അഭിമുഖം എടുക്കാന്‍ വന്ന പെണ്‍കുട്ടിയോട് തോന്നിയ ഇഷ്ടം; രജനികാന്തിന്റെ ഭാര്യയായി ലത വന്ന കഥയിങ്ങനെയാണ്

വര്‍ഷങ്ങള്‍ക്ക് മുന്‍പൊരു അഭിമുഖത്തില്‍ പങ്കെടുക്കാന്‍ എത്തിയപ്പോഴാണ് രജനികാന്ത് ആദ്യമായി ലതയെ കണ്ടുമുട്ടുന്നത്. തില്ലു മല്ലു എന്ന സിനിമയുടെ ചിത്രീകരണ തിരക്കിലായിരുന്നു താരം. ഇതിനിടയില്‍ തന്റെ പേരിലൊരു ഇന്‍ര്‍വ്യൂ ഷെഡ്യൂള്‍ ചെയ്തിട്ടുണ്ടെന്ന് അറിയുന്നു. മിക്ക പ്രണയങ്ങളിലെയും പോലെ അന്ന് ഇന്റര്‍വ്യൂ എടുക്കാനെത്തിയത് ലത രംഗാചരി എന്ന യുവതി ആണ്. ആദ്യ കാഴ്ചയില്‍ ലതയോട് ഒരു അടുപ്പം രജനികാന്തിന് തോന്നിയിരുന്നു.

രസകരമായ കാര്യം ലതയോട് ആകര്‍ഷണം തോന്നിയ രജനികാന്ത് ആ അഭിമുഖം അവസാനിച്ചപ്പോള്‍ തന്നെ വിവാഹാഭ്യര്‍ഥന നടത്തി എന്നതാണ്. തന്നെ വിവാഹം കഴിക്കാന്‍ താല്‍പര്യമുണ്ടോ എന്ന ചോദ്യത്തിന് മുന്നില്‍ ലത കൂളായി നിന്നു. അങ്ങനൊരു ആഗ്രഹം ഉണ്ടെങ്കില്‍ എന്റെ മാതാപിതാക്കളോട് വന്ന് കാര്യം അവതരിപ്പിക്കാനാണ് ലത മറുപടിയായി പറഞ്ഞത്. അധികം വൈകാതെ ലത പറഞ്ഞത് പോലെ തന്നെ രജനികാന്ത് ചെയ്തു. വീട്ടുകാര്‍ക്കും വലിയ കുഴപ്പമില്ലാതെ വന്നതോടെ വിവാഹം കഴിക്കാമെന്ന തീരുമാനത്തിലേക്ക് എത്തി.

ഐശ്വര്യ, സൗന്ദര്യ എന്നിങ്ങനെ രണ്ട് പെണ്‍മക്കളാണ് താരദമ്പതിമാര്‍ക്കുമുള്ളത്. മാതാപിതാക്കള്‍ക്ക് നല്ലൊരു കുടുംബ ജീവിതം ഉണ്ടായെങ്കിലും മക്കളുടെ കാര്യം അങ്ങനെ ആയിരുന്നില്ല. സൗന്ദര്യ ആദ്യ വിവാഹബന്ധം വേര്‍പ്പെടുത്തി മറ്റൊരാളെ വിവാഹം കഴിച്ചിരുന്നു. അടുത്തിടെയാണ് ഐശ്വര്യ നടന്‍ ധനുഷുമായിട്ടുള്ള വിവാഹബന്ധം വേര്‍പ്പെടുത്തുന്നത്. വര്‍ഷങ്ങളോളം നീണ്ട ദാമ്പത്യ ജീവിതമാണ് ഇരുവരും ചേര്‍ന്ന് അവസാനിപ്പിച്ചത്.

കഴിഞ്ഞ വര്‍ഷം റിലീസിനെത്തിയ അണ്ണാത്തെ എന്ന സിനിമയാണ് രജനികാന്തിന്റേതായി അവസാനം റിലീസ് ചെയ്തത്. അതിന് മുന്‍പ് ദര്‍ബാര്‍ എന്ന സിനിമയിലും മികവുറ്റ പ്രകടനമാണ് കാഴ്ച വെച്ചത്. ഇനി തലൈവര്‍ 169 എന്നൊരു സിനിമയാണ് രജനികാന്തിന്റേതായി വരാനിരിക്കുന്നത്. ഈ സിനിമയുടെ പ്രീ പ്രൊഡക്ഷന്‍ വര്‍ക്കുകള്‍ നടന്ന് കൊണ്ടിരിക്കുകയാണ്. ഇടക്കാലത്ത് ചില ആരോഗ്യ പ്രശ്‌നങ്ങള്‍ കാരണം രജനികാന്തിനെ ആശുപത്രിയില്‍ പ്രവേശിപ്പിച്ചിരുന്നു. അന്ന് തെന്നിന്ത്യന്‍ സിനിമാലോകം ഒന്നടങ്കം പ്രാര്‍ഥനകളുമായി എത്തിയിരുന്നു. ഓരോ വര്‍ഷവും ഒരു സിനിമ എന്ന നിലയിലാണ് താരം മുന്നോട്ട് പോവുന്നത്.