ഗര്‍ഭിണിയായി 5-ാം ദിവസം ഭര്‍ത്താവിനെ നഷ്ടപ്പെട്ടു, കുഞ്ഞ് ജനിച്ചത് അദ്ദേഹത്തിന്റെ ജന്മദിനത്തിലെന്ന് നേഹ അയ്യർ

'അവിനാഷും ഞാനും കോളേജില്‍ പഠിക്കുമ്പോള്‍ ഏറ്റവും നല്ല സുഹൃത്തുക്കളായിരുന്നു. എട്ട് വര്‍ഷത്തോളം നീണ്ട പ്രണയത്തിന് ശേഷം ഞങ്ങള്‍ തമ്മില്‍ വിവാഹിതരായി. ആറ് വര്‍ഷത്തെ ദാമ്പത്യ ജീവിതത്തിന് ശേഷം ഞങ്ങളെ തേടി ആ സന്തോഷ വാര്‍ത്ത വന്നു. ഞങ്ങള്‍ ഒരു കുഞ്ഞിനെ സ്വീകരിക്കാന്‍ പോവുകയാണെന്ന്. പക്ഷേ അഞ്ച് ദിവസത്തിനുള്ളില്‍ ഞാനൊരു വാര്‍ത്ത കേട്ടു. ഹൃദയാഘാതത്തിലൂടെ എനിക്ക് അവിനാഷിനെ നഷ്ടപ്പെട്ടിരിക്കുന്നു. ഞാന്‍ പൂര്‍ണമായും തളര്‍ന്ന് പോയി. എങ്കിലും കുഞ്ഞിന് വേണ്ടി ശക്തിയാര്‍ജ്ജിച്ച് തുടങ്ങി. എന്റെ സുഹൃത്തുക്കളും ബന്ധുക്കളുമെല്ലാം എന്റെ കൂടെ എല്ലാത്തിനും ഉണ്ടായിരുന്നു.

ഒന്‍പത് മാസങ്ങള്‍ക്ക് ശേഷം അവിനാഷിന്റെ ജന്മദിനത്തില്‍ തന്നെ ഞാന്‍ മകന്‍ അന്‍ഷിന് ജന്മം നല്‍കി. നല്ലൊരു അമ്മയാവാന്‍ ശ്രമിച്ച് കൊണ്ടേ ഇരിക്കുന്നു. ഒരു അഭിനേതാവ് എന്ന നിലയില്‍ ഞാന്‍ ജാലവിദ്യകള്‍ കാണിച്ച് തുടങ്ങി. അന്‍ഷ് അവന്റെ പപ്പയുടെ ചിത്രം കണ്ട നിമിഷം ഞാന്‍ കരഞ്ഞ് പോയി. ഞങ്ങളുടെ കുഞ്ഞിന്റെ വളര്‍ച്ച കാണാന്‍ അവന്‍ ഇവിടെ ഉണ്ട് എന്ന് തന്നെയാണ് ഞാന്‍ വിശ്വസിക്കുന്നത്. മകന്‍ അന്‍ഷിനെ ഇപ്പോള്‍ കണ്ടാല്‍ പിതാവ് അവിനാഷിനെ പോലെ തന്നെയാണ്. അവന്റെ പപ്പ എങ്ങനെ ആയിരുന്നോ അതുപോലെ ഞാന്‍ അവനെ വളര്‍ത്തും... എന്നുമാണ് വീഡിയോയിലൂടെ നേഹ പറയുന്നത്.

ഓരോ കാലഘട്ടത്തിലെയും ചിത്രങ്ങളും നടി പങ്കുവെച്ചിരുന്നു. കോളേജില്‍ പഠിക്കുമ്പോള്‍ നേഹയെ എടുത്തുയര്‍ത്തി നില്‍ക്കുന്ന അവിനാഷിന്റെ ചിത്രങ്ങളായിരുന്നു. പിന്നീട് വിവാഹഫോട്ടോയും ഗര്‍ഭിണിയാണെന്ന് അറിഞ്ഞ നിമിഷം മുതല്‍ കുഞ്ഞ് ജനിച്ചതും അവന്റെ വളര്‍ച്ചകളും കൂടെ ഭര്‍ത്താവിനെയും ചേര്‍ത്ത് പിടിച്ച് കൊണ്ടുള്ള ചിത്രങ്ങളുമെല്ലാം നേഹ കാണിച്ചിരുന്നു. 'നിങ്ങളുടെ ഉള്ളില്‍ ആരോടും പറയാത്ത ഒരു കഥ വഹിച്ച് കൊണ്ട് നടക്കുന്നതിനെക്കാളും വലിയ വേദന ഇല്ല' എന്ന മായ ആഞ്ചലോയുടെ വരികളാണ് വീഡിയോയ്ക്ക് ക്യാപ്ഷനായി നടി നല്‍കിയിരിക്കുന്നത്. മുപ്പത് സെക്കന്‍ഡ് മാത്രമുള്ള ഈ വീഡിയോ ഒരുക്കിയ നല്‍കിയവര്‍ക്കുള്ള നന്ദിയും നേഹ രേഖപ്പെടുത്തിയിരുന്നു.

കുറഞ്ഞ ജീവിതകാലം കൊണ്ട് ഇത്രയും സ്‌നേഹം ലഭിച്ച നിങ്ങള്‍ ഭാഗ്യവതിയാണ്. അദ്ദേഹത്തെ ഇനിയും നിങ്ങള്‍ കണ്ടുമുട്ടും. അതുവരെ സന്തോഷത്തോടെ ഇരിക്കൂ.. മകനിലൂടെ അവിനാഷ് തന്നെയാണ് ജനിച്ചതെന്ന് കരുതിയാല്‍ മതി. അദ്ദേഹത്തിന്റെ സ്‌നേഹവും കരുതലുമെല്ലാം ഇനി മകനിലൂടെയാവും ലഭിക്കുക.. എന്നിങ്ങനെ നിരവധി കമന്റുകളാണ് നേഹയ്ക്ക് ലഭിച്ച് കൊണ്ടിരിക്കുന്നത്. ഇത്രയും ശക്തയായ സ്ത്രീകള്‍ നമ്മുടെ സമൂഹത്തില്‍ അപൂര്‍വ്വമായിട്ടേ ഉള്ളു. നിങ്ങളൊരു മാതൃകയാണെന്നാണ് കൂടുതല്‍ പേരും നേഹയോട് പറയുന്നത്.