സിനിമകള്‍ എത്രയായിട്ടും മമ്മൂട്ടിക്ക് മതിയാകുന്നില്ല... പുതിയ സിനിമ 'ഡബിള്‍സ്' സംവിധായകനൊപ്പം!

ഏറ്റവും പുതിയ ചിത്രം

ഡബിള്‍ എന്ന സിനിമ സംവിധാനം ചെയ്ത സോഹന്‍ സീനുലാലാണ് പുതിയ മമ്മൂട്ടി ചിത്രം സംവിധാനം ചെയ്യുന്നത്. ചിത്രത്തിന്റെ പേരോ മറ്റ് വിവരങ്ങളോ പുറത്ത് വിട്ടിട്ടില്ല. കേന്ദ്ര സാഹിത്യ അക്കാദമി അവര്‍ഡ് ജേതാവ് പിവി ഷാജികുമാറാണ് ചിത്രത്തിന് തിരക്കഥ ഒരുക്കുന്നത്.

മമ്മൂട്ടിക്കൊപ്പം രണ്ടാമതും

സോഹന്‍ സീനുലാല്‍ സംവിധാനം ചെയ്യുന്ന രണ്ടാമത്തെ മമ്മൂട്ടി ചിത്രമാണിത്. പിവി ഷാജികുമാറിനും മമ്മൂട്ടിക്കൊപ്പം ഇത് രണ്ടാമത്തെ ചിത്രമാണ്. രഞ്ജിത്തിന്റെ പുത്തന്‍പണം എന്ന ചിത്രത്തില്‍ കാസര്‍ഗോഡന്‍ ശൈലിയിലുള്ള സംഭാഷണമൊരുക്കിയത് ഷാജികുമാര്‍ ആയിരുന്നു.

നടനായ സംവിധായകന്‍

നടന്മാരായി മാറിയ സംവിധായകരിലെ ഒരാളാണ് സോഹന്‍ സീനുലാലും. മമ്മൂട്ടി ചിത്രം പുതിയ നിയമത്തില്‍ തുടങ്ങി പിന്നീട് നിരവധി ചിത്രത്തങ്ങളില്‍ സോഹന്‍ നിറ സാന്നിദ്ധ്യമായി. ഹാസ്യ കഥാപാത്രങ്ങളായിരുന്നു സോഹനെ തേടി എത്തിയത്.

പരാജയം രുചിച്ച ആദ്യ ചിത്രം

മമ്മൂട്ടി-നാദിയ മൊയ്തു താര ജോഡിയില്‍ ഏറെ പ്രതീക്ഷയോടെ എത്തിയ ചിത്രമായിരുന്നു ഡബിള്‍സ്. എന്നാല്‍ തിയറ്ററില്‍ പരാജയം നേരിടാനായിരുന്നു ചിത്രത്തിന്റെ വിധി. അന്നത്തെ ഹിറ്റ് തിരക്കഥാകൃത്തുക്കളായിരുന്നു സച്ചി സേതു ആയിരുന്നു ഡബിള്‍സിന്റെ തിരക്കഥ. സച്ചി സേതു ഒരുമിച്ച അവസാന ചിത്രവുമായിരുന്നു അത്.

ഷാജികുമാറിന്റെ തിരക്കഥ

പുതിയ മമ്മൂട്ടി ചിത്രത്തിന് തിരക്കഥ ഒരുക്കുന്നത് കഥാകൃത്തായ പിവി ഷാജികുമാറാണ്. കന്യക ടാക്കീസ്, ടേക്ക് ഓഫ് എന്നീ ചിത്രങ്ങളുടെ തിരക്കഥ ഒരുക്കിയതും ഷാജികുമാര്‍ ആയിരുന്നു. മമ്മൂട്ടിയെ നായകനാക്കി ഒരിക്കലൂടെ സോഹന്‍ സീനുലാല്‍ എത്തുമ്പോള്‍ ഹിറ്റില്‍ കുറഞ്ഞൊന്നും പ്രതീക്ഷിക്കുന്നില്ല.

അടുത്ത ചിത്രം അങ്കിള്‍

ആരാധകര്‍ ഏറെ പ്രതീക്ഷയോടെ കാത്തിരിക്കുന്ന മാസ്റ്റര്‍പീസ് പൂര്‍ത്തിയാക്കിയ ശേഷം ജോയ് മാത്യുവിന്റെ തിരക്കഥയില്‍ ഗിരീഷ് സംവിധാനം ചെയ്യുന്ന അങ്കിള്‍ എന്ന സിനിമയുടെ ചിത്രീകരണം ആരംഭിക്കും. അതിന് ശേഷമായിരിക്കും സോഹന്‍ സീനുലാല്‍ ചിത്രം ആരംഭിക്കുക.

പാതി വഴിയില്‍ പരോള്‍

പരസ്യ ചിത്ര സംവിധായകനായ ശരത് സന്ദിത് സംവിധാനം ചെയ്യുന്ന പരോള്‍ എന്ന ചിത്രം അതിന്റെ ആദ്യ ഷെഡ്യൂള്‍ പൂര്‍ത്തിയാക്കി. അതിന് ശേഷം മാസ്റ്റര്‍പീസിന്റെ അവസാന ഘട്ട ചിത്രീകരണത്തിലായിരുന്നു മമ്മൂട്ടി. മാസ്റ്റര്‍പീസ് നവംബര്‍ തിയറ്ററിലെത്തുമെന്നാണ് പ്രതീക്ഷിക്കുന്നത്.

രണ്ട് ചിത്രം

രണ്ട് സിനിമകളാണ് റിലീസ് കാത്ത് കഴിയുന്നത്. റാം സംവിധാനം ചെയ്ത തമിഴ് ചിത്രം പേരന്‍പ്, ക്യാമറാമാന്‍ ശ്യാംദത്ത് ആദ്യമായി സംവിധാനം ചെയ്ത തമിഴ്, മലയാളം സിനിമ സ്ട്രീറ്റ് ലൈറ്റ് എന്നിവയാണവ. ജവാന്‍ ഓഫ് വെള്ളിമലയ്ക്ക് ശേഷം പ്ലേ ഹൗസിന്റെ ബാനറില്‍ മമ്മൂട്ടിയാണ് സ്ട്രീറ്റ് ലൈറ്റ് നിര്‍മിക്കുന്നത്.

ഒരുപിടി ചിത്രങ്ങള്‍

ഇവ കൂടാതെ ഒരുപിടി ചിത്രങ്ങള്‍ മമ്മൂട്ടിയുടേതായി പ്രഖ്യാപനത്തിലുണ്ട്. ഉണ്ണി ആറിന്റെ തിരക്കഥയില്‍ ബേസില്‍ ജോസഫ് സംവിധാനം ചെയ്യുന്ന മമ്മൂട്ടി ചിത്രം, കോഴിത്തങ്കച്ചന്‍, പോക്കിരിരാജ രണ്ടാം ഭാഗം, സിബിഐ അഞ്ചാം ഭാഗം, നാദിര്‍ഷ സംവിധാനം ചെയ്യുന്ന ചിത്രം, ഹനീഫ് അദേനിയുടെ തിരക്കഥയില്‍ ഷാജി പാടൂര്‍ സംവിധാനം ചെയ്യുന്ന ചിത്രം എന്നിവ കൂടാതെ ലാല്‍ ജോസ്, ഓമര്‍ ലുലു ചിത്രങ്ങള്‍ എന്നിവയും പരിഗണനയിലുണ്ട്.