ഇനിയും പാടണോ, എത്ര വേണോ പാടിത്തരാം... എന്നെക്കൊണ്ടതല്ലേ പറ്റൂ; കെഎസ് ചിത്ര

'ഇനിയും പാടണോ, എത്ര വേണമോ പാടിത്തരാം... എന്നെക്കൊണ്ടതല്ലേ പറ്റൂ. സന്തോഷമായി, എന്ത് വേണമെങ്കിലും ചെയ്യാം' നിറഞ്ഞചിരിയോടെ ചിത്ര പറഞ്ഞു, നിങ്ങളുടെ ആത്മാർഥതയും പിന്തുണയുമില്ലായിരുന്നെങ്കിൽ നമ്മൾ മോശം അവസ്ഥയിലേയ്ക്ക് പോയേനെ. ഈ തിരക്കിനിടയിലും നിങ്ങളുടെ ആരോഗ്യം കൂടി നോക്കണം. ആരോഗ്യ പ്രവർത്തകരുടെ സേവനത്തിന് കയ്യടിയെന്നും ചിത്ര പറഞ്ഞു.

ഷിഫ്റ്റോ ളീവോ ഇല്ലാതെ എത്ര പേരാണ് സേവനം അനുഷ്ഠിക്കുന്നത്. നമ്മൽ സുഖമായി ഇരിക്കുന്നത് നിങ്ങൾ കഷ്ടപ്പെട്ടതു കൊണ്ട് മാത്രമാണ്, ഈ തിരക്കുകൾക്കിടയിലും നിങ്ങളുടെ ആരോഗ്യം കൂടി നോക്കണം.സാങ്കേതികത കുറവാണെങ്കിലും നിങ്ങളുടെ ഈ ആത്മാര്‍ത്ഥതയാണ് വിജയ കാരണം. കേരളം ഇക്കാര്യങ്ങള്‍ കൈകാര്യം ചെയ്യുന്ന രീതിയെ പുറത്തുള്ള പലരും അഭിനന്ദിക്കുന്നത് കേൾക്കുമ്പോൾ ശരിയ്ക്കും സന്തോഷം തോന്നാറുണ്ട്.

ഓരോ തവണ വാർത്ത കാണുമ്പോഴും വല്ലാത്ത ടെൻഷനാണ്. നിങ്ങൾ ചെയ്യുന്ന സേവനത്തിന് ഇതൊന്നും പോര. വെള്ള ഉടുപ്പിട്ട നിങ്ങളെ കാണുമ്പോൾ വളറെ സന്തോഷമുണ്ട്. നിങ്ങൾ ചെയ്യുന്നത് നോക്കുമ്പോൾ ഞാൻ ചെയ്യുന്നത് ഒന്നുമല്ല. ഈ പോരാട്ടത്തിൽ നമ്മൾ ജയിക്കും.നിങ്ങളുടെ സ്നേഹത്തിനും കരുതലിനും ഒരു കോടി നന്ദിയും പ്രാർഥനയുമുണ്ടെന്ന് ചിത്ര പറയുന്നു.

ആരോഗ്യ പ്രവർത്തകർ ആവശ്യപ്പെട്ട മലയാളം, തമിഴ്, കന്നട, തുടങ്ങിയ ഭാഷകളിലെ എല്ലാ ഗാനങ്ങളും ചിത്ര പാടി.അതിനിടയില്‍ ആരോഗ്യപ്രവര്‍ത്തകര്‍ക്കും ചിത്ര പാടാന്‍ അവസരം നല്‍കി.'ലോകം മുഴുവന്‍ സുഖം പകരാനായ്...', നെറ്റിയില്‍ പൂവുള്ള..., നീര്‍മണിപ്പീലിയില്‍..., ആകാശഗംഗ തീരത്തിനപ്പുറം..., പൂ മാനമേ..., അഞ്ജലീ അഞ്ജലി പുഷ്പാഞ്ജലി തുടങ്ങിയ നിരവധി ഗാനങ്ങൾ ചിത്ര ആലപിച്ചു. കരുണാമയനേ കാവല്‍ വിളക്കേ കനിവിന്‍ നാളമേ...' എന്ന ഗാനം ചിത്ര ഉള്ളുരുകി പാടിയപ്പോള്‍ പലരുടേയും കണ്ണ് നിറഞ്ഞിരുന്നു.