ജോണി എന്ന ടൈറ്റില്‍ കഥാപാത്രത്തെ പ്രേക്ഷകര്‍ക്ക് പരിചയപ്പെടുത്തിക്കൊണ്ടാണ് ചിത്രം ആരംഭിക്കുന്നത്. നല്ലൊന്താരം കുരുപ്പ്, കക്കാന്‍ മാത്രമല്ല നിക്കാനും പഠിച്ച കള്ളന്‍ ഈ വിശേഷണങ്ങളൊക്കെ ആദ്യ കാഴ്ചയില്‍ തന്നെ പ്രേക്ഷകര്‍ക്ക് ചാര്‍ത്തി കൊടുക്കുന്ന തരത്തിലുള്ള കൈയിലിരിപ്പാണ് ജോണിയുടേത്. ജോണിയുടെ കുട്ടിക്കാലത്തെ കന്നംതിരിവുകളിലൂടെയാണ് കഥാപാത്രത്തെ പ്രേക്ഷകര്‍ക്ക് പരിചയപ്പെടുത്തി കൊടുക്കുന്നത്. കാര്യങ്ങള്‍ ഇങ്ങനെയൊക്കെയാണെങ്കിലും ജോണിയേപ്പോലെ സത്സ്വഭാവിയായ ചെറുപ്പക്കാരന്‍ ആ നാട്ടിലില്ലെന്ന അഭിപ്രായമാണ് നാട്ടുകാര്‍ക്കും വീട്ടുകാര്‍ക്കും. ഇതോടെ ജോണിയുടെ ചേട്ടനായ പീറ്ററിനും അനുജനായ ഫിലിപ്പോസിനും വീട്ടില്‍ യാതൊരു സമാധാനവുമില്ലെന്നായി. വളര്‍ന്നപ്പോഴും ജോണിയുടെ സ്വഭാവത്തില്‍ മാറ്റമൊന്നുമുണ്ടായില്ല. നല്ല കറ തീര്‍ന്ന കള്ളനായി അവന്‍ മാറി. ഒപ്പം നാട്ടുകാര്‍ക്ക് മുന്നില്‍ തന്റെ സത്‌പ്പേരും ഇമേജും അവന്‍ കാത്തു സൂക്ഷിച്ചു.

നാട്ടിലെ ഏറ്റവും വലിയ പണക്കാരന്റെ മകളായ ജെസയും ജോണിയും തീവ്രമായ പ്രണയത്തിലാണ്. എന്നാല്‍ തന്റെ മകളെ ജോണിക്ക് വിവാഹം കഴിച്ചുകൊടുക്കാന്‍ ജെസയുടെ അപ്പനായ ജോസിന് താല്പര്യമില്ല. ഒരു രാത്രിയില്‍ ജോണി നടത്തുന്ന മോഷണത്തിലൂടെ കാര്യങ്ങള്‍ മാറി മറിയുകയാണ്. എല്ലാരേയും എല്ലാക്കാലത്തും പറ്റിക്കാനാകില്ലല്ലോ. ഒന്നാം പാതിയില്‍ ജോണിയുടെ തരികിടകളും തമാശകളുമായി രസകരമായി മുന്നോട്ട് പോകുന്ന ചിത്രത്തിന് രണ്ടാം പാതിയോടെ ഗൗരവം വര്‍ദ്ധിക്കുകയാണ്. സിനിമ ചര്‍ച്ച ചെയ്യുന്ന പ്രധാന വിഷയം അവിടെയാണ് തുടങ്ങുന്നത്. വെള്ളിമൂങ്ങയേയും പാവാടയേയും അനുസ്മരിപ്പിക്കുന്ന അവതരണമാണ് ചിത്രത്തിന്റെ ഒരോ പാതിക്കും.

ജോണി ടൈറ്റില്‍ കഥാപാത്രമായി കുഞ്ചാക്കോ ബോബന്‍ ചിത്രത്തിലുടനീളം നിറഞ്ഞ് നില്‍ക്കുന്നുണ്ട്. ജോണിയുടെ സഹോദരന്മാരായ പീറ്റര്‍, ഫിലിപ്പോസ് എന്നിവരെ യഥാക്രമം ടിനി ടോം, ഷറഫുദ്ദീന്‍ എന്നിവരാണ് അവതരപ്പിക്കുന്നത്. മുഴുനീള കോമഡി കഥാപാത്രമാണ് ഷറഫുദ്ദീന്റെ ഫിലിപ്പോസ് എന്ന പീലി. ജോണിയുടെ അപ്പനായ സ്‌കറിയയായി എത്തുന്നത് വിജയരാഘവനാണ്. അമ്മയായി ഗീതയും. മികച്ച കാസ്റ്റിംഗ് ചിത്രത്തിന് ഗുണകരമായിട്ടുണ്ട്. ജെസയായി അനു സിത്താര എത്തുമ്പോള്‍ അതിഥി വേഷത്തിലാണ് മംമ്ത മോഹന്‍ദാസ് എത്തുന്നത്. കാര്യമായി ഒന്നും ചെയ്യാനില്ലാത്ത നായിക കഥാപാത്രമാണ് അനു സിത്താരയുടേത്. അതേസമയം ചെറുതെങ്കിലും ശക്തമാണ് മംമ്തയുടേത്.

വെള്ളിമൂങ്ങയ്ക്ക് ജോജി തോമസ് എഴുതിയ ജോണി ജോണി യെസ് അപ്പ പ്രേക്ഷകര്‍ക്ക് പ്രതീക്ഷയര്‍പ്പിക്കാവുന്ന ഒരു തിരക്കഥാകൃത്തിലേക്ക് വിരല്‍ ചൂണ്ടുന്നു. തന്മത്വമുള്ള നര്‍മ്മ രംഗങ്ങള്‍കൊണ്ട് സമ്പന്നമാണ് ചിത്രം. മാര്‍ത്താണ്ഡന്റെ മുന്‍ചിത്രങ്ങള്‍ക്ക് ഛായഗ്രഹണം നിര്‍വ്വഹിച്ച പ്രദീപ് നായര്‍ക്ക് പകരമായി വിനോദ് ഇല്ലംപള്ളിയാണ് ജോണി ജോണി യെസ് അപ്പ ക്യാമറയില്‍ പകര്‍ത്തിയിരിക്കുന്നത്. കഥയുടെ ഒഴുക്കിന് ഭംഗം വരാത്ത മികച്ച ദൃശ്യങ്ങളാണ് വിനോദിന്റേത്. രണ്ടാം പാതിയിലെ വൈകാരിക രംഗങ്ങളിലെ ഭാവ തീവ്രത ഒട്ടും ചോര്‍ത്തിക്കളായാത്തതായിരുന്നു ഷാന്‍ റഹ്മാന്റെ പശ്ചാത്തല സംഗീതം.

144 മിനിറ്റ് ദൈര്‍ഘ്യമുള്ള ചിത്രം പ്രേക്ഷകരെ ബോറടുപ്പിക്കാതെയാണ് മുന്നോട്ട് പോകുന്നത്. ആനുകാലികമായ ചില സംഭവങ്ങളെ ഹാസ്യാത്മകമായി ചിത്രത്തില്‍ പരാമര്‍ശിക്കുന്നുമുണ്ട്. പ്രതീക്ഷകളുടെ അമിത ഭാരമില്ലാതെ ഒരു കുടുംബ ചിത്രം പ്രതീക്ഷിച്ച് തിയറ്ററിലേക്ക് എത്തുന്ന പ്രേക്ഷകരെ ജോണി ജോണി യെസ് അപ്പ നിരാശപ്പെടുത്തില്ല.