എഴുതി തള്ളാറായിട്ടില്ല, ഗംഭീരമായ തിരിച്ചുവരവിന് 'തല'! പുതിയ ചിത്രത്തില്‍ രണ്ടും കല്പിച്ച് അജിത്!!!

നാലാമങ്കം

ഗ്രാമീണ പശ്ചാത്തലുള്ള വീരം എന്ന ചിത്രത്തിലൂടെയായിരുന്നു അജിത്-ശിവ കൂട്ടുകെട്ടിന്റെ ആരംഭം. ഗംഭീര വിജയം നേടിയ ചിത്രത്തിന് പിന്നാലെ വേതാളം എന്ന ചിത്രവും ഈ കൂട്ടുകെട്ടില്‍ ഇറങ്ങി. ബോക്‌സ് ഓഫീസ് വിജയം നേടിയ ചിത്രത്തിന് പിന്നാലെ വന്‍ ഹൈപ്പുമായി എത്തിയ വിവേകം തിരിച്ചടി നേരിട്ടു. ഈ കൂട്ടുകെട്ടില്‍ ഒരുങ്ങുന്ന നാലാമത്തെ ചിത്രമാണ് വിശ്വാസം.

ത്രസിപ്പിക്കുന്ന തിരക്കഥ

അജിത്-ശിവ കൂട്ടുകെട്ടിനുണ്ടായ ബ്ലാക്ക് മാര്‍ക്ക് തിരുത്താനാണ് വിശ്വാസത്തിലൂടെ ശിവയുടെ ശ്രമം. അതിനായി ത്രസിപ്പിക്കുന്ന തിരക്കഥായാണ് അജിതിന് വേണ്ടി ഒരുക്കിയിരിക്കുന്നതെന്നാണ് വിവരം. ഗ്രാമീണ പശ്ചാത്തലത്തിലായിരിക്കും ചിത്രം ഒരുങ്ങുന്നതെന്നാണ് വിവരം.

ഗെറ്റപ്പ് മാറും

കുറച്ച് കാലമായി സ്ഥിരമായി ഒരേ ഗെറ്റപ്പിലാണ് അജിത് തന്റെ ചിത്രങ്ങളിലെല്ലാം പ്രത്യക്ഷപ്പെടുന്നത്. പുതിയ ചിത്രത്തില്‍ അതിന് വ്യത്യാസമുണ്ടാകുമെന്നാണ് വിവരം. പതിവ് സാള്‍ട്ട് ആന്‍ഡ് പെപ്പര്‍ ഇമേജ് ഒഴിവാക്കി മുടി കറുപ്പിച്ച് തടി കുറച്ചായിരിക്കും തല പുതിയ ചിത്രത്തില്‍ എത്തുക.

അനുഷ്‌ക വീണ്ടും

ഗൗതം മേനോന്‍ സംവിധാനം ചെയ്ത എന്നൈ അറിന്താള്‍ എന്ന ചിത്രത്തിന് ശേഷം അനുഷ്‌ക ഷെട്ടി വീണ്ടും അജിതിന്റെ നായികയായി എത്തുകയാണ്. ബാഹുബലിക്ക് ശേഷം ബാഗമതി എന്ന ചിത്രത്തിലും രാംഗോപാല്‍ വര്‍മ്മ ചിത്രത്തിലും മാത്രമാണ് അനുഷ്‌ക കരാറായിരിക്കുന്നത്.

ദീപാവലി റിലീസ്

2018 ഫെബ്രവരിയില്‍ ചിത്രീകരണം ആരംഭിക്കുന്ന വിശ്വാസം ദീപാവലി റിലീസായി തിയറ്ററിലെത്തിക്കാനാണ് ഉദ്ദേശിക്കുന്നത്. വിവേകത്തിന് ശേഷം ശ്രീ സത്യജ്യോതി ഫിലിംസ് നിര്‍മിക്കുന്ന ചിത്രത്തിലെ ഗാനങ്ങള്‍ ഒരുക്കുന്നത് യുവന്‍ ശങ്കര്‍രാജയാണ്. ചെന്നൈ കേന്ദ്രമായിട്ടായിരിക്കും സിനിമയുടെ ചിത്രീകരണം.