വാപ്പയും മോനും ഒരുമിച്ച് അഭിനയിക്കുന്നു; ഒപ്പം എൺപതുകളിലെ നായികമാരും, വാർത്തയിലെ സത്യമിങ്ങനെ!

സിനിമയിലെത്തിയിട്ട് ഒമ്പത് വർഷമായെങ്കിലും മമ്മൂട്ടിക്കൊപ്പം ദുൽഖർ അഭിനയിച്ചിട്ടില്ല. ഓരോ സിനിമ പ്രേമിയും കാത്തിരിക്കുന്ന ഒരു നിമിഷം കൂടിയാണ് ദുൽഖറും മമ്മൂട്ടിയും ഒരുമിച്ച് അഭിനയിക്കുന്ന സിനിമ വരികയെന്നത്. ആ ആ​ഗ്രഹത്തിന് വെളിച്ചം പകരുന്ന ഒരു ഫേസ്ബുക്ക് പോസ്റ്റാണ് ഇപ്പോൾ വ്യാപകമായി പ്രചരിക്കുന്നത്. ദുൽഖർ സൽമാനും മമ്മൂട്ടിയും ഒരുമിച്ച് അഭിനയിക്കുന്ന സിനിമയെടുക്കാനുള്ള പ്രവർത്തനങ്ങൾ അണിയറയിൽ പുരോ​ഗിക്കുന്നു എന്നായിരുന്നു സോഷ്യൽമീഡിയ പോസ്റ്റിലുണ്ടായിരുന്നത്. റിപ്പോർട്ടുകൾ പ്രത്യക്ഷപ്പെട്ടതോടെ വാപ്പയേയും മകനേയും ഒരുമിച്ച് സ്ക്രീനിൽ കാണാനുള്ള ആവേശത്തിലാണ് ആരാധകർ. മമ്മൂട്ടി ഫാൻസ് ഇൻ്റർനാഷണൽ എന്ന സോഷ്യൽ മീഡിയ ഗ്രൂപ്പിലാണ് ഇത്തരത്തിലുള്ള റിപ്പോർട്ട് പ്രചരിക്കുന്നത്. ലാൽ സലാം എന്ന ഫേസ്ബുക്ക് യൂസറാണ് ഇക്കാര്യം ഷെയർ ചെയ്തിരിക്കുന്നത്.

ഇരുവരെയും പ്രധാന കഥാപാത്രങ്ങളാക്കി വൈശാഖാണ് ചിത്രം സംവിധാനം ചെയ്യുന്നതെന്നും സിനിമ നിർമിക്കുന്നതെന്നും റിപ്പോർട്ടുകളിൽ പറയുന്നു. ഉണ്ണി ആറാണ് ചിത്രത്തിൻ്റെ തിരക്കഥ ഒരുക്കുന്നതെന്നും റിപ്പോർട്ടിൽ പറയുന്നുണ്ട്. കൂടാതെ സിനിമയുടെ മറ്റൊരു പ്രത്യേകതയായി പറയുന്നത് എൺപത് തൊണ്ണൂറ് കാലഘട്ടങ്ങളിൽ തെന്നിന്ത്യയിൽ സൂപ്പർസ്റ്റാറുകളുടെ നായികമാരായി തിളങ്ങിയ സുമലതയും സുഹാസിനിയും വീണ്ടും മലയാള സിനിമയുടെ ഭാ​ഗമാകുന്നുവെന്നും ശോഭനയും ചിത്രത്തിൽ അഭിനയിക്കും എന്നതുമാണ്. ഔദ്യോ​ഗികമായി ഈ സിനിമയെ കുറിച്ച് പ്രഖ്യാപനങ്ങളൊന്നും വന്നിട്ടില്ലാത്ത സ്ഥിതിയ്ക്ക് വാർത്ത വിശ്വസിക്കാനും സാധ്യമല്ല. ദുൽഖർ സിനിമയിലേക്ക് എത്തിയപ്പോൾ മുതൽ മമ്മൂട്ടിയോട് പലരും ചോദിക്കുന്നതും ഇപ്പോഴും ചോദിച്ചുകൊണ്ടിരിക്കുന്നതുമായ ഒന്നാണ് എന്നാണ് ദുൽഖറിനൊപ്പം സിനിമ ചെയ്യുന്നത് കാണാൻ സാധിക്കുക എന്നത്. കൃത്യമായി ഒരു ഉത്തരം മമ്മൂട്ടി ഇതുവരെ നൽകിയിട്ടില്ല. സംഭവിക്കുമ്പോൾ സംഭവിക്കട്ടെയെന്നാണ് അദ്ദേഹം പറഞ്ഞിരിക്കുന്നത്.

Recommended Video

Dulquer Salmaan Exclusive Interview | FilmiBeat Malayalam

ദുൽഖർ സിനിമകൾക്ക് പ്രമോഷൻ പോലും നൽകാറില്ലാത്ത വ്യക്തിയാണ് മമ്മൂട്ടി. ആദ്യമായി ദുൽഖറിന്റെ ഒരു സിനിമയുടെ പോസ്റ്റർ ഷെയർ ചെയ്തത് കുറുപ്പിന്റെ റിലീസിന് മുന്നോടിയായാണ്. ദുൽഖറിന്റെ മകളുടെ ചിത്രങ്ങൾ മമ്മൂട്ടി പങ്കുവെക്കാറുണ്ടെങ്കിലും മകന്റെ സിനിമാ പ്രവർത്തങ്ങൾക്കും സിനിമയിലെ വളർച്ചയ്ക്കും വേണ്ടി തന്റെ സ്റ്റാർഡമോ പേരോ ഒന്നും മമ്മൂട്ടി ഇതുവരെ ഉപയോ​ഗിച്ചിട്ടില്ല. താനും അത്തരത്തിൽ ഒരു ആവശ്യം പറഞ്ഞ് വാപ്പിച്ചിയെ സമീപിച്ചിട്ടില്ലെന്നാണ് ദുൽഖറും പലപ്പോഴും പറഞ്ഞിട്ടുള്ളത്. മുമ്പും പലതവണ മമ്മൂട്ടിയും മകൻ ദുൽഖർ സൽമാനും ഒന്നിക്കുന്ന സിനിമ വരുന്നുവെന്ന താരത്തിൽ വാർത്തകൾ പ്രചരിച്ചിരുന്നു. നാഗേശ്വരറാവു, നാഗാര്‍ജ്ജുന, നാഗചൈതന്യ എന്നിവർ പ്രധാന വേഷത്തിലെത്തിയ തെലുങ്ക് ചിത്രം മനത്തിന്റെ മലയാളം റീമേക്കിലാണ് ഇരുവരും ഒന്നിക്കുന്നതെന്നായിരുന്നു അന്ന് വാർത്തകളും റിപ്പോർട്ടുകളും. എന്നാൽ അത് വെറും ​​ഗോസിപ്പ് മാത്രമായി അവസാനിച്ചു.