ആനപ്പേടിയില്‍ കാര്‍ത്തിയും അനുഷ്‌ക്കയും

By Ajith Babu

| Published: Sunday, December 11, 2011, 9:24 [IST]

കോളിവുഡിലെ യങ്‌സ്റ്റാര്‍ കാര്‍ത്തിയും തെന്നിന്ത്യന്‍ ഹോട്ടി അനുഷ്‌ക്കയും പുതിയ ചിതത്തിന്റെ ഷൂട്ടിങിനായി ചാലക്കുടിയില്‍. ഒട്ടേറെ സിനിമകള്‍ക്ക് ലൊക്കേഷനായ ചാലക്കുടിയിലെ അതിരപ്പിള്ളി വനപ്രദേശത്താണ് സിറാജ് സംവിധാനം ചെയ്യുന്ന സിനിമയുടെ ഷൂട്ടിങ് പുരോഗമിയ്ക്കുന്നത്. നേരത്തെ ആയിരത്തില്‍ ഒരുവന്റെ ഷൂട്ടിനായി ഇവിടെ വന്ന പരിചയം കാര്‍ത്തിയ്ക്കുണ്ട്.

വെള്ളച്ചാട്ടത്തിനടുത്ത് വമ്പനൊരു സെറ്റിട്ടാണ് ഇനിയും പേരിട്ടിട്ടില്ലാത്ത ചിത്രത്തിന്റെ ഷൂട്ടിങ് പുരോഗമിയ്ക്കുന്നത്. ആനത്താരയ്ക്ക് സമീപമുള്ള സെറ്റില്‍ രാത്രിസമയങ്ങളില്‍ ആനകളെത്തി നാശനഷ്ടങ്ങളുണ്ടാക്കുന്നതിനാല്‍ ഷൂട്ടിങ് പലപ്പോഴും മുടങ്ങുകയും ചെയ്യുന്നുണ്ടത്രേ.

ആനകളെപ്പേടിച്ച് കാര്‍ത്തിയ്ക്കും അനുഷ്‌ക്കയ്ക്കും ബോഡിഗാര്‍ഡുകളെ ഏര്‍പ്പെടുത്തിയിരിക്കുകയാണ് നിര്‍മാതാവ് ജ്ഞാനവേല്‍ രാജ. രാപ്പകല്‍ ഷൂട്ടിങ് നടക്കുന്നതിനാല്‍ ആനകളെ തടയാന്‍ ഈ ബോഡിഗാര്‍ഡുകള്‍ തുണയാവുമെന്നാണ് എല്ലാവരുടെയും പ്രതീക്ഷ.