എന്‍ജികെ കേരള കലക്ഷന്‍ കൈപൊള്ളിച്ചു! കാപ്പാനില്‍ നിന്നും പിന്‍വാങ്ങുന്നതായി ടോമിച്ചന്‍ മുളകുപാടം?

ടോമിച്ചന്‍ മുളകുപാടം പിന്‍വാങ്ങുന്നു?

മലയാളത്തിലെ മുന്‍നിര നിര്‍മ്മാതാക്കളിലൊരാളായ ടോമിച്ചന്‍ മുളകുപാടമായിരുന്നു കോടികള്‍ മുടക്കി കാപ്പാന്റെ കേരള വിതരണാവകാശം സ്വന്തമാക്കിയത്. തമിഴ് ചിത്രങ്ങള്‍ക്ക് കേരളത്തില്‍ നിന്നും മികച്ച സ്വീകരണമാണ് ലഭിക്കാറുള്ളത്. നടിപ്പിന്‍ നായകനായ സൂര്യയും മലയാളത്തിന്റെ കംപ്ലീറ്റ് ആക്ടറും ഒരുമിച്ചെത്തുന്നുവെന്നറിഞ്ഞത് മുതല്‍ ആരാധകര്‍ സന്തോഷത്തിലായിരുന്നു. സിനിമാലോകവും ആരാധകരും ഉറ്റുനോക്കിയ സമാഗമങ്ങളിലൊന്ന് കൂടിയായിരുന്നു ഇത്. ഇത്തരമൊരു അവസരമൊരുക്കിയ സംവിധായകന് നന്ദി അറിയിച്ച് സൂര്യ എത്തിയിരുന്നു. എന്നാല്‍ ചിത്രത്തില്‍ നിന്നും പിന്‍വാങ്ങാനുള്ള തീരുമാനത്തിലാണ് ടോമിച്ചന്‍ മുളകുപാടമെന്നുള്ള റിപ്പോര്‍ട്ടുകളാണ് പുറത്തുവന്നിട്ടുള്ളത്.

തീരുമാനത്തിലേക്ക് നയിച്ചത്?

മോഹന്‍ലാലിന്റേയും സൂര്യയുടേയും ആരാധകര്‍ ഒരുപോലെ ഞെട്ടിയിരിക്കുകയാണ് ഇപ്പോള്‍. സമീപകാല റിലീസായെത്തിയ എന്‍ജികെ കേരളത്തിലെ വിതരണക്കാര്‍ക്ക് നഷ്ടമായിരുന്നുവെന്നും അതേത്തുടര്‍ന്നാണ് അദ്ദേഹം ഇത്തരത്തിലൊരു തീരുമാനത്തിലേക്ക് നീങ്ങിയതെന്നുമുള്ള റിപ്പോര്‍ട്ടുകളുമാണ് പുറത്തുവന്നിട്ടുള്ളത്. അടുത്തിടെ അദ്ദേഹം വിതരണം ചെയ്ത തമിഴ് സിനിമകള്‍ സാമ്പത്തികമായി വലിയ ലാഭമൊന്നും നല്‍കിയിരുന്നില്ല എന്നുള്ള വിവരങ്ങളും പുറത്തുവന്നിട്ടുണ്ട്. ഇതേക്കുറിച്ചുള്ള അന്തിമ തീരുമാനം വന്നിട്ടില്ല.

ആരാധകരുടെ കാത്തിരിപ്പ്

ആക്ഷന്‍ ത്രില്ലറായെത്തുന്ന കാപ്പാനായി കാത്തിരിക്കുകയാണ് ആരാധകര്‍. കെവി ആനന്ദും പട്ടുക്കോട്ടൈ പ്രഭാകരനുമാണ് ചിത്രത്തിന് തിരക്കഥയൊരുക്കിയത്. ആര്യയു ബോമന്‍ ഇറാനിയും പ്രധാന വേഷത്തിലെത്തുന്ന ചിത്രത്തില്‍ നായികയായെത്തിയത് സയേഷയാണ്. അല്ലു സിരിഷും ചിത്രത്തിന്റെ ഭാഗമാവുന്നുണ്ടെന്ന തരത്തിലുള്ള റിപ്പോര്‍ട്ടുകള്‍ പുറത്തുവന്നിരുന്നുവെങ്കിലും അദ്ദേഹം പിന്‍മാറുകയായിരുന്നു. പകരക്കാരനായാണ് ആര്യയെത്തിയത്. ന്യൂയോര്‍ക്ക്, ബ്രസീല്‍, ന്യൂഡല്‍ഹി, ഹൈദരാബാദ് തുടങ്ങിയവിടങ്ങളിലായാണ് സിനിമ ചിത്രീകരിച്ചത്.

ആര്യയും സയേഷയും

തെന്നിന്ത്യന്‍ സിനിമയുടെ പ്രിയപ്പെട്ട താരദമ്പതികളായ ആര്യയും സയേഷയും കാപ്പാനില്‍ പ്രധാന കഥാപാത്രങ്ങളായി എത്തുന്നുണ്ട്. ഈ സിനിമയുടെ ചിത്രീകരണത്തിനിടയില്‍ വെച്ചാണ് ഇവരുടെ പ്രണയത്തെക്കുറിച്ച് പുറംലോകം അറിഞ്ഞതും അധികം വൈകാതെ തന്നെ ആ പ്രണയം വിവാഹത്തിലേക്കും എത്തുകയായിരുന്നു. വിവാഹത്തിനിടയിലെ ചിത്രങ്ങളും വീഡിയോയുമൊക്കെ സോഷ്യല്‍ മീഡിയയിലൂടെ വൈറലായിരുന്നു. സംവിധായകരും താരങ്ങളുമൊക്കെ ഇവര്‍ക്ക് ആശംസ അറിയിച്ച് എത്തിയിരുന്നു. ഇവരുടെ വിവാഹ ശേഷം പുറത്തിറങ്ങുന്ന ആദ്യ സിനിമ കൂടിയാണ് കാപ്പാന്‍.

സിനിമ റിലീസ് ചെയ്യുന്നത്

ഓഗസ്റ്റ്‌ 31ന് ചിത്രം റിലീസ് ചെയ്യുമെന്നുള്ള റിപ്പോര്‍ട്ടുകളാണ് പുറത്തുവന്നിട്ടുള്ളത്. 100 കോടി ചെലവിലാണ് ചിത്രം നിര്‍മ്മിച്ചിട്ടുള്ളത്. മോഹന്‍ലാലും സൂര്യയും ആദ്യമായി ഒരുമിക്കുന്നുവെന്ന പ്രത്യേകതയുള്ളതിനാല്‍ ഇരുവരുടേയും ആരാധകരും സന്തോഷത്തിലാണ്. സിനിമയുടെ പോസ്റ്ററുകളെല്ലാം ക്ഷണനേരം കൊണ്ടായിരുന്നു വൈറലായി മാറിയത്. പതിവില്‍ നിന്നും വ്യത്യസ്തമായി ആരാധകരായിരുന്നു ചിത്രത്തിന്‍റെ പേര് തിരഞ്ഞെടുത്തത്.