അമല പോള്‍ ലിംഗുസ്വാമിയെ വലയ്ക്കുന്നു

തമിഴിലെ പുതിയ സെന്‍സേഷനെന്തെന്ന് ചോദിച്ചാല്‍ അമല പോള്‍ എന്നാവും ഉത്തരം. മൈനയ്ക്ക് ശേഷം ഈ മലായളിപ്പെണ്ണിനെ തമിഴകത്തിന് രൊമ്പ പുടിച്ചിരിയ്ക്കുന്നു. നമ്പര്‍ വണ്‍ സംവിധായകരും താരങ്ങളും അമലയെ നായികയാക്കാന്‍ മത്സരിയ്ക്കുകയും ചെയ്തതോടെ നടിയുടെ താരമൂല്യം കുത്തനെ ഉയരുകയും ചെയ്തു. എന്നാലിപ്പോള്‍ ഈ കൊച്ചിക്കാരിയെ കുറിച്ച് വരുന്ന വാര്‍ത്തകള്‍ അത്രകേള്‍ക്കാന്‍ സുഖമുള്ളതല്ല.

വേട്ടൈയുടെ ലൊക്കേഷനില്‍ സംവിധായകനായ ലിംഗുസ്വാമിയ്‌ക്കൊരു തലവേദനയായി അമല മാറിയെന്നാണ് കോളിവുഡില്‍ നിന്നുള്ള റിപ്പോര്‍ട്ടുകള്‍. വേട്ടൈ പൂര്‍ത്തിയാക്കാതെ മറ്റു സിനിമകളിലേക്ക് അമല ശ്രദ്ധ കേന്ദ്രീകരിയ്ക്കുന്നതാണ് ലിംഗുസാമിയെ വലയ്ക്കുന്നത്. പലപ്രാവിശ്യം ആവശ്യപ്പെട്ടിട്ടും സിനിമയുടെ ലൊക്കേഷനിലേക്ക് വരാന്‍ നടി തയാറായില്ലത്രേ. ഇനിയിപ്പോള്‍ അമല വരുന്നതും കാത്ത് വേട്ടൈയുടെ മുഴുവന്‍ ലൊക്കേഷന്‍ യൂണിറ്റും കാത്തിരിയ്ക്കുകയാണ്.

മാധവനും ആര്യയും നായകന്മാരായ ചിത്രത്തില്‍ അമലയ്ക്ക് പുറമെ സമീര റെഡ്ഡിയും നായികയാണ്. തമിഴിലെ സൂപ്പര്‍ ആക്ഷന്‍ ഡയറക്ടര്‍ കൂടിയായ ലിംഗുസാമി നടിയുടെ പെരുമാറ്റത്തില്‍ തീര്‍ത്തും നിരാശനാണത്രേ.