ജയസൂര്യ തറയില്‍ കിടന്നുരുണ്ട് കളള് കുടിച്ചയാളുടെ ശരീരവും വേഷവുമാക്കി, നടനെ കുറിച്ച് പ്രജേഷ് സെന്‍

അതേസമയം ജയസൂര്യയെ കുറിച്ച് മനോരമക്ക് നല്‍കിയ അഭിമുഖത്തില്‍ പ്രജേഷ് സെന്‍ മനസുതുറന്നിരുന്നു. എന്തുക്കൊണ്ടാണ് പുതിയ ചിത്രവും ജയസൂര്യയുടെ കൂടെ ചെയ്തത് എന്നതിന് മറുപടിയും നല്‍കിയാണ് സംവിധായകന്‍ എത്തിയത്. ജയസൂര്യ തന്‌റെ അടുത്ത സുഹൃത്താണെന്ന് പ്രജേഷ് സെന്‍ പറയുന്നു. ക്യാപ്റ്റനില്‍ നിന്ന് എനിക്ക് കിട്ടിയ ഒരു എനര്‍ജി ഉണ്ട്.

ജയേട്ടനെ കൊണ്ട് നമുക്ക് എന്തും ചെയ്യിക്കാന്‍ പറ്റും. ചാടാന്‍ പറഞ്ഞാല്‍ പറക്കുന്ന മനുഷ്യനാണ് ജയസൂര്യ. അങ്ങനെ പറയാനാണ് എനിക്കിഷ്ടം. ഡെഡിക്കേഷന്‌റെ അങ്ങേയറ്റം. എന്ത് ചെയ്യാന്‍ പറഞ്ഞാലും ഇത് ചെയ്യണോ എന്ന് ചോദിക്കില്ല. പിന്നെന്താ നമുക്ക് ചെയ്യാം ഞാന്‍ റെഡി എന്ന് പറയും, സംവിധായകന്‍ പറയുന്നു.

വെളളത്തില്‍ ജയേട്ടന്‍ കളളുകുടിച്ച് രാത്രി വീട്ടില്‍ വരുന്ന ഒരു സീനുണ്ട്. മുഷിഞ്ഞ വേഷത്തിലാണ് വരേണ്ടത്. കോസ്റ്റിയൂം ഇട്ടു വന്നപ്പോ നല്ല വെളള വസ്ത്രം. ഡ്രസ് ഒന്ന് മുഷിപ്പിക്കണമല്ലോ എന്ന് ഞാന്‍ പറഞ്ഞു. ആ കോസ്റ്റ്യൂം വേറൊരാളുടെ കൈയ്യില്‍ കൊടുത്തുവിട്ട് അതു മോശമാക്കി കൊണ്ടുവരികയാണ് സാധാരണ ചെയ്യുക.

ഞാന്‍ നോക്കിയപ്പോള്‍ ജയസൂര്യ തറയില്‍ കിടന്നുരുളുന്നു. ഉരുണ്ടുരുണ്ട് കളളുകുടിച്ച് വീണ് വരുന്ന ഒരാളുടെ ശരീരവും വേഷവമുമാക്കി. അതാണ് അദ്ദേഹത്തിന്‌റെ ഡെഡിക്കേഷന്‍. അതുകൊണ്ടാണ് എനിക്ക് അദ്ദേഹത്തോടുളള ഇഷ്ടം.പ്രജേഷ് സെന്‍ പറഞ്ഞു അതേസമയം ജയസൂര്യ മുഴുകുടിയനായി എത്തുന്ന വെളളം ജനുവരി 22നാണ് തിയ്യേറ്ററുകളില്‍ എത്തുന്നത്. തീവണ്ടിയിലൂടെ ശ്രദ്ധേയായ സംയുക്ത മേനോനാണ് ചിത്രത്തിലെ നായിക. ഒപ്പം സിദ്ധിഖ്, സന്തോഷ് കീഴാറ്റൂര്‍, ബൈജു സന്തോഷ്, ശ്രീലക്ഷ്മി, ജോണി ആന്റണി, നിര്‍മ്മല്‍ പാലാഴി തുടങ്ങിയവരും മറ്റു പ്രധാന വേഷങ്ങളിലെത്തുന്നു. ബിജിബാലാണ് ജയസൂര്യ ചിത്രത്തിലെ പാട്ടുകള്‍ ഒരുക്കിയിരിക്കുന്നത്. റോബി വര്‍ഗീസ് രാജ് ഛായാഗ്രഹണവും നിര്‍വ്വഹിച്ചിരിക്കുന്നു.