നസ്‌റിയയല്ല, സമാന്ത തന്നെ വിജയ് യുടെ കാമുകി

തുപ്പാക്കി ചിത്ത്രതിന്റെ വിജയത്തിന് ശേഷം ഇളയദളപതി വിജയ് യും മുരുകദോസും ഒന്നിക്കുന്ന ചിത്രത്തില്‍ നായികയാകുന്നത് തെന്നിന്ത്യന്‍ സിനിമാലോകത്ത് ഇപ്പോള്‍ തിളങ്ങി നില്‍ക്കുന്ന നസ്‌റിയ നസീമാണെന്ന് വാര്‍ത്തകളുണ്ടായിരുന്നു. എന്നാല്‍ വിജയ് യുടെ നായികയായി ഈ ചിത്രത്തില്‍ കോളിവുഡിലെ യുവസുന്ദരി സമാന്തയെ ഉറപ്പിച്ചെന്നാണ് ഇപ്പോള്‍ കേള്‍ക്കുന്ന വാര്‍ത്ത.

വിജയ് യും മുരുകദോസും വീണ്ടും ഒന്നിക്കുന്നു എന്ന വാര്‍ത്തകള്‍ നേരത്തെ വന്നിരുന്നെങ്കിലും നായികയാരാണെന്ന കാര്യത്തില്‍ തീരുമാനമുണ്ടായിരുന്നില്ല. അപ്പോഴാണ് നസ്‌റിയ ഉള്‍പ്പടെയുള്ള നായികമാരുടെ പേരുകള്‍ ചേര്‍ത്ത് വാര്‍ത്തകള്‍ വാരാന്‍ തുടങ്ങിയത്. ഒടുവില്‍ ആ ഭാഗ്യം ലഭിച്ചത് 'നീതാനെ എന്‍ പൊന്‍ വസന്തം' എന്ന ചിത്രത്തിലൂടെ ശ്രദ്ധനേടിയ സമാന്തയ്ക്ക് തന്നെ.

ആദ്യമായാണ് ഇളയദളപതിയുടെ നായികയായി സമാന്ത സ്‌ക്രീന്‍ പങ്കിടുന്നത്. ഇതുവരെ പേരിട്ടിട്ടില്ലാത്ത വിജയ്-മുരുകദോസ് കൂട്ടുകെട്ടില്‍ പിറക്കുന്ന ചിത്രം അടുത്തവര്‍ഷം ജനുവരിയില്‍ തിയേറ്ററിലെത്തിക്കാനാണ് തീരുമാനിച്ചിരിക്കുന്നത്. ചിത്രത്തിന് സംഗീതമൊരുക്കുന്നത് അനിരുദ്ധനും ക്യാമറ ചലിപ്പിക്കുന്നത് രാജാറാണിയിലൂടെ പ്രശസ്തനായ ഛായാഗ്രഹന്‍ ജോര്‍ജ് സി വില്യംസുമാണെന്നാണ് കേള്‍ക്കുന്നത്.

തുപ്പാക്കിയില്‍ വിജയുടെ നായികയായെത്തിയത് കാജല്‍ അഗര്‍വാളായിരുന്നു. ചിത്രത്തില്‍ ജയറാമും ഒരു മുഖ്യവേഷം ചെയ്തു.