പുലിമുരുകനല്ല, തെലുങ്കു നാട്ടില്‍ മന്യം പുലിയെത്തി; റിലീസ് ചെയ്തത് 350 ലധികം തിയേറ്ററുകളില്‍

പുലിമുരുകനല്ല തെലുങ്കില്‍ മന്യം പുലി

തെലുങ്കില്‍ പുലിമുരുകനല്ല മന്യം പുലിയെന്നാണ് ചിത്രത്തിന്റ പേര്. മോഹന്‍ലാല്‍ കഥാപാത്രത്തിന്റെ പേരിനും മാറ്റമുണ്ട്. മലയാളത്തില്‍ ലാല്‍ മുരുകനായി സ്‌ക്രീനിലെത്തിയപ്പോള്‍ തെലുങ്കില്‍ ലാലിന്റെ പേര് കുമാര്‍ എന്നാണ്.

മോഹന്‍ലാല്‍ തന്നെയാണ് ഡബ്ബിങ് നിര്‍വ്വഹിച്ചിരിക്കുന്നത്

മന്യം പുലിയില്‍ മോഹന്‍ലാല്‍ തന്നെയാണ് ഡബ്ബിങ് നിര്‍വ്വഹിച്ചിരിക്കുന്നതെന്നാണ് ചിത്രത്തിന്റെ പ്രത്യേകത. ആദ്യ തെലുങ്ക് ചിത്രം മനമന്തയിലും ലാല്‍ തന്നെയാണ് ഡബ്ബ് ചെയ്തിരുന്നത്. ജനതാഗാരേജില്‍ ലാലിനുവേണ്ടി ഡബ്ബിങ് നിര്‍വ്വഹിച്ചത് മറ്റൊരാളായിരുന്നു.

പീറ്റര്‍ഹെയിനിന്റെ ആക്ഷന്‍

പുലിമുരുകന്‍ ഏറെ ആകര്‍ഷിക്കപ്പെട്ടതിന്റെ ഒരു കാരണം പീറ്റര്‍ ഹെയിനിന്റെ ആക്ഷന്‍ കോറിയോഗ്രഫിയായിരുന്നു. തെലുങ്കു പ്രേക്ഷകരും ഈ രംഗങ്ങള്‍ക്കായി ആകാംക്ഷയോടെ കാത്തിരിക്കുന്നവരാണ്. ഇത് മന്യം പുലിയുടെയും വിജയത്തിനു കാരണമാവുമെന്നാണ് അണിയറപ്രവര്‍ത്തകരുടെ പ്രതീക്ഷ. വിജയ് ആന്‍ണി ചിത്രം ബെത്തലുഡുവാണ് മന്യംപുലിയുടെ മുഖ്യ എതിരാളി.

കോടികള്‍ ചിലവഴിച്ചുള്ള പ്രചരണം

കേരളത്തില്‍ പുലിമുരുകന്‍ റിലീസ് ചെയ്തതിനു സമാനമായി തെലുങ്കിലും കോടികളാണ് ചിത്രത്തിന്റെ പ്രചരണത്തിനായി ചിലവഴിച്ചിരിക്കുന്നത്. 125 കോടി ബോക്‌സോഫീസ് കളക്ഷന്‍ നേടിയ ചിത്രം തെലുങ്ക് ബോക്‌സോഫീസ് കണക്കുകള്‍ കൂടി ചേര്‍ക്കുമ്പോള്‍ 150 കോടി കടക്കുമെന്നാണ് പ്രതീക്ഷ. സരസ്വതി ഫിലിംസും ടോമിച്ചന്‍ മുളകുപ്പാടവും ചേര്‍ന്നാണ് മന്യം പുലി തിയറ്ററുകളിലെത്തിക്കുന്നത്.