കോഴിക്കോട് വെച്ചാണ് ധ്യാന്‍ ആ ഗൂഢാലോചന നടത്തിയത്.. അജുവും ശ്രീനാഥ് ഭാസിയും ഒപ്പമുണ്ട്!

കോഴിക്കോട് നിന്നും തുടക്കം

ധ്യാന്‍ ശ്രീനിവാസന്‍ തിരക്കഥയെഴുതി അഭിനയിക്കുന്ന ചിത്രം ഗൂഢാലോചനയുടെ ചിത്രീകരണം കോഴിക്കോട് പുരോഗമിച്ചു കൊണ്ടിരിക്കുകയാണ്. കോഴിക്കോടന്‍ പശ്ചാത്തലത്തിലുള്ള കഥയുമായാണ് ധ്യാന്‍ എത്തുന്നത്.

മോഷന്‍ പോസ്റ്റര്‍ വൈറലായി

കഴിഞ്ഞ ദിവസമായിരുന്നു ചിത്രത്തിന്റെ മോഷന്‍ പോസ്റ്റര്‍ പുറത്തുവിട്ടത്. ഇതിനോടകം തന്നെ ഈ വീഡിയോ സോഷ്യല്‍ മീഡിയയിലൂടെ വൈറലായിക്കഴിഞ്ഞു. ചിത്രത്തിലെ കഥാപാത്രങ്ങളെക്കുറിച്ചുള്ള പരിചയപ്പെടുത്തലാണ് ഈ വീഡിയോ.

കോഴിക്കോടിനെക്കുറിച്ചുള്ള ഗാനം

പശ്ചാത്തലത്തില്‍ കോഴിക്കോടിനെക്കുറിച്ചുള്ള ഗാനവുമായാണ് മോഷന്‍ പോസ്റ്റര്‍ എത്തിയത്. ധ്യാന്‍ ശ്രീനിവാസന്‍, അജു വര്‍ഗീസ്, മംമ്ത മോഹന്‍ദാസ് തുടങ്ങിയവര്‍ പ്രധാന കഥാപാത്രങ്ങളായെത്തുന്ന ചിത്രം സംവിധാനം ചെയ്യുന്നത് നവാഗതനായ തോമസ് സെബാസ്റ്റ്യനാണ്.

ചിത്രത്തിന്റെ പ്രമേയം

ഗൂഢാലോചന എന്ന വാക്ക് കേള്‍ക്കുമ്പോള്‍ തെറ്റിദ്ധരിക്കേണ്ട ഇത് നാല് സുഹൃത്തുക്കളുടെ കഥയാണ്. കോഴിക്കോട്ടുകാരായ അവര്‍ നടത്തുന്ന ഗൂഢാലോചനയിലൂടെയാണ് ചിത്രം സഞ്ചരിക്കുന്നത്.

അച്ഛന്റെയും ചേട്ടന്റെയും പേര് കളങ്കപ്പെടുത്തുമോ?

അഭിനയത്തില്‍ മാത്രമല്ല എഴുത്തിലും മികവ് തെളിയിച്ചിട്ടുള്ളവരാണ് ധ്യാനിന്റെ അച്ഛനും ചേട്ടനും. ശ്രീനിവാസന്‍ തിരക്കഥയൊരുക്കിയ ചിത്രങ്ങള്‍ ഇന്നും പ്രേക്ഷകര്‍ ഓര്‍ത്തിരിക്കുന്നുണ്ട്. സംവിധാനം മാത്രമല്ല എഴുത്തും തന്നെക്കൊണ്ട് കഴിയുമെന്ന് വിനീതും തെളിയിച്ചതാണ്. അതുകൊണ്ട് തന്നെ ധ്യാനിന്റെ എഴുത്തിലെ തുടക്കത്തെ ആകാംക്ഷയോടെയാണ് ആരാധകര്‍ നോക്കിക്കാണുന്നത്.

നായികയായി എത്തുന്നത്

ലോഹം എന്ന സിനിമയിലൂടെ തുടക്കം കുറിച്ച നിരഞ്ജന അനൂപാണ് ചിത്രത്തില്‍ നായികയായി എത്തുന്നത്. അലന്‍സിയര്‍. ഹരീഷ് കണാരന്‍ തുടങ്ങിയവരും ചിത്രത്തില്‍ പ്രധാന കഥാപാത്രങ്ങളായി എത്തുന്നുണ്ട്.