ഗര്‍ഭശ്രീമാന്‍ മോഷണം തന്നെ; 5ലക്ഷം രൂപ കെട്ടിവെയ്ക്കണം

പുരുഷഗര്‍ഭം പ്രമേയമാക്കി ഒരുക്കിയ ഗര്‍ഭശ്രീമാന്‍ എന്ന ചിത്രത്തിന്റെ തിരക്കഥ മോഷ്ടിച്ചതുതന്നെയാണെന്ന് കോടതി കണ്ടെത്തി. ഇതിനെത്തുടര്‍ന്ന് അഞ്ച് ലക്ഷം രൂപ ബാങ്ക് ഗ്യാരണ്ടി കെട്ടിവച്ചശേഷം ചിത്രം റിലീസ് ചെയ്യാന്‍ കോടതി അനുമതി നല്‍കി. സുരാജ് വെഞ്ഞാറമൂടിനെ നായകനാക്കി ഒരുക്കിയ ഈ ചിത്രം സംവിധാനം ചെയ്തത് അനില്‍ ഗോപിനാഥാണ്.

പെരുമ്പാവൂര്‍ സ്വദേശിയായ സുധീഷ് കുമാറാണ് ചിത്രം മോഷണമാണെന്ന് കാണിച്ച് കോടതിയെ സമീപിച്ചത്. ചിത്രത്തിന്റെ നിര്‍മ്മാതാവായ ടിഎസ് ജയകുമാര്‍, അനില്‍ ഗോപിനാഥ്, ഹാരിഷ് പി, സുവചന്‍ എന്നിവര്‍ക്കെതിരെയായിരുന്നു കേസ്. 2008ല്‍ താന്‍ എഴുതിയ തിരക്കഥ ഗര്‍ഭശ്രീമാന്റെ അണിയറക്കാര#് മോഷ്ടിച്ചതാണെന്നായിരുന്നു സുധീഷിന്റെ ആരോപണം. കോടതിയില്‍ ഹാജരാക്കിയ തെളിവുകള്‍ പരിശോധിച്ച കോടതി തിരക്കഥാ മോഷണം നടന്നിട്ടുണ്ടെന്ന് കണ്ടെത്തുകയായിരുന്നു.

സുവചന്‍ എഴുതിയ ചിത്രത്തിന്റെ തിരക്കഥയില്‍ സുധീഷ് സമര്‍പ്പിച്ച തിരക്കഥയുമായി വലിയ സാമ്യമുണ്ടെന്ന് കോടതി വിധിന്യായത്തില്‍ ചൂണ്ടിക്കാട്ടി. തിരക്കഥ മോഷ്ടിച്ചതാണെങ്കിലും ചിത്രത്തിന്റെ നിര്‍മ്മാണത്തിനായി മുടക്കിയ വന്‍തുകയും റിലീസ് തീയതി അടുത്തുവരുന്നതും കണക്കിലെടുത്താണ് കോടതി 5ലക്ഷം രൂപ കെട്ടിവച്ചാല്‍ ചിത്രം റിലീസ് ചെയ്യാമെന്ന് വ്യക്തമാക്കിയത്.