'പ്രേമ'ത്തെ മലയാളി ഇത്രമേല്‍ പ്രണയിക്കുന്നുവോ, ഇന്നത്തെ ദിവസം നിവിന്‍ പോളിക്കും സംഘത്തിനുമുള്ളതാണ് !

പുതുമകളൊന്നുമില്ലാതെ എത്തുന്ന ചിത്രം

മ്യൂസിക് ആല്‍ബങ്ങളുടെ പോസ്റ്ററിനെ ഓര്‍ന്മിപ്പിക്കുന്ന തരത്തിലുള്ള പോസ്റ്ററാണ് ചിത്രത്തിന് വേണ്ടി പുറത്തിരക്കിയത്. പുതുമകളേതുമില്ലാതെ എത്തുന്ന ചിത്രം എന്നായിരുന്നു സിനിമയുടെ ടാഗ് ലൈന്‍. സൂക്ഷിച്ച് നോക്കിയാല്‍ മാത്രമേ ചിത്രത്തിന്റെ സംവിധായകന്റെയും നിര്‍മ്മാതാവിന്റെയും പേര് പോസ്റ്ററില്‍ നിന്നും വായിച്ചെടുക്കാന്‍ കഴിയുമായിരുന്നുള്ളൂ.

സമൂഹ മാധ്യമങ്ങളിലൂടെ വൈറലായ പാട്ട്, ആലുവാപ്പുഴയുടെ തീരത്ത്

പ്രേമം സിനിമ ഇറങ്ങുന്നതിന് മുന്‍പ് തന്നെ ചിത്രത്തിലെ ഗാനവും മേരിയും പ്രേക്ഷകര്‍ക്ക് സുപരിചിതമായി മാറിയിരുന്നു. ആലുവാപ്പുഴയുടെ തീരത്ത് എന്ന ഗാനവും അതിലെ ചുരുണ്ട മുടിക്കാരിയും വളരെ പെട്ടെന്നാണ് പ്രേക്ഷക മനസ്സില്‍ ഇടം നേടിയത്. സമൂഹ മാധ്യമങ്ങളിലൂടെ പാട്ട് മാത്രമല്ല അനുപമ എന്ന തുടക്കക്കാരിയും പ്രേക്ഷകര്‍ക്ക് പ്രിയങ്കരിയായി മാറി.

ട്രെയിലറും ടീസറുമില്ലാത്ത ചിത്രം

സമീപകാലത്ത് പുറത്തിറങ്ങുന്ന ചിത്രങ്ങള്‍ക്കെല്ലാം ടീസറും ട്രെയിലറും നിര്‍ബന്ധമായിരുന്ന കാലത്താണ് ഇത്തരമൊരു കാര്യത്തെ ആകപ്പാടെ പൊളിച്ചെഴുതുന്ന രീതിയില്‍ ഇതു രണ്ടുമില്ലാതെ പ്രേമം എത്തിയത്. സിനിമയെക്കുറിച്ച് പ്രേക്ഷകര്‍ക്ക് ഒരു തരത്തിലുള്ള മുന്‍ധാരണയും ഉണ്ടാകരുതെന്നുള്ള സംവിധായകന്റെ പിടിവാശി കൂടിയാണ് ഇവിടെ പ്രയോഗിച്ചത്.

സെന്‍സര്‍ കോപ്പി ചോര്‍ന്നു

യുവജനങ്ങളായിരുന്നു സിനിമയുടെ തുടക്കത്തില്‍ തിയേറ്ററുകളിലേക്ക് ഇടിച്ചു കയറിയിരുന്നത്. എന്നാല്‍ പിന്നീട് കുടുംബ പ്രേക്ഷകരും ചിത്രം ഏറ്റെടുത്തു തുടങ്ങി. എന്നാല്‍ ഇതിനിടയിലാണ് സിനിമാ വ്യവസായത്തിന് തന്നെ ഭീഷണിയായി നിലനില്‍ക്കുന്ന ചോര്‍ച്ച പ്രശ്‌നം ചിത്രത്തെയും ബാധിച്ചത്. ചിത്രത്തിന്റെ സെന്‍സര്‍ കോപ്പി ചോര്‍ന്നു. ഇത് വാടാസ്പ്പിലൂടെ പ്രചരിക്കുകയും ചെയ്തു.

നിവിന്‍ പോളി സ്‌റ്റൈലുമായി യുവജനത

കറുത്ത കുര്‍ത്തയും വെളുത്ത മുണ്ടുമായിരുന്നു പ്രേമം സിനിമ ഇറങ്ങിയ സമയത്ത് യുവജനതയുടെ ഇഷ്ട വേഷം. നിവിന്‍ പോളിയുടെ ലുക്കും താടിയും യുവാക്കളെ സ്വാധീനിച്ചിരുന്നു. വിജയ ചിത്രങ്ങളിലെ കഥാപാത്രങ്ങളുടെ സ്റ്റൈലുകള്‍ പലപ്പോഴും ട്രെന്‍ഡായിരുന്നു. കോളേജ് പശ്ചാത്തലത്തിലുള്ള ചിത്രമായതിനാല്‍ത്തന്നെ ഈ സ്റ്റൈല്‍ ക്യാംപസുകളിലാണ് കൂടുതലായും കണ്ടത്.

മേരിക്കും സെലിനും മീതെ മലര്‍ മിസ്സ്

ആദ്യപകുതിയിലാണ് പ്രത്യക്ഷപ്പെടുന്നതെങ്കിലും മലര്‍ മിസ്സാണ് ചിത്രത്തില്‍ കൂടുതല്‍ ശ്രദ്ധിക്കപ്പെട്ടത് എന്ന കാര്യത്തില്‍ പ്രേക്ഷകര്‍ക്കും സംശയമില്ല. സായ് പല്ലവി എന്ന അഭിനേത്രിയെ കേരളക്കര ഇത്രമേല്‍ സ്വീകരിച്ചു. സായ് യുടേതായി പുറത്തിറങ്ങിയ കലിക്കും മികച്ച അഭിപ്രായം നേടാന്‍ കഴിഞ്ഞിരുന്നു.