വ്യത്യസ്തമായ ഒരു പ്രണയം, സന്തോഷ് പണ്ഡിറ്റിന്റെ നായികയായി മിനി റിച്ചാര്‍ഡ് !!

സന്തോഷ് പണ്ഡിറ്റ്

കൃഷ്ണനും രാധയും എന്ന ചിത്രം സംവിധാനം ചെയ്ത് നിര്‍മിച്ച് അഭിനയിച്ചുകൊണ്ടാണ് സന്തോഷ് പണ്ഡിറ്റ് രംഗത്തെത്തുന്നത്. നിലവാരമില്ലാത്ത ചിത്രമായിട്ടും സോഷ്യല്‍ മീഡിയയില്‍ സന്തോഷ് പണ്ഡിറ്റിന്റെ സിനിമകള്‍ക്ക് കാഴ്ചക്കാരുണ്ടായി. നെഗറ്റീവ് പബ്ലിസിറ്റിയിലൂടെ വളര്‍ന്ന സിനിമാക്കാരനാണ് സന്തോഷ് പണ്ഡിറ്റ്. വിമര്‍ശനങ്ങളെയും കളിയാക്കലിനെയും സന്തോഷ് പണ്ഡിറ്റ് പ്രശംസകളായി എടുത്തു.

മിനി റിച്ചാര്‍ഡ്

ലേഡീ സന്തോഷ് പണ്ഡിറ്റ് എന്നാണ് മിനി റിച്ചാര്‍ഡ് അറിയപ്പെടുന്നത്. അന്ന് മഴയില്‍ എന്ന ആല്‍ബത്തിലൂടെയാണ് മിനി റിച്ചാര്‍ഡ് ശ്രദ്ധ നേടിയത്. ഈ വീഡിയോയും നെഗറ്റീവ് പബ്ലിസിറ്റിയിലൂടെയാണ് ശ്രദ്ധിക്കപ്പെട്ടത്. വിമര്‍ശനങ്ങളെ മിനിയും കാര്യമാക്കി എടുത്തില്ല. അമേരിക്കന്‍ മലയാളിയായ മിനി കോട്ടയം കുറുപ്പുന്തുറ സ്വദേശിയാണ്.

ഇരുവരും ഒന്നിക്കുന്നു

ഈ രണ്ട് പേരും ഒന്നിച്ചൊരു സിനിമ ചെയ്യുന്നതായിട്ടാണ് ഇപ്പോള്‍ പുറത്ത് വരുന്ന വാര്‍ത്തകള്‍. സന്തോഷ് പണ്ഡിറ്റ് ഇപ്പോള്‍ അഭിനയിക്കുന്ന മമ്മൂട്ടി ചിത്രം പൂര്‍ത്തിയായാല്‍ ഉടന്‍ മിനി നായികയാകുന്ന ചിത്രത്തിന്റെ വര്‍ക്കുകള്‍ ആരംഭിയ്ക്കും. പതിവില്‍ നിന്ന് വ്യത്യസ്തമായി ഈ സിനിമ നിര്‍മിയ്ക്കുന്നത് പണ്ഡിറ്റ് അല്ല. പകരം മിനിയായിരിയ്ക്കും പണം മുടക്കുക.

വ്യത്യസ്തമായ പ്രണയം

വ്യത്യസ്തമായ ഒരു പ്രണയ കഥയായിരിയ്ക്കുമത്രെ ചിത്രം. അമേരിക്കയില്‍ സ്ഥിരതാമസമാക്കിയ നായികയുടെയും ഇന്ത്യന്‍ യുവാവിന്റെയും പ്രണയമാണ് കഥ. കൊച്ചി, ബാംഗ്ലൂര്‍, ന്യൂയോര്‍ക്ക് എന്നിവിടങ്ങളിലായിട്ടായിരിയ്ക്കും ഷൂട്ടിങ്. ആദ്യമായിട്ടാണ് സന്തോഷ് പണ്ഡിറ്റിന്റെ ഒരു ചിത്രം കേരളം വിട്ട് പുറത്ത് പോകുന്നത് എന്ന പ്രത്യേകതയുമുണ്ട്.