ആ കഥാപാത്രം തനിക്ക് ബോറടിച്ചു, അതുമായി ഇനി ബോളിവുഡിലേക്ക് ഇല്ലെന്ന് ഉറപ്പിച്ച് പാര്‍വ്വതി!

ഒരേ കഥാപാത്രം രണ്ട് ഭാഷകളില്‍

പാര്‍വ്വതി എന്ന നടിയെ മലയാളി പ്രേക്ഷകര്‍ക്ക് പ്രിയങ്കരിയാക്കിയ ഒരു ചിത്രമായിരുന്നു ബാഗ്ലൂര്‍ ഡെയ്‌സ്. മലയാളത്തില്‍ സൂപ്പര്‍ ഹിറ്റായ ചിത്രം തമിഴില്‍ റീമേക്ക് ചെയ്തപ്പോഴും സേറ എന്ന കഥാപാത്രത്തെ അവതരിപ്പിച്ചത് പാര്‍വ്വതി തന്നെയായിരുന്നു. തമിഴിലും സേറ ശ്രദ്ധിക്കപ്പെട്ടു. മലയാളത്തില്‍ നിന്ന് തമിഴിലേക്ക് എത്തിയപ്പോള്‍ പാര്‍വ്വതി മാത്രമാണ് ആവര്‍ത്തിക്കപ്പെട്ടത്.

സേറ ബോറടിച്ചു

തമിഴിന് പുറമെ തെലുങ്ക് ഹിന്ദി ഭാഷകളിലേക്കും സിനിമ റീമേക്ക് ചെയ്യുന്നുണ്ട്. ഇതില്‍ ഹിന്ദിയിലേക്ക് റീമേക്ക് ചെയ്യുമ്പോഴും സേറയെ അവതരിപ്പിക്കുന്നത് പാര്‍വ്വതി ആയിരിക്കുമോ എന്ന് ഒരു അഭിമുഖത്തില്‍ ചോദിച്ചപ്പോള്‍ ആ കഥാപാത്രത്തെ ഇനി അവതരിപ്പിക്കില്ലെന്ന് പാര്‍വ്വതി വ്യക്തമാക്കുകയുണ്ടായി. സേറ എന്ന കഥാപാത്രം തന്നെ ബോറടിപ്പിച്ച് തുടങ്ങിയെന്നും പാര്‍വ്വതി പറയുന്നു.

ഒരു റീമേക്കിനും ഇല്ല

ഒരു കഥാപാത്രം അത് എത്ര തന്നെ പ്രിയപ്പെട്ടതാണെങ്കിലും ആവര്‍ത്തിച്ച് ചെയ്യുമ്പോള്‍ ബോറടിക്കും എന്നാണ് പാര്‍വ്വതി പറയുന്നത്. അതുകൊണ്ട് തന്നെ ബാംഗ്ലൂര്‍ ഡെയ്‌സ് എന്നല്ല ഒരു ചിത്രത്തിന്റെ റീമേക്കിലും താന്‍ അഭിനയിക്കില്ല. ഇപ്പോള്‍ തന്നെ ബാംഗ്ലൂര്‍ ഡെയ്‌സിന്റെ തമിഴ് റീമേക്കിലും താന്‍ അഭിനയിച്ചുകഴിഞ്ഞെന്നും പാര്‍വ്വതി വ്യക്തമാക്കുന്നു.

സാധ്യത ആലിയ ഭട്ടിന്

ബാംഗ്ലൂര്‍ ഡെയ്‌സ് ബോളിവുഡിലേക്ക് റീമേക്ക് ചെയ്യുമ്പോള്‍ പാര്‍വ്വതി ചെയ്യുന്നതിനേക്കാള്‍ സംവിധായിക അഞ്ജലി മേനോന് താല്പര്യം അത് ആലിയ ഭട്ട് ചെയ്യുന്നതിനോട് ആയിരിക്കുമെന്നും പാര്‍വ്വതി പറയുന്നു. ഇര്‍ഫാന്‍ ഖാനൊപ്പം പാര്‍വ്വതി ബോളിവുഡിലേക്ക് അരങ്ങേറിയതോടെയാണ് ബാംഗ്ലൂര്‍ ഡെയ്‌സ് ഹിന്ദി പതിപ്പിലും പാര്‍വ്വതി സേറയെ അവതരിപ്പിക്കാനുള്ള സാധ്യത പ്രേക്ഷകര്‍ക്ക് തോന്നിയത്.

ബോളിവുഡിന്റെ ഭാഗമാകാന്‍ കഴിഞ്ഞത് സന്തോഷം

ബോളിവുഡില്‍ അരങ്ങേറ്റം കുറിക്കാന്‍ സാധിച്ചതിന്റെ സന്തോഷവും പാര്‍വ്വതി പങ്കുവയ്ക്കുന്നുണ്ട്. മറ്റ് ഭാഷകളില്‍ ചെയ്തത് തന്നെയാണ് അവിടേയും ചെയ്യുന്നത്. തുടക്കക്കാരിയായതിനാല്‍ അവിടുത്തെ മറ്റ് കാര്യങ്ങളേക്കുറിച്ച് വലിയ ധാരണയില്ല. വിദേശ യാത്രകളില്‍ ഇന്ത്യയില്‍ നിന്നുള്ള അഭിനേതാവാണ് എന്ന് പറയുമ്പോള്‍ ബോളിവുഡില്‍ നിന്നാണോ എന്നാണ് എല്ലാവരും ചോദിക്കുക.

റീമേക്ക് എളുപ്പപ്പണിയോ?

ഒരു ഭാഷയില്‍ ഹിറ്റായി മാറിയ ചിത്രങ്ങള്‍ മറ്റ് ഭാഷകളിലേക്ക് റീമേക്ക് ചെയ്യുക എന്നത് സംവിധായകര്‍ക്കും നിര്‍മാതാക്കള്‍ക്കും എളുപ്പപ്പണിയാണ്. ബാംഗ്ലൂര്‍ ഡെയ്‌സും, ബോഡിഗാര്‍ഡും, ദൃശ്യവും അത്തരത്തിലുള്ള ചിത്രങ്ങളാണ്. ഒരു ചിത്രത്തില്‍ ക്ലിക്കായാല്‍ പിന്നെ അതേ കഥാപാത്രങ്ങളെ തുടര്‍ച്ചയായി പലരും അവതരിപ്പിക്കേണ്ടി വരും. അഭിനേതാക്കളെ സംബന്ധിച്ച് ഈ ആവര്‍ത്തനം പലപ്പോഴും ബോറടിപ്പിക്കാന്‍ തുടങ്ങുമെന്നത് യാഥാര്‍ത്ഥ്യമാണ്.