ഗായിക മഞ്ജരിയും കുടുംബജീവിതത്തിലേക്ക്; ബാല്യകാല സുഹൃത്തുമായി മഞ്ജരി വിവാഹിതയാവുന്നു

മഞ്ജരിയുടെ ബാല്യകാല സുഹൃത്തായ ജെറിനാണ് വരന്‍. ഇരുവരും മസ്‌കറ്റിലെ സ്‌കൂളില്‍ ഒന്നാം ക്ലാസ് മുതല്‍ ഒന്നിച്ച് പഠിച്ചവരാണ്. പത്തനത്തിട്ട സ്വദേശിയായ ജെറിന്‍ ബാംഗ്ലുരുവിലെ സ്വകാര്യ സ്ഥാപനത്തില്‍ എച്ച് ആര്‍ മാനേജറാണ്. തിരുവനന്തപുരത്ത് വെച്ചാണ് വിവാഹം നടക്കുന്നത്. ശേഷം മജിഷ്യന്‍ ഗോപിനാഥ് മുതുകാടിന്റെ മാജിക് അക്കാദമിയിലെ ഭിന്നശേഷി വിദ്യാര്‍ഥികള്‍ക്കൊപ്പം വിരുന്ന് സത്കാരവും ഏര്‍പ്പെടുത്തും.

'വിവാഹത്തിന് വേണ്ടി ഒരുങ്ങുകയാണ്' എന്ന് പറഞ്ഞ് മഞ്ജരി രംഗത്ത് വന്നിരുന്നു. ഇരുകൈകളിലും മൈലഞ്ചി ഇടുന്നതും അതിന് ശേഷമുള്ള വീഡിയോയുമാണ് ഗായിക പങ്കുവെച്ചത്. ഇതോടെ ആശംസകള്‍ അറിയിച്ച് സുഹൃത്തുക്കളും പ്രിയപ്പെട്ടവരുമൊക്കെ എത്തുകയാണ്.

മീര ജാസ്മിനും ഉര്‍വശിയും തകര്‍ത്തഭിനയിച്ച അച്ചുവിന്റെ അമ്മ എന്ന ചിത്രത്തിലെ പാട്ട് പാടി കൊണ്ടാണ് മഞ്ജരി പിന്നണി ഗായികയായി ചുവടുവെക്കുന്നത്. സിനിമയിലെ 'താമരക്കുരുവിയ്ക്ക് തട്ടമിട്' എന്ന് തുടങ്ങുന്ന പാട്ട് വലിയ വിജയമായിരുന്നു. വേറിട്ട ആലാപന ശൈലിയും മധുര സ്വരവും ചേര്‍ന്നതിനാല്‍ പിന്നീട് നിരവധി സിനിമകളില്‍ മഞ്ജരി പാടി. സിനിമയിലെ പിന്നണിയ്ക്ക് പുറമേ സ്റ്റാര്‍ സിംഗര്‍ പോലുള്ള സംഗീത റിയാലിറ്റി ഷോ കളില്‍ വിധി കര്‍ത്താവായിട്ടും മഞ്ജരി എത്താറുണ്ട്.