്ങള്‍. ഒരിക്കലും ദിലീപെന്ന വ്യക്തി ഇങ്ങനെയൊന്നും ചെയ്യില്ലെന്ന് അദ്ദേഹത്തെ അറിയാവുന്നവര്‍ക്ക് അറിയാം. അങ്ങനെയൊന്നും ആകാന്‍ ദിലീപിനെക്കൊണ്ടാകില്ല. അതാണ് വാസ്തവം. എന്നായാലും സത്യം ജയിക്കും. അന്ന് ചെയ്ത തെറ്റുകള്‍ ഓര്‍ത്ത് ദുഖിച്ചിട്ട് കാര്യമില്ല- കൊച്ചിന്‍ ഹനീഫയുടെ വിധവ ഫസീല പറഞ്ഞു