ഇനി സിനിമയിലേക്കില്ല? അമ്മയില്‍ നിന്നും രാജി വെക്കുന്നതിന് മുന്‍പ് നടി പറഞ്ഞത്?

നടി രാജിവെച്ചു

ദിലീപിനെ തിരിച്ചെടുക്കാനുള്ള അണിയറനീക്കങ്ങള്‍ നേരത്തെ തന്നെ ശക്തമായിരുന്നു. അദ്ദേഹത്തെ പുറത്താക്കിയ തീരുമാനം തെറ്റായിരുന്നുവെന്ന് വ്യക്തമാക്കി നിരവധി താരങ്ങള്‍ പരസ്യമായി രംഗത്തുവന്നിരുന്നു. ഈ തീരുമാനത്തെക്കുറിച്ച് പുറംലോകത്തെ അറിയിച്ച മമ്മൂട്ടിയേയും രൂക്ഷമായി വിമര്‍ശിച്ചിരുന്നു. താരം തിരികെ സംഘടനയിലേക്ക് എത്തുമെന്ന് വ്യക്തമായതോടെയാണ് നടി തന്റെ തീരുമാനം വ്യക്തമാക്കിയത്.

സിനിമയില്‍ തുടരുന്നില്ല

ഇനി സിനിമയില്‍ തുടരാന്‍ താല്‍പര്യമില്ലെന്നും സാധാരണ പോലെ ജീവിതം തുടരാനാണ് താല്‍പര്യമെന്നും നടി സുഹൃത്തുക്കളോട് പറഞ്ഞിരുന്നു. സംഘടനയില്‍ നിന്നും പിന്‍വാങ്ങുന്നതിനെക്കുറിച്ച് നടി അടുത്ത സുഹൃത്തുക്കളുമായി ചര്‍ച്ച നടത്തിയിരുന്നു. ബുധനാഴ്ചയാണ് അമ്മയില്‍ നിന്നും പിന്‍വാങ്ങുകയാണെന്ന് താരം പ്രഖ്യാപിച്ചത്. ഡബ്ലുസിസിയുടെ ഫേസ്ബുക്ക് പോസ്റ്റിലൂടെയാണ് നടിയുടെ രാജിയെക്കുറിച്ച് പുറംലോകമറിഞ്ഞത്.

ഡബ്ലുസിസി നടിയോടൊപ്പം

നടിക്ക് ശക്തമായ പിന്തുണ നല്‍കി ആദ്യം മുതലേ കൂടെയുള്ള വനിതാസംഘടന പുതിയ തീരുമാനത്തെയും പിന്തുണയ്ക്കുകയായിരുന്നു. നടിയുടെ രാജിയെക്കുറിച്ച് അറിഞ്ഞതിന് ശേഷമാണ് കൂടുതല്‍ പേരുടെ കാര്യത്തെക്കുറിച്ചുള്ള ചര്‍ച്ചകള്‍ അരങ്ങേറിയത്. നടിയോടൊപ്പം ഡബ്ലുസിസിയിലെ എല്ലാ അംഗങ്ങളും അമ്മയില്‍ നിന്നും പിന്‍വാങ്ങിയാലോ എന്ന തരത്തിലായിരുന്നു ആദ്യത്തെ ചര്‍ച്ചകള്‍. കൂടിയാലോചനകള്‍ക്ക് ശേഷം ആ തീരുമാനം വേണ്ടെന്ന് വെക്കുകയായിരുന്നു.

രമ്യ നമ്പീശനും ഗീതുവും റിമയും

നടിയുടെ അടുത്ത സുഹൃത്തുക്കളായ രമ്യ നമ്പീശനും ഗീതു മോഹന്‍ദാസും റിമ കല്ലിങ്കലും അമ്മയില്‍ നിന്ന് രാജി വെച്ചിരുന്നു. ഡബ്ലുസിസിയുടെ ഫേസ്ബുക്ക് പോസ്റ്റിലൂടെയാണ് ഇവര്‍ ഇതേക്കുറിച്ച് വ്യക്തമാക്കിയത്. കുറ്റാരോപിതനായ വ്യക്തിയെ തിരിച്ചെടുക്കാനും മാത്രമുള്ള എന്ത് നീക്കമാണ് ഇപ്പോള്‍ നടന്നതെന്ന തരത്തില്‍ നേരത്തെ തന്നെ രൂക്ഷവിമര്‍ശനം ഉയര്‍ന്നുവന്നിരുന്നു. രാജി വെക്കുന്നതിനുള്ള കൃത്യമായ കാരണവും ഇവര്‍ വ്യക്തമാക്കിയിരുന്നു.

കൂടുതല്‍ രാജി പിന്നീട്

നടിയെ അപമാനിക്കുന്ന തരത്തിലുള്ള നീക്കമാണ് അമ്മ ഇപ്പോള്‍ നടത്തിയതെന്ന തരത്തില്‍ സിനിമാപ്രവര്‍ത്തകരും പ്രേക്ഷകരുമൊക്കെ പുതിയ തീരുമാനത്തില്‍ അസംതൃപ്തി പ്രകടിപ്പിച്ചിരുന്നു. അതിന് പിന്നാലെയാണ് നാല് പേര്‍ രാജി വെച്ചത്. അമ്മയില്‍ നിന്നും കൂടുതല്‍ പേര്‍ രാജി വെച്ചേക്കുമെന്നുള്ള സൂചനയും താരങ്ങള്‍ നല്‍കിയിട്ടുണ്ട്.

മഞ്ജു വാര്യര്‍ തുടര്‍ന്നേക്കും

അമ്മയില്‍ നിന്നും മഞ്ജു വാര്യര്‍ പിന്‍വാങ്ങുമോയെന്ന തരത്തിലുള്ള ചര്‍ച്ചകളും സജീവമായിരുന്നു. എന്നാല്‍ വിദേശത്തേക്ക് പോകുന്നതിന് മുന്നോടിയായി താരം സുഹൃത്തു്ക്കളുമായി ഇക്കാര്യത്തെക്കുറിച്ച് സംസാരിച്ചിരുന്നുവെന്നും സംഘടനയില്‍ തുടര്‍ന്നേക്കുമെന്നുള്ള റിപ്പോര്‍ട്ടുകളുമാണ് പുറത്തുവന്നിട്ടുള്ളത്. പൃഥ്വിരാജിനെയും മഞ്ജു വാര്യരെയും മുന്‍നിര്‍ത്തി ബദല്‍ സംഘടന നിലവില്‍ വന്നേക്കുമെന്നുള്ള റിപ്പോര്‍ട്ടുകളും പ്രചരിക്കുന്നുണ്ട്.